މެޗުގެ އިތުރު ވަގުތުގެ ތެރޭގައި ޖެހި ލަނޑާއެކު، އިނގިރޭސި ޕްރިމިއަރ ލީގުގައި ކްރިސްޓަލް ޕެލަސް އަތުން މެންޗެސްޓަރ ޔުނައިޓެޑް ހަނި ގޮތަކަށް މޮޅުވެއްޖެ އެވެ.

އިނގިރޭސި ޕްރިމިއަރ ލީގުގައި ހޯމަ ދުވަހުގެރޭ، ރަށުން ބޭރުގައި ކްރިސްޓަލް ޕެލަސްގެ މައްޗަށް ޔުނައިޓެޑް ކުރިހޯދީ 3-2 ންނެވެ.

މިމެޗުގައި ފުރަތަމަ ލަނޑު ޖަހާ ކުރިހޯދީވެސް ކްރިސްޓަލް ޕެލަސް އިންނެވެ. މެޗުގެ ބޮޑު ބައެއްގައި ކްރިސްޓަލް ޕެލަސް އިން ލީޑު ކުރިއިރު، ޔުނައިޓެޑް މިމެޗު ކާމިޔާބުކުރީ ކްރިސްޓަލް ޕެލަސް އިން ދެ ލަނޑު ޖަހާފައިވަނިކޮށް، ފަހަތުން އަރާ ތިން ލަނޑު ޖަހައިގެންނެވެ.

މެޗުގެ 11 ވަނަ މިނިޓުގައި ކްރިސްޓިއަން ބެންޓެކޭ ދިން ބޯޅައަކުން ކްރިސްޓަލް ޕެލަސް އަށް ކުރި ހޯދައިދިނީ އެންޑްރޯސް ޓައުންސެންޑެވެ.

މިލަނޑާއެކު ކްރިސްޓަލް ޕެލަސް ކުރީގައި އޮވެގެން މެޗުގެ ފުރަތަމަ ހާފްގެ ކުޅުން ނިމުނުއިރު، ދެވަނަ ހާފް ފެށިގެން ތިންވަނަ މިނިޓުގައި ކްރިސްޓަލް ޕެލަސް އަށް ލީޑު ފުޅާ ކޮށްދިނީ ޕެޓްރިކް ވެން އާންހޯލްޓެވެ.

ޔުނައިޓެޑްގެ ފުރަތަމަ ލަނޑު، 55 ވަނަ މިނިޓުގައި އެންޓޯނިއޯ ވެލެންސިއާ ނެގި ހުރަހަކުން ޖަހައިދިނީ ކްރިސް ސްމޯލިންގ އެވެ.

މެޗު ނިމެން 14 މިނިޓަށްވެފައި ވަނިކޮށް ޔުނައިޓެޑަށް ނަތީޖާ ހަމަހަމަ ކޮށްދިނީ ރޮމެލޫ ލުކާކޫ އެވެ. މިއީ ޕްރިމިއަރ ލީގުގައި ލުކާކޫ ޖެހި 99 ވަނަ ލަނޑެވެ.

މެޗުގެ ފުރިހަމަ ވަގުތުގެ ކުޅުން ނިމި، އިތުރު ވަގުތުގެ ތެރޭގައި ޔުނައިޓެޑްގެ ތިންވަނަ ލަނޑު ޖަހާ، މިމެޗުން ޔުނައިޓެޑަށް ތިން ޕޮއިންޓް ކަށަވަރު ކޮށްދިނީ ނެމާންޔާ މަޓިޗެވެ. މިއީ މެންޗެސްޓަރ ޔުނައިޓެޑަށް މަޓިޗް ޖަހައިދިން ފުރަތަމަ ލަނޑެވެ.

މިމެޗުން މޮޅުވެގެން ތާވަލްގެ 13 ވަނަ އަށް އެރުމުގެ ފުރުޞަތު ކްރިސްޓަލް ޕެލަސް އަށް އޮތް ނަމަވެސް، ފަހު ވަގުތު ޔުނައިޓެޑް އަތުން ބަލިވުމާއެކު ކްރިސްޓަލް ޕެލަސް އަށް ރެލިގޭޝަން ޒޯނުން އަރައިގަނެވޭ ގޮތެއް ނުވިއެވެ.

ޕްރިމިއަރ ލީގުގައި 29 މެޗު ކުޅެގެން 27 ޕޮއިންޓާއެކު ކްރިސްޓަލް ޕެލަސް އޮތީ ތާވަލްގެ ފުލުހުން ތިންވަނާގައެވެ. ކްރިސްޓަލް ޕެލަސް އަތުން ހޯދި ތިން ޕޮއިންޓާއެކު ޔުނައިޓެޑް ވަނީ ތާވަލްގެ ކުރީގައިވާ މެންޗެސްޓަރ ސިޓީ އާ ދެމެދުގައިވާ ފަރަގު 16 ޕޮއިންޓަށް ހަނިކޮށްފައެވެ. ތާވަލްގެ ކުރީގައިވާ މެންޗެސްޓަރ ސިޓީ އަށް 78 ޕޮއިންޓް ލިބިފައިވާއިރު، ދެވަނާގައިވާ ޔުނައިޓެޑަށް ލިބިފައިވަނީ 62 ޕޮއިންޓެވެ. 60 ޕޮއިންޓާއެކު ތާވަލްގެ ތިންވަނާގައި ލިވަޕޫލް އޮތްއިރު، ގަދަ ފަހެއްގައި ދެން ހިމެނެނީ ޓޮޓެންހަމް ހޮޓްސްޕަރ އަދި ޗެލްސީ އެވެ.