ރާއްޖޭގެ ތާރީޚުގައި ކެބިނެޓަށް އެއްމެ އިހާނަތިކޮށް ހިތި ވެރިޔަކީ ރައީސް ޔާމީން ކަމަށް އެ ސަރުކާރުގެ ކެބިނެޓުގައި ފިޝަރީޒް މިނިސްޓރަކަށް ހުންނެވި ޑރ މުހައްމަދު ޝައިނީ ވިދާޅުވެއްޖެއެވެ.

ޑރ ޝައިނީ ދައްކަވާފައިވާ ވާހަކަތަތެއް ހިމެނޭ އޯޑިއޯއެއް އަންނަނީ ސޯޝަލް މީޑިއާގައި ދައުރުވަމުންނެވެ. މި ކްލިޕްގައި ޝައިނީ ވިދާޅުވެފައިވަނީ، ކެބިނެޓަަށް އެންމެ އިހާނެތިކޮށް ހެއްދެވި ވެރިޔަކަށް ރައީސް ޔާމީން ވާނެ ކަމަށާއި، ރައީސް ޔާމީންގެ ކެބިނެޓަށް ދައުރު ނިމުނުއިރު ލިބުނު އެއްވެސް އެއްޗެއް ނެތް ކަމަށެވެ. ނުކުންނަން ޖެހުނީ ހުސްއަތާ ކަމަށެވެ.

ޑރ ޝައިނީ އެހެން ވިދާޅުވުމުން، ކެބިނެޓުގައި ތިއްބަވައިގެން ގައުމަށް ގެނައި ތަރައްގީއަށް ބެއްލެވުމަށް އެހެން މީހަކު ބުނާ އަޑު އިވެއެވެ. އެއަށް ރައްދުދެއްވައި ޑރ ޝައިނީ ވިދާޅުވީ ކުރީގެ ރައީސް ޑރ. މުހައްމަދު ވަހީދުގެ ވެރިކަމުގައި ވެސް ކުރީގެ ބޭފުޅުންނަށް އިއްޒަތުގެ ޝަރަފު ދެއްވި ކަމަށެވެ.

ވަޒީރުންގެ ތެރޭގައި ގޯތި ނެތް މީހުންނަށް ފްލެޓް ދޭން ވަރަށް ގިނަ ފަހަރު މަތިން އެދެވުނު ނަމަވެސް އެކަމަށްވެސް އިޖާބައެއް ނުދެއްވި ކަމަށެވެ. ފްލެޓަށް ލާރި ދައްކާނެ ފުރުސަތު ދިނުމަށް އެދުނު ނަމަވެސް އެކަންވެސް ނުވި ކަމަށް ޝައިނީ ވިދާޅުވާ އަޑު މި އޯޑިއޯއިން އިވެއެވެ.

ޑރ ޝައިނީ ވިދާޅުވެފައިވަނީ، މިއަދު ރައީސް ޔާމީނަށް ކަމެއް ކޮށްދޭން ޖެހޭނޭ ވިދާޅުވެވެން ނޯންނާނެ ކަމަށެވެ. އަދި މިވެނި ކަމެއް ކޮށްދިނީއޭ ބުނެވެންވެސް ނޯންނާނެ ކަމަށެވެ.

ޑރ ޝައިނީ ވިދާޅުވެފައިވަނީ، އަދީބު ޖެހި ސަކަރާތް ގަނޑެއް ޖެހި ފަހުން ކެބިނެޓުގައި ބޭތިއްބީވެސް މަޖުބޫރުވެގެން ކަމަށެވެ. ސަބަބެއް ކަމުގައި ވިދާޅުވީ، ޔޫއެސް އާއި އީޔޫއާ ހުރިހާ ކަމެއްގައި ވާހަކަދައްކަވަމުން ގެންދެވީ އެމަނިކުފާނު ކަމަށެވެ. މޯދީއާ ހުރިހާ ވާހަކައެއް ދައްކަމުން ދިޔައީވެސް އެމަނިކުފާނު ކަމަށާއި، ހުރިހާ އެއްޗެއް ހިފަހައްޓައިގެން އީޔޫގައި ހުރިހާ ކަމެއްކުރީ އެމަނިކުފާނު ކަމަށެވެ. ބޭރުކޮށްލައިފިއްޔާ އެ ހުރިހާ ގުޅުމެއް މެދުކެނޑޭނެ ކަމަށާއި، އެގައުމުތަކާއެކު ވާހަކަތައް ކުރިއަށް ގެންދަވަން ރައީސަށް ކެރިވަޑައި ނުގަންނަވާނެ ކަމަށެވެ.

