ހުޅުމާލޭގައި 2000 ސޯޝަލް ހައުސިން ޔުނިޓް އެޅުމުގެ އެއްބަސްވުމުގައި ސޮއިކޮށްފި
28 މެއި 2021 | ހުކުރު 13:37