''އިންޑިއާ ކޮންސިއުލޭޓްގެ މަސައްކަތް ކުރުމަށް މަންދޫބުން ތިއްބެވީ ކެތްމަދުވެފައި''

''މުޅި ދެކުނަށް އެކަމުގެ ފައިދާއާ މަންފާ ކުރާނެ'' މިއީ އައްޑޫއަށް ނިސްބަތްވާ ފޭދޫ ދާއިރާގެ މެމްބަރު މުހައްމަދު ނިހާދު އައްޑޫ ސިޓީގައި އިންޑިއާގެ ކޮންސިއުލޭޓެއް ގާއިމް ކުރުމާއި ބެހޭ ގޮތުން ވިދާޅުވި އުންމީދީ ޖުމްލައެކެވެ.

އިންޑިއާގެ ކޮންސިއުލޭޓެއް ގާއިމް ކުރުމުގެ މަޝްވަރާތައް ކުރަމުންދާ އަންނަކަން ހާމަކުރުމާއެކު ރައްޔިތުން ހާސްކުރުވާ ބީދައިން ހަގީގަތާއި ޚިލާފު އެތައް ވާހަކަތަކެއް ބައެއް ފަރާތްތަކުން އަންނަނީ ދައްކަމުންނެވެ. މުޅި ސޯޝަލް މީޑިއާގެ އިތުރުން ދެމީހަކު އެއްތަން ވިޔަސް ކުރަމުންދާ ބަހުސަކީ މިއީއެވެ.

މިބަހުސް ވައިގައި ހިފާފައިވާއިރު ބައެއް މީހުން ދައްކާ ވާހަކަތަކުން އިންޑިއާއިން އުޅެނީ އައްޑޫ ސިޓީ އަތުވެތިކުރަންހެން ހީވާ ކަހަލައެވެ. ރައްޔިތުންނަށް އެބޭނުންވާ ގޮތަކަށް ވަކި ވިސްނުމަކުން ވިސްނަދޭން އުޅުނު ކަމުގައި ވިޔަސް މިއަދު ޒަމާން އޮތީ ބަދަލުވެފައެވެ. އައްޑޫ ސިޓީ ތަމްސީލުކުރާ ރައްޔިތުންގެ މަންދޫބުން ވެސް ތިއްބެވީ ތަރައްގީގެ ވިސްނުމުގައެވެ.

އައްޑޫ ސިޓީގައި އިންޑިއާގެ ކޮންސިއުލޭޓެއް ގާއިމް ކުރުމަށް މެމްބަރު ރޮޒެއިނާ ތާއީދުކުރައްވައެވެ. މެމްބަރު ރޮޒެއިނާ ވިދާޅުވީ ކޮންސިއުލޭޓްގެ ފައިދާ ކުރާނީ އައްޑޫ ރައްޔިތުންނަށް އެކަނި ނޫން ކަމަށެވެ. އައްޑޫގައި އިންޑިއާގެ ކޮންސިއުލޭޓެއް ގައިމް ކުރުމަކީ އައްޑޫ ރައްޔިތުންގެ އިތުރުން ފުވައްމުލައް އަދި މުޅި ދެކުނަށް ވެސް ބޭނުންތެރި އެކަމުގެ މަންފާ ކުރާނެ ކަމެއްކަމަށް ވިދާޅުވިއެވެ. އަދި ވިދާޅުވީ އައްޑޫއާއި އިންޑިއާއާ ދޭތެރޭ ޑައިރެކްޓް ފްލައިޓްތައް އޮޕަރޭޓް ކުރެވޭނެ މަގުފަހިވެ ދެކުނުގެ ރައްޔިތުންނަށް އެތައް ފައިސާއެއް ސަލާމަތް ކުރެވޭނެ ކަމަށެވެ.

މެމްބަރު ނިހާދު ވިދާޅުވީ އައްޑޫ ސިޓީގައި އިންޑިއާގެ ކޮންސިއުލޭޓެއް ގާއިމްކުރުމަށް ފޭދޫ ރައްޔިތުން ބޭނުންވާ ކަމަށާއި އެކަމުގެ ސަބަބުން ދެކުނަށް ކުރާ މަންފާ ރައްޔިތުންނަށް އެނގޭ ކަމަށެވެ. ކޮންސިއުލޭޓެއް ގާއިމްކުރެވިއްޖެނަމަ އައްޑޫ އާއި އިންޑިއާ ދެމެދު އިތުރަށް ގުޅުން ބަދަހިވެގެންދާނެކަން ފާހަގަކުރައްވައި މެމްބަރު ނިހާދު ވިދާޅުވީ ފެރީގެ ޚިދުމަތް އިތުރަށް ފުޅާކުރެވި، ކާރގޯ ސަޕްލައި އިތުވެގެންދާނެ ކަމަށެވެ. ސަރުކާރާއި ދެކޮޅު ފަރާތްތަކުން ކިޔަމުންދާ ފާޑުކިޔުންތަކަށް އަމާޒުކުރައްވާ މެމްބަރު ވިދާޅުވީ ބައެއް ބޭފުޅުންނަކީ އައްޑޫއަށް ތަރައްގީ ލިބެން ބޭނުންނުވާ ބޭފުޅުން ކަމަށާއި، އެބޭފުޅުން އަބަދުވެސް މަސައްކަތް ކުރަމުން އައީ އައްޑޫ ރައްޔިތުން މާލެސިޓީއަށް ބަރޯސާކުރުވަން ކަމަށެވެ. ނަމަވެސް އެބޭފުޅުންގެ ސަރުކާރެއްގައި ޗައިނާއިން ކުރާ ކަމެއްނަމަ އެކަމަށް އެއްބަސްވާނެ ކަމަށް މެމްބަރު ނިހާދު ވިދާޅުވިއެވެ.

