ކާފިއު ވަގުތު ހުއްދަ ނެތި އުޅޭ ބިދޭސީން ވެސް ޑީޕޯޓްކޮށްލަނީ
31 މެއި 2021 | ހޯމަ 03:05ހުޅުމާލެ ދެވަނަ ފިޔަވަހީގައި ޤާއިމްކޮށްފައިވާ ޑިޓެންޝަން ސެންޓަރަށް ގެންދިއުމުގެ މަސައްކަތް މިހާރު ދަނީ ކުރަމުން
ރެގިއުލަރައިޒޭޝަން ޕްރޮގްރާމް
ވާރކް ވިސާ ނެތް ފަރާތްތަކާއި ކާފިއު ވަގުތު ހުއްދައާ ނުލައި މަގުމަތީގައި އުޅޭ ބިދޭސީންނާ މެދު ފިޔަވަޅު އެޅުމުގެ މަސައްކަތް މޯލްޑިވްސް އިމިގްރޭޝަނުން ފަށައިފިއެވެ.
މޯލްޑިވްސް ޕޮލިސް ސަރވިސް އާއި އިމިގްރޭޝަނުން ހިންގާ މި މިޕްރޮގްރާމަކީ އިކޮނޮމިކް މިނިސްޓްރީއާ ގުޅިގެން ކުރިޔަށްދާ ރެގިއުލަރައިޒޭޝަން ޕްރޮގްރާމުގެ ދަށުން ކުރިއަށް ގެންދާ ޕްރޮގްރާމެެކެވެ. މި ޕްްރޮގްރާމް ހިންގުމުގައި މޯލްޑިވްސް ޕޯޓްސް ލިމިޓެޑް، އެމްޕީއެލްއިން ވެސް ދަނީ އެހީތެރިވަމުންނެވެ. އިމިގްރޭޝަނުން ބުނީ ވާކް ވިސާ ނެތި އަދި ކޯވިޑް-19އާ ގުޅިގެން ކަނޑަޅާފައިވާ ކާފިއު ވަގުތުގައި ޤަވާއިދާ ޚިލާފަށް މަގުމަތީގައި އުޅޭ ފަރާތްތައް ހިފަހައްޓައި ހުޅުމާލެ ދެވަނަ ފިޔަވަހީގައި ޤާއިމުކޮށްފައިވާ ޑިޓެންޝަން ސެންޓަރަށް ގެންދިއުމަށް ހަމަޖެހިފައިވާ ކަމަށެވެ.
އެގޮތުން މި މީހުންގެ ހުޅުމާލެ ދެވަނަ ފިޔަވަހީގައި ޤާއިމުކޮށްފައިވާ ޑިޓެންޝަން ސެންޓަރަށް ގެންދިއުމުގެ މަސައްކަތް ކުރަނީ އެމްޕީއެލްގެ އެހީތެރިކަމާއެކު އެމްޕީއެލްގެ ބަސްތަކުގައިކަމަށެވެ. ވާރކް ވިސާ ނެތް ފަރާތްތަކާއި ކާފިއު ވަގުތު ހުއްދައާ ނުލައި މަގުމަތީގައި އުޅޭ ބިދޭސީން ޑިޓެންޝަނަށް ގެންދިޔުމަށްފަހު އެފަރާތްތައް ޑީޕޯޓުކޮށްލުމުގެ މަސައްކަތް އޮންނަ އެސޫލުން ކުރިޔަށް ދާނެކަމަށް ވެސް އިމިގްރޭޝަނުން ބުނެއެވެ.
ރެގިއުލަރައިޒޭޝަން ޕްރޮގްރާމް އަލުން ފަށާފައިމިވަނީ، ޤަވާއިދާ ޚިލާފަށް އުޅޭ ބިދޭސީން ރަޖިސްޓްރީކުރުމަށް ހިންގާ "ރެގިއުލަރައިޒޭޝަން" ޕްރޮގްރާމް މާރޗްމަހު މެދު ކަނޑާލާފައި އޮތުމަށް ފަހުއެވެ. މި ޕްރޮގްރާމް މެދުކަނޑާލާފައިވާ ސަބަބެއް އިކޮނޮމިކް މިނިސްޓްރީން އޭރު ހާމަކޮށްފައެއް ނުވެއެވެ.
ޤަވާއިދާ ޚިލާފަށް އުޅޭ ބިދޭސީން އަލުން ރަޖިސްޓަރ ވުމަށް ކުރިއަށްގެންދާ ޕްރޮގްރާމްގައި ގިނަ އަދަދެއްގެ ބިދޭސީން ދަނީ ރަޖިސްޓްރީވުމަށް މަސައްކަތް ކުރަމުންނެވެ. ޤަވާޢިދާ ޚިލާފަށް އުޅޭ ބިދޭސީން އަލުން ރަޖިސްޓްރީ ވާން ސަރުކާރުން ދީފައިވަނީ 6 މަސް ދުވަހުގެ މުއްދަތެކެވެ. ޤާވައިދާ ހިލާފަށް އުޅޭ ބިދޭސީން ގެންގުޅޭ ކުންފުންޏެއް ނަމަ، އަލުން ރަޖިސްޓްރީކުރަން އެ ކުންފުނި ނުވަތަ ބިދޭސީ މީހާ ރާއްޖެ އެތެރެކުރި ފަރާތް މެދުވެރިކޮށް އޮންލައިންކޮށް ވެސް ހުށަހެޅެއެވެ. މިހާރުވެސް ރާއްޖޭގައި ވާކް ޕާމިޓްގައި އުޅޭ ބަންގްލަދޭޝްގެ އެއްލައްކަ ތިރީސް ހާހެއްހާ މީހުން އުޅެމުންދާކަމަށް ކަމާބެހޭ ފަރާތްތަކުން ބުނެއެވެ. އަދި މީގެތެރެއިން ފަސްދޮޅަސް ތިންހާސް މީހުންނަކީ ޤަވާޢިދުތަކަށް ނުފެތޭ މީހުންކަމަށް ވެސް ސަރުކާރުން ވަނީ ހާމަކޮށްފައެވެ.
ޞައްޙަ ލިޔެކިޔުން ނެތި ރާއްޖޭގައި މަސައްކަތް ކުރާ ބިދޭސީންގެ ތެރެއިން އަމިއްލައަށް އެދިގެން އެނބުރި ޤައުމަށް ދާން ބޭނުންވާ މީހުންނަށް އެ އިންތިޒާމުތައް ހަމަޖައްސައިދިނުމަށް ދިވެހި ސަރުކާރުން އިސްނަގައިގެން ހިންގާ ރެގިއުލަރައިޒޭޝަން ޕުރޮގުރާމަށް ބަންގްލަދޭޝްގެ ފޮރިންގ މިނިސްޓަރ ވަނީ ތަޢުރީފު ވެސް ކުރައްވާފައެވެ.
