އެމްޑަބްލިއުއެސްސީގެ ވަޒީފާތަކަށް ފޯމު ހުށަހެޅުން އޮންލައިންކޮށް!
30 މެއި 2021 | އާދީއްތަ 07:57އެއް ބޭނުމަކީ ކުންފުނީގެ އޮންލައިން ޚިދުމަތްތަކާއި ޑިޖިޓަލައިޒޭޝަން ޕްރޮސެސް އިތުރަށް ފުޅާކުރުން
އެމްޑަބްލިއުއެސްސީގެ އިމާރާތް
މާލެ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) އިން ވަނީ އެކުންފުނީގެ ވަޒީފާތަކަށް ދެން ހުށަހެޅޭނީ ހަމައެކަނި އޮންލައިންކޮށް ކަމަށް ހާމަކޮށްފައެވެ.
އެމްޑަބްލިއުއެސްސީން ބުނީ ޖޫން އެއް ވަނަ ދުވަހުން ފެށިގެން އެކުންފުނީގެ ވަޒީފާތަކަށް އެދި ހުށަހެޅޭނީ އޮންލައިންކޮށް ކަމަށާއި ވަޒީފާއަށް އެދޭ ފޯމު ފުރިހަަމަކުރުމަށް ފަހު ކުންފުނީގެ ވެބްސައިޓް މެދުވެރިކޮށް ފޯމު ހުށަހެޅޭނެ ކަމަށެވެ.
އެކުންފުނީގެ ވަޒީފާތަކަށް އޮންލައިންކޮށް ފޯމު ހުށަހެޅޭނެގޮތަށް ހަމަޖައްސާފައި މިވަނީ ކުންފުނީގެ އޮންލައިން ޚިދުމަތްތަކާއި ޑިޖިޓަލައިޒޭޝަން ޕްރޮސެސް އިތުރަށް ފުޅާކޮށް، ހަރުދަނާކޮށް، ތަރައްގީކުރުމަށް ކުރެވޭ މަސައްކަތުގެ ދަށުން ކަމަށް އެމްޑަބްލިއުއެސްސީން ފާހަގަކުރެއެވެ. ރައްޔިތުންނާ ވީހާޥެސް ގާތުން، ރައްޔިތުންނަށް ފަސޭހަވާނެހެން ވަޒީފާއަށް އެދި ހުށައެޅުމުގެ ފުރުސަތު ފަހިކޮށްދިނުމަކީ މިކަމުގެ މަގުސަދެއްކަމަށް ކުންފުނިން ބުނެއެވެ.
މިގޮތަށް ނިންމުމާ އެކު ވަޒީފާއަށް އެދި ހުށަހެޅުމާއި ވަޒީފާއަށް މީހުން ހޮވުމުގެ މަރުހަލާތަކުގައި ކަރުދާސް ބޭނުންކުރުން މަދުވެ ތިމާވެއްޓަށް ހެޔޮ އަސަރުތަކެއް ކުރަން މަގުފަހިވެގެންދާނެ ކަމަށް އެމްޑަބްލިއުއެސްސީން ފާހަގަކުރެއެވެ.
އެމްޑަބްލިއުއެސްސީން ވަނީ ބަލިމަޑުކަމުގެ މިހާލަތުގައި އެކުންފުނީގެ ޚިދުމަތްތައް ހޯދުމުގައި އޮންލައިން ޕްލެޓްފޯމްތައް އިޚްތިޔާރުކުރުމަށް އިލްތިމާސްކޮށްފައެވެ.