މީގެ އިތުރުން މެމްބަރު ނިހާދު ވިދާޅުވީ ހަގީގަތާއި ޚިލާފު ގިނަ ވާހަކަތަކެއް ދައްކަމުންދާ ކަމަށާއި، އައްޑޫ ސިޓީގައި އިންޑިއާއިން މިލިޓަރީ ބޭހެއް އަޅަން ނޫޅޭ ކަމަށެވެ. އަދި އެގޮތަށް ހަގީގަތެއް ނެތް ވާހަކަތަކެއް ފެތުރި ނަމަވެސް އައްޑޫ ރައްޔިތުން ހާސްވެގެން ނޫޅޭ ކަމަށެވެ.

އައްޑޫ ސިޓީގައި އިންޑިއާގެ ކޮންސިއުލޭޓެއް ގާއިމްކުރުމަށް ތާއީދުކޮށް މެމްބަރު އިލްޔާސް ވަނީ މި ކޮންސިއުލޭޓް ގާއިމް ކުރުމަށް ދޭން ޖެހޭ ހުއްދަތައް އަވަހަށް ދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހަށާއި، ފޮރިން މިނިސްޓަރު ޝާހިދަށް ގޮވާލައްވާފައެވެ.

މެމްބަރު އިލްޔާސް ވިދާޅުވީ އައްޑޫގައި އިންޑިއާގެ ކޮންސިއުލޭޓެއް ހުޅުވުމަކީ ދެކުނުގެ ރައްޔިތުންނަށް ވިސާ ހޯދުމުގައި ލުއި ފަސޭހަތައް ލިބޭނެ ކަމެއް ކަަމަށެވެ. އަދި މިހާރުވެސް އިންޑިއާގެ އެހީއާއެކު އައްޑޫގައި ތަރައްގީގެ ގިނަ ޕްރޮޖެކްޓްތައް ހިންގަމުންދާކަން މެމްބަރު ފާހަގަކުރެއްވިއެވެ. އެގޮތުން އައްޑޫގެ މަގުހެދުމާއި، އެއާޕޯޓް މަރާމާތު ކުރުމާއި 8 ހައި އިމްޕެކްޓް ގްރާންޓް ޕްރޮޖެކްޓަށް 200 މިލިއަން ޑޮލަރުދީފައިވާ ކަމަށް މެމްބަރު އިލްޔާސް ވިދާޅުވިއެވެ.

މެންބަރު އަސްލަމް ވިދާޅުވީ އިންޑިއާގެ ކޮންސިއުލޭޓެއް ގާއިމްކުރުމަކީ ވިޔަފާރީގެ ގޮތުން ވަރަށް ބޮޑަށް ކުރިއެރުންތައް ލިބޭނެ ކަމެއް ކަމަށެވެ. އެގޮތުން އިންވެސްޓްމަންޓްގެ ފުރުސަތުތައް އިތުރުވާނެކަން މެމްބަރު އަސްލަމް ފާހަގަކުރެއްވިއެވެ. އަދި ވިދާޅުވީ އައްޑޫ ރައްޔިތުންނަށް ވިސާ ލިބުމުގައި ވެސް ލުއި ފަސޭހަ ވެގެންދާނެ ކަމަށެވެ. ހުރިހާ ގޮތަކުން ފައިދާހުރިކަމެއްކަން ފާހަގަކޮށް މެމްބަރު އަސްލަމް ވިދާޅުވީ ކޮންސިއުލޭޓް ގާއިމް ކުރުމުގައި ދޭން ޖެހޭ ހުއްދަތައް ދޭނެ ކަމަށް އުންމީދު ކުރައްވާ ކަމަށެވެ.

