ބީޕީޓީ ބަޔާން އޮންލައިންކޮށް ހުށައެޅުން ލާޒިމްކޮށް، ގެޒެޓްކޮށްފި

ވިޔަފާރީގެ ފައިދާއިން ނަގާ ޓެކްސް (ބީޕީޓީ) ބަޔާން އޮންލައިންކޮށް ހުށައެޅުން ލާޒިމްކޮށް، ޓެކްސް ރޫލިންގ ގެޒެޓްކޮށްފި އެވެ.

ދައުލަތުގެ ޓެކްސް އިދާރާ، މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން އާންމުކޮށްފައިވާ ޓެކްސް ރޫލިންގައިވާ ގޮތުން އަހަރެއްގެ ތެރޭގައި 10 މިލިއަން ރުފިޔާ ނުވަތަ އެއަށްވުރެ އިތުރަށް އާމްދަނީ ލިބޭ ފަރާތްތަކުން، އެ ފަރާތްތަކުގެ ބީޕީޓީ ބަޔާން ހުށައަޅަން ޖެހޭނީ މީރާގެ އޮންލައިން ޕޯޓަލް މީރާކަނެކްޓް މެދުވެރިކޮށެވެ. ނަމަވެސް، ޓެކްސް ދައްކާ ފަރާތުން ހުށަހަޅާ ހުށަހެޅުމަކާއި ގުޅިގެން، އެ ނޫން ގޮތްގޮތުން ހުށަހަޅާ ޓެކްސް ބަޔާންތައް ބަލައިގަތުމުގެ އިޚްތިޔާރު ކޮމިޝަނަރ ޖެނެރަލް އަށް ލިބިގެންވާކަމަށް އެ ރޫލިންގައި ވަނީ ބުނެފަ އެވެ.

ރޫލިންގައިވާ ގޮތުން އެ ރޫލިންގ އަށް އަމަލުކުރަން ފަށާނީ، ރޫލިންގ ގެޒެޓްކުރާ ތާރީހުން ފެށިގެންނެވެ.