ރައީސް ނަޝީދަށް ހިމާޔަތާއި ރައްކާތެރިކަން ފޯރުކޮށްދިނުމުގެ ތަފްސީލީ މައުލޫމާތު ހާމަކުރި މައްސަލަ ހޯމަ ދުވަހުގެ ޖަލްސާއަށް
މިމައްސަލަ ހުށަހަޅަނީ ރައީސްގެ މޭޒުން ހުށަހަޅާ މައްސަލައެއްގެ ގޮތުގައި
ރައްޔިތުންގެ މަޖިލީހުގެ ޖަލްސާގެ ތެރެއިން
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް ހިމާޔަތާއި ރައްކާތެރިކަން ފޯރުކޮށްދިނުމުގެ ތެރޭގައި ތަފްސީލީ މައުލޫމާތު ހާމަކުރި މައްސަލަ، ހޯމަ ދުވަހުގެ ޖަލްސާއަށް އެޖެންޑާކޮށްފިއެވެ.
ވެބް ކޮންފަރެންސް މެދުވެރިކޮށް ކުރިޔަށް ގެންދިޔުމަށް ހަމަޖެހިފައިވާ ޖަލްސާ އަށް މިމައްސަލަ ހުށަހަޅާނީ ރައީސްގެ މޭޒުން ހުށަހަޅާ ކަމެއްގެ ގޮތުގައެވެ.
ހޯމަ ދުވަހުގެ ޖަލްސާއަށް މިމައްސަލަ އެޖެންޑާކޮށްފައިވާއިރު، 28 މެއި ގައި "މިހާރު" ނޫހުގައި ލިޔެފައިވާ އާޓިކަލްއާ ގުޅިގެން، އެކަން ސަލާމަތީ ޚިދުމަތްތަކާއި ބެހޭ ކޮމިޓީން ބަލަމުން އަންނަކަމަށް ރައްޔިތުންގެ މަޖިލީހުގެ އިދާރާއިން ވަނީ ބުނެފައެވެ. އެގޮތުން "ކެނެރީގޭގައި ސެކިއުރިޓީ ނުދެވޭނެކަމަށާއި ނުރައްކާ އޮތްކަން ނަޝީދަށް އެމްއެންޑީއެފުން އެންގި" މިސުރުޚީގެ ދަށުން މިހާރު ނޫހުގައި ލިޔެފައިވާ އާޓިކަލްގައި ހިމެނޭ، ރައީސް ނަޝީދުގެ ހިމާޔަތާއި ރައްކާތެރިކަން ފޯރުކޮށްދިނުމުގެ ތެރޭގައި ލިބިފައިވާ މައުލޫމާތާއި، ޚާއްސަކޮށް އެމަނިކުފާނު ދިރިއުޅުއްވާ ގެކޮޅުގެ ތަފްސީލީ މައުލޫމާތު ބަޔާންކޮށްފައިވާކަމަށް މިކަމާއި ގުޅިގެން މަޖިލީހުން ނެރެފައިވާ ނޫސްބަޔާނުގައި ބުނެފައިވެއެވެ.
އެފަދަ މައުލޫމާތަކީ އާންމުކޮށް ރާއްޖޭގެ ގައުމީ ސަލާމަތާއި އަމަންއާންމު ރައްކާތެރިކުރުމުގެ ގޮތުން މައުލޫމާތު އެއްކުރުމުގެ ބާރާއި އިޚުތިޔާރު ލިބިފައިވާ ބައެއްގެ ތެރެއިން އެކަމަށް ޚާއްސަކޮށްފައިވާ ބަޔަކު އެއްކުރާ މައުލޫމާތުތަކެއްކަމަށް ކޮމިޓީން ދެކޭކަމަށް ބުނެފައިވެއެވެ.
އެމައުލޫމާތު އެގޮތަށް އާންމުވުމަކީ ރައީސް ނަޝީދުގެ ހިމާޔަތާއި ރައްކާތެރިކަމާއި، ގ.ކެނެރީގޭގައި ދިރިއުޅުއްވާ އެމަނިކުފާނުގެ މުޅި އާއިލާގެ ރައްކާތެރިކަން ގެއްލިގެން ދާކަމެއްގެ ގޮތުގައި ކޮމިޓީން ދެކޭކަމަށްވެސް ބުނެފައިވެއެވެ. ސިފައިންގެ މަސްއޫލިއްޔަތާއި ވާޖިބު އަދާކުރުމުގައި ލިބޭ އެއްވެސް މައުލޫމާތެއް ސިފައިންގެ ގާނޫނުގެ ގެ 24 ވަނަ މާއްދާގެ ނ ގައި ބަޔާންކޮށްފައިވާ ފަރާތްތައް ފިޔަވައި އެނޫން އެއްވެސް ފަރާތަކާއި ހިއްސާކުރުމަކީ މަނާކަމެއްކަމަށާއި ރާއްޖޭގެ ޤާނޫނުލްޢުޤޫބާތުގެ ދަށުން ކުށެއްކަމަށްވެސް ނޫސްބަޔާނުގައި ބުނެފައިވެއެވެ.
މިމައްސަލައަކީ ގައުމީ ސަލާމަތާ ގުޅުންހުރި މައްސަލައަކަށްވެފައި، ސަލާމަތީ ޚިދުމަތްތައް ހިނގާ ނުހިނގާގޮތް ބަލަމުން ގެންދިޔުމަކީ ޤާނޫނު އަސާސީގެ 241 ވަނަ މާއްދާގެ ދަށުން ސަލާމަތީ ޚިދުމަތްތަކާއި ބެހޭ ކޮމިޓީގެ ދުސްތޫރީ ޒިންމާއެއްކަމަށް ވާއިރު، ކޮމިޓީން އެމައްސަލަ ބެލުމަށް ނިންމާފައިވާކަމަށް ވަނީ ބުނެފައެވެ.