މެންބަރު އަހުމަދު ރަޝީދު ވިދާޅުވީ އައްޑޫ ސިޓީގައި އިންޑިއާގެ ކޮންސިއުލޭޓެއް ގާއިމް ކުރުމުގައި ސަރުކާރުން އަމަލުކުރާނީ ރަނގަޅަށް ކަމަށާއި، ރައްޔިތުންނާއި ގައުމަށް ގެއްލުންވާ ގޮތަކަށް ސަރުކާރުން އެއްވެސް ކަމެއް ނުނިންމާނެ ކަމަށެވެ. އެގޮތުން އައްޑޫ ސިޓީގެ ރައްޔިތުންނާއި ގައުމަށް ފައިދާއާއި މަންފާ ލިބޭ ކޮންމެ ކަމަކަށް ތާއީދުކުރާނެ ކަަމަށް މެމްބަރު ވިދާޅުވިއެވެ.

މެންބަރު ޝަރީފް ވިދާޅުވީ އައްޑޫ ސިޓީގައި އިންޑިއާގެ ކޮންސިއުލޭޓެއް ގާއިމް ކުރި ނަމަވެސް އެކަން ކުރާނީ އެއޮންނަ އުސޫލުތަކާއި ގަވާއިދުގެ ދަށުން ކަމަށެވެ. އިންޑިއާ އާއި ރާއްޖެއަކީ ޒަމާނުއްސުރެ ގާތް ދެގައުމުކަން ފާހަގަކުރައްވައި މެމްބަރު ވިދާޅުވީ މިކަމުގެ ސަބަބުން އިތުރަށް ގުޅުން ބަދަހިވެ ޑިޕްލޮމެޓިކް ގިނަ މަސައްކަތްތަކެއް ފަސޭހަކަމާއެކު ކުރެވޭނެ ކަމަށެވެ. މެމްބަރު ވިދާޅުވީ މިހާރު ވެސް އައްޑޫގެ ތަރައްގީއަށް އިންޑިއާއިން ބޮޑު އެހީތެރިކަމެއް ފޯރުކޮށްދީފައިވާއިރު، މިކަމުގެ ސަބަބުން ނުސީދާ ގޮތުން ވެސް ތަރައްގީ އިތުރަށް ގެނައުމަށް އެހީތެރިކަން ފޯރުކޮށްދޭނެ ކަމަށެވެ.

މީގެ އިތުރުން ދުނިޔޭގެ އެކިއެކި ގައުމުތަކުން، ރައްޓެހި ގައުމުތަކުގައި އެމްބަސީތަކާއި ކޮންސިއުލޭޓްތައް ގާއިމް ކުރާކަން މެމްބަރު ޝަރީފް ފާހަގަކުރެއްވިއެވެ.

މިއީ އައްޑޫ ސިޓީ ތަމްސީލް ކުރައްވަމުން ގެންދަވާ 7 މެމްބަރުންގެ ތެރެއިން 6 މެމްބަރުން މިކަމުގައި ދެކެވަޑައިގަންނަވާ ގޮތެވެ. މިމެމްބަރުންނަކީ ރައްޔިތުންގެ މަބްދޫބުން ކަމަށްވާއިރު، ރައްޔިތުންނަށް ދެރައެއް ނުވަތަ އެކަމުގެ ގެއްލުން ގައުމަށް ކުރާނެ ކަމެއް އެމެމްބަރުން ނުކުރާނެއެވެ. މިމެމްބަރުންގެ އިތުރުން ވެސް އައްޑޫ ސިޓީގެ މޭޔަރު އަދި ކުރީގެ ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އަލީ ނިޒާރު ވެސް ވަނީ މިކަމަށް ތާއީދުކޮށް ވާހަކަދައްކަވާފައެވެ.

މޭޔަރު ނިޒާރު ވިދާޅުވީ އިންޑިއާގެ ކޮންސިއުލޭޓެއް ގާއިމް ކުރުމަކީ އައްޑޫގެ ތަރައްގީއާ ގުޅިފައިވާ ކަމެއް ކަމަށެވެ.

އައްޑޫސިޓީގައި އިންޑިއާގެ ކޮންސިއުލޭޓެއް ގާއިމް ކުރުމާއި ބެހޭ ގޮތުން އެސިޓީގެ ރައްޔިތުންގެ ބަސް މަންދޫބުން އެވަނީ އިއްވަދީފައެވެ. ހަގީގަތް އޮޅުލުމަށް ބަޔަކު މީހުންތަކެއް މަސައްކަތް ކުރި ނަމަވެސް އެމަގުސަދު ހާސިލް ނުވާނެއެވެ. މިމަސައްކަތް ކުރުމުގެ ހުއްދަ އަވަސްކޮށް ދިނުމަށް ބައެއް މަންދޫބުން ގޮވާލާފައިވާއިރު، ހުއްދަދޭނެ އިރަކަށް ބައެއް ރައްޔިތުން ތިބީ އިންތިޒާރުގައެވެ. މަސައްކަތް އަވަސް ކޮށްދިނުމަށް އެދެމުންދާއިރު، އައްޑޫ ސިޓީގެ ރައްޔިތުން އެދޭފަދަ ތަރައްގީއަށް ވަސީލްވުމަށް ކެތްމަދުވެފައެވެ.