ދައުލަތުގެ ޚަރަދު ލިބުނު އާމްދަނީއަށްވުރެ 30 އިންސައްތަ އިތުރު

މިއަހަރުގެ މިހާތަނަށް ދައުލަތަށް ލިބުނު އާމްދަނީއަށްވުރެ ދައުލަތުގެ ޚަރަދު 30 އިންސައްތަ އިތުރުކަމަށް ފިނޭންސް މިނިސްޓަރީގެ ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން މެއި 20 ވަނަ ދުވަހުގެ ނިޔަލަށް ދައުލަތަށް އާމްދަނީގެ ގޮތުގައި 7.1 ބިލިއަން ރުފިޔާ ލިބިފައިވާއިރު، 10.2 ބިލިއަން ރުފިޔާ ވަނީ ޚަރަދުކޮށްފައެވެ. އެގޮތުން ރިކަރެންޓް އަދި ކެޕިޓަލް އެކްސްޕެންޑިޗަރގެ ގޮތުގައި ދައުލަތުން ވަނީ 9.8 ބިލިއަން ރުފިޔާ ޚަރަދުކޮށްފައެވެ.

Advertisement

ދައުލަތުގެ ބަޖެޓުގެ 29.2 އިންސައްތަ މިހާތަނަށް ޚަރަދުކޮށްފައިވާއިރު، ރިކަރެންޓް އެކްސްޕެންޑިޗަރގެ ގޮތުގައި ޚަރަދުކޮށްފައި ވަނީ 7.3 ބިލިއަން ރުފިޔާއެވެ. އެގޮތުން މުސާރަ އާއި އިނާޔަތްތައް ދިނުމަށް 1.5 ބިލިއަން ރުފިޔާ ހަރަދު ކޮށްފައިވާ އިރު، މުވައްޒަފުންނަށް އެލަވަންސް ދިނުމަށް ހަރަދުކޮށްފައި ވަނީ 1.4 ބިލިއަން ރުފިޔާއެވެ. ޕެންޝަނަށް 383.7 މިލިއަން ރުފިޔާ ހަރަދު ކޮށްފައިވާ އިރު، ރިޓަޔަމެންޓް ބެނެފިޓްގެ ގޮތުގައި 163.2 މިލިއަން ރުފިޔާ ހަރަދު ކޮށްފައިވެއެވެ.

އެޑްމިނިސްޓްރޭޓިވް އަދި އޮޕަރޭޝަނަލް އެކްސްޕެންސްގެ ގޮތުގައި 3.7 ބިލިއަން ރުފިޔާ ވަނީ ހަރަދު ކޮށްފައެވެ.

ދައުލަތުގެ ކެޕިޓަލް އެކްސްޕެނޑިޗަރ އަށް ބަލާއިރު، މިމުއްދަތުގައި 2.4 ބިލިއަން ރުފިޔާ ވަނީ ޚަރަދުކޮށްފައެވެ. އެއީ ކެޕިޓަލް އިކުއިޕްމަންޓަށް 140 މިލިއަން ރުފިޔާ، އިންފްރާސްޓްރަކްޗަރ އެސެޓްސްއަށް 1.1 ބިލިއަން ރުފިޔާ، އަދި ޑިވެލޮޕްމެންޓް ޕްރޮޖެކްޓްސް އާއި އިންވެސްޓްމެންޓް އައުޓްލޭސްއަށް 1.08 ބިލިއަން ރުފިޔާއެވެ.

މީގެ އިތުރުން ދައުލަތުގެ ލޯނުތައް ދެއްކުމަށް 424.9 މިލިއަން ރުފިޔާ ހަރަދުކޮށްފައިވާއިރު، ސޮވެރިން ޑިވެލޮޕްމެންޓް ފަންޑަށް 133 މިލިއަން ރުފިޔާ ވަނީ ޓްރާންސްފަރ ކޮށްފައެވެ. އަދި ޕީއެސްއައިޕީ މަޝްރޫއުތަކަށް 1.2 ބިލިއަން ރުފިޔާ ވަނީ ހޭދަކޮށްފައެވެ.

މިއަހަރުގެ މިހާތަނަށް ދައުލަތަށް ލިބިފައިވާ 7.1 ބިލިއަން ރުފިޔާގެ އާމްދަނީ އަކީ މިއަހަރަށް ފާސްކޮށްފައިވާ ބަޖެޓުން އާމްދަނީގެ ގޮތުގައި ލިބޭނެ ކަމަށް އަންދާޒާކޮށްފައިވާ މިންވަރުގެ 33.6 އިންސައްތައެވެ. ދައުލަތަށް މިހާތަނަށް އެންމެ ބޮޑު އާމްދަނީއެއް ލިބިފައި ވަނީ ޓެކުހުންނެވެ. އެއީ 5.5 ބިލިއަން ރުފިޔާއެވެ. އޭގެތެރޭގައި އިމްޕޯޓް ޑިއުޓީގެ ގޮތުގައި ލިބުނު 910.1 މިލިއަން ރުފިޔާ، ބިޒްނަސް ޕްރޮޕަޓީ ޓެކްސްގެ ގޮތުގައި ލިބުނު 1.2 ބިލިއަން ރުފިޔާ، ގްރީން ޓެކުހުގެ ގޮތުގައި ލިބުނު 279.1 މިލިއަން ރުފިޔާ އަދި އެއަރޕޯޓް ސަރވިސް ޗަރޖްގެ ގޮތުގައި ލިބުނު 230.6 މިލިއަން ރުފިޔާ ހިމެނެއެވެ.

ޓެކްސް ނޫން އެހެނިހެން ގޮތްގޮތުން ދައުލަތަށް 1.5 ބިލިއަން ރުފިޔާ ލިބިފައިވާއިރު، ކެޕިޓަލް ރިސީޕްޓްސްގެ ގޮތުގައި ދައުލަތަށް ލިބިފައި ވަނީ 4.7 މިލިއަން ރުފިޔާއެވެ. އަދި ގްރާންޓްސްގެ ގޮތުގައި 69.9 މިލިއަން ރުފިޔާ ވަނީ ލިބިފައެވެ.

މިއަހަރުގެ ބަޖެޓަކީ ކޮވިޑް-19ގެ ސަބަބުން ރާއްޖޭގެ އިގުތިސާދަށް ދިމާވެފައިވާ ގޮންޖެހުންތަކުން އަރައިގަނެވޭނެ ގޮތަށް ވިސްނައި ފާސްކޮށްފައިވާ ބަޖެޓެއް ކަމަށް ފިނޭންސް މިނިސްޓަރ އިބްރާހިމް އަމީރު ވަނީ ވިދާޅުވެފައެވެ. އަދި އަހަރު ފެށިގެން އައި އިރު އަންދާޒާ ކުރި ވަރަށްވުރެ އިތުރަށް ރާއްޖޭގެ ފަތުރުވެރިކަމުގެ ސިނާއަތް ރަނގަޅުވެގެން ގޮސްފައި ވުމާއެކު, ދެން އަންނަ ކްރެޑިޓް ރޭޓިން އެޖެންސީ މޫޑީސްގެ ރިވިއު ރޭޓިން ރަނގަޅުވެގެން ދާނެކަމުގެ އުންމީދު އެބަ އޮތް ކަމަށާއި އެކަން އެގޮތަށް ވެގެން ދާނީ މިހާރު މިއޮތް ކޮވިޑް ސާޖް ރަނގަޅު ކުރެވިގެން ކަމަށް މިނިސްޓަރ ވަނީ ވިދާޅުވެފައެވެ.