2020 ވަނަ އަހަރުގެ ޔޫރޯގައި ފެނިދާނެ: ބުފޮން

2020 ވަނަ އަހަރު އޮންނަ ޔޫރޯ ފުޓްބޯޅަ މުބާރަތުގައި ކުޅުންތެރިޔެއްގެ ގޮތުގައި ފެނުމަކީ އެކަށީގެންވާ ކަމެއް ކަމަށް އިޓަލީގެ ލެޖެންޑް ޖިއަންލުއީޖީ ބުފޮން ބުނެފިއެވެ.

މީގެކުރިން ދިން އިންޓަވިއުއެއްގައި ބުފޮންވަނީ މި ސީޒަނުގެ ޗެމްޕިއަންސް ލީގު ޔުވެންޓަސްއަށް ނުލިބިއްޖެނަމަ ރިޓަޔާ ކުރާނެ ކަމަށް ބުނެފައެވެ. ސްވިޑެން އަތުން 1-0 ގެ އެގްރިގޭޓް ނަތީޖާއަކުން ބަލިވެ 58 އަހަރަށްފަހު އިޓަލީއަށް ވޯލްޑް ކަޕްގެ ޖާގައެއް ގެއްލުމާއެކު ބުފޮން ގައުމީ ޓީމަށް ކުޅުން ހުއްޓާލިކަން އިއުލާނުކުރިއެވެ.

އެހެން ނަމަވެސް އިޓަލީގައި ދެވޭ ފުޓްބޯލް އެވޯޑްސްގައި ވާހަކަ ދައްކަމުން ބުފޮން ބުނީ ސްވިޑެން އަތްދަށުވެ ވޯލްޑް ކަޕުން ފުރުސަތު ގެއްލުމާއެކު ރައްޔިތުންގެ ފަރާތުން ލިބެމުންދިޔަ ސަޕޯޓް އިތުރުވެގެން ދިޔަކަމަށެވެ. އޭނާގެ ސަޕޯޓަރުންނަށް އޭނާއަކީ ތެދުވެރިކަމާއެކު މަސައްކަތްކުރާ މީހެއްކަން ފެނިގެން ގޮސްފައިވާ ކަމަށް ބުފޮން ބުނެފައިވެއެވެ.

2020 ވަނަ އަަހަރު އޮންނަ ޔޫރޯގައި ކުޅެން ބޭނުންތޯ ސުވާލުކުރުމުން ބުފޮން ބުނީ އޭނާއަކީ އެއްވެސް ކަމަކީ ނުވާނެ ކަމެއް ކަމަށް ގަބޫލްކުރާ މީހެއް ނޫންކަމަށާއި ކުރަންޖެހިއްޖެ ކޮންމެ ކަމެއް ކުރަން ތައްޔާރަށްހުރި ކަމަށެވެ. މީގެކުރިން ދިން އިންޓަވިއުއެއްގައި ބުފޮން ބުނީ އޭނާ ގައުމީ ޓީމަށް ކުޅެނީ 'ސޯލްޖާ' އެއްގެ ގޮތުގައި ކަމަށާއި 60 އަހަރު ވިޔަސް ގައުމީ ޓީމަށް ކުޅެން ގޮވާލައިފިނަމަ އެކަމަށް އިޖާބަ ދޭނެ ކަމަށެވެ.

އިޓަލީ ގައުމީ ޓީމަށް 20 އަހަރަށް ފަހު ކުޅުން ހުއްޓާލި ކަމަށް ބުނި މިހާރު އުމުރުން 39 އަހަރުގެ ބުފޮން ވަނީ އެޓީމަށް 175 މެޗު ކުޅެދީފައެވެ. އޭނާ ވަނީ އިޓަލީ ޓީމާއެކު 2006 ވަނަ އަހަރު ވޯލްޑްކަޕް ވެސް ކާމިޔާބުކޮށްފައެވެ.

ޕާމާ އިން 1995 ވަނަ އަހަރު ކެރިޔަރު ފެށި ބުފޮން ޔުވެންޓަސް އަށް ބަދަލުވީ 2001 ވަނަ އަހަރެވެ. އޭނާ ވަނީ އެ ކްލަބަށް މިހާތަނަށް 637 މެޗު ކުޅެދީ ގިނަ ކާމިޔާބީތަކެއް ހޯދާފައެވެ. އެގޮތުން އޭނާ ވަނީ ޔުވެންޓަސްއާއެކު 10 ލީގު ތަށި، ހަތަރު ކޮޕާ އިޓަލިއާ، ފަސް އިޓާލިއަން ސުޕާކަޕް ކާމިޔާބު ކޮށްފައެވެ.