ހަމަ މި އޯޑިއޯގައި ޝައިނީ ވިދާޅުވެފައިވަނީ އެމަނިކުފާނާ ނުކުޅުއްވުމަށެވެ. އެމަނިކުފާނާ ކުޅުއްވާނަމަ ކުރަން ވަރަށް ކަންތައް އެބަހުރި ކަމަށެވެ. ހަމަމިއާއެކު ސަރުކާރު މިއޮތީ ވެސް އެމަނިކުފާނުގެ ސަބަބުން ކަމަށް ވިދާޅުވެއެވެ. ފެބްރުއަރީ 1 ގެ ސުޕްރީމް ކޯޓުގެ ހުކުމަށް ފަހު ވެސް އޭރުގެ ސަރުކާރު ވައްޓާލަން ވަރަށް މަސައްކަތްކުރި ކަމަށާއި ވަރަށް ގިނަ ފައިސާ ޚަރަދުކުރި ކަމަށް ވިދާޅުވިއެވެ. އޭގެ ތެރެއިން ބައެއް ފައިސާއާ ހަވާލުވީ ވެސް ޑރ ޝައިނީ ފޮނުވި ބަޔަކު ކަމަށް ވިދާޅުވިއެވެ.

އިބްރާހިމް މުހައްމަދު ސާލިހަށް ވެރިކަމަށް ވަޑައިގަނެވުނީ ވެސް ޑރ ޝައިނީ މެދުވެރިވެރިވެގެން ކުރި މަޝްވަރާތަކެއްގެ ތެރެއިން ކަމަށް ވިދާޅުވެ އެވެ. ޑރ ޝައިނީ ވިދާޅުވާ ގޮތުގައި ވަކި މީހެއްގެ ވާހަކަ ދައްކާ ވަރަށް ނުވާ ކަމަށާއި، އެންމެންގެ ހާލު ވެސް އޭނާއަށް އެނގިވަޑައިގަންނަވާ ކަމަށެވެ. އެކި މީޓިންތަކުގެ އޯޑިތައް ވެސް ހުންނާނެ ކަމަށާއި އެހެންވެ ޝައިނީއާ ނުކުޅެވޭނެ ކަމަށް އޭނާ ވިދާޅުވެއެވެ.

ރައްޔިތުންގެ މަޖިލީހުގެ މިހާރުގެ ރައީސް މުހައްމަދު ނަޝީދަށް ޓެރަރިޒަމްގެ ހުކުމްކޮށް ޖަލަށް ލުމުން އެމަނިކުފާނު ސަލާމަތްކުރުމަށް އެމްޑީޕީން އޭރުގެ ސަރުކާރާ ކުރި މަޝްވަރާތަކުގައި ހިނގި ކަންކަމާއި ދެކެވުނު ހުރިހާ ވާހަކައެއް ވެސް އެނގިވަޑައިގަންނަވާ ކަމަށް ވިދާޅުވެ ވާހަކަތަކެއް ދައްކަވައެވެ. ނަމަވެސް އޯޑިއޯގައި އެ ވާހަކަތައް އެހާ ސާފެއް ނޫނެވެ.

އެމްއެމްޕީއާރްސީ މައްސަލަ ހަގީގަތް ހާމަވާގޮތަށް އެއްވެސް ސަރުކާރަކަށް ތަހުގީގުކުރަން ނުކެރޭނެ ކަމަށްވެސް ޑރ ޝައިނީ ވިދާޅުވާތީ މި އޯޑިއޯގައި އިވެއެވެ. އެންމެ ގިނައިން އެ ފައިސާ ލިބިފައި އޮތީ މި ސަރުކާރުގެ މީހުންނަށް ކަމަށް ޝައިނީ ތުހުމަތު ކުރެއްވިއެވެ.