އިނޮވޭޓިވް ފައިނޭންސިންގ އަދި ފަސޭހަ މަދަދު ފޭސް 2 ފައިނޭންސް ސްކީމަށް ފޯމު ހުށަހެޅުމުގެ މުއްދަތު އިތުރުކޮށްފި

އިނޮވޭޓިވް ފައިނޭންސިންގ އަދި ފަސޭހަ މަދަދު ފޭސް ފައިނޭންސް ސްކީމަށް ފޯމު ހުށަހެޅުމުގެ މުއްދަތު އިތުރުކޮށްފިއެވެ.

އިކޮނޮމިކް މިނިސްޓްރީން ހާމަކޮށްފައިވާ ގޮތުގައި އިނޮވޭޓިވް ފައިނޭންސިންގ އަދި ފަސޭހަ މަދަދު ފޭސް 2 ސްކީމަށް ފޯމު ހުށަހެޅުމުގެ ފުރުސަތު 10 ސެޕްޓެމްބަރުގެ ނިޔަލަށް ވަނީ އިތުރުކުރެވިފައެވެ. ފޯމު ބަލައިގަތުމަށް ހަމަޖެހިފައިވަނީ ބަންދު ނޫން ކޮންމެ ދުވަހެއްގެ ހެނދުނު 10.00 އިން 12.00 އަށް ކުރިއަށްދާނެ ކަމަށް އެމިނިސްޓްރީން ބުނެއެވެ. މީގެ ކުރިން ފޯމު ހުށަހެޅުމަށް ކަނޑައަޅާފައިވަނީ އޮގަސްޓް 30 ގެ ނިޔަލަށެވެ.

ފޯމު ބަލައިގަތުމުގެ ކަންކަން އަތޮޅުތެރޭގައި ގާއިމްކޮށްފައިވާ ހަތް ބިސްނަސް ސެންޓަރުންވެސް ފޯމު ބަލައިގަތުން ކުރިއަށްދާނެ ކަމަށް އެމިނިސްޓްރީން ބުނެއެވެ.

އިނޮވޭޓިވް ފައިނޭންސިންގ ސްކީމުގެ ދަށުން ހަތް މިލިއަން ރުފިޔާ ވަނީ ދޫކުރުމަށް ހަމަޖެހިފައިވާކަމަށެވެ.

މި ސްކީމަށް އެދި ހުށަހަޅާ ފަރާތްތަކަކީ، އުމުރުން 60 އަހަރުން ދަށުގެ ފަރާތްތަކަށް ވާން ޖެހެއެވެ. އަންހެން ބައިވެރިންނާއި ޒުވާނުންނަށް އިސްކަންދެވޭއިރު ޒުވާނުންގެ ގޮތުގައި ބަލާނީ އެޕްލިކޭޝަން ބަލައިގަންނަން ކަނޑައަޅާފައިވާ ތާރީހާ ހަމައަށް މީލާދީ ސަނަތުން 18 އަހަރާއި 35 އަހަރާ ދެމެދުގެ އުމުރުފުރާގެ ފަރާތްތަކެވެ.

މި ސްކީމުގެ ދަށުން ފައިނޭންސް ކުރެވޭ އެންމެ މަތީ އަދަދަކީ 500,000 ރުފިޔާ އެވެ. އަދި އެންމެ ދަށް އަދަދަކީ 150,000 ރުފިޔާއެވެ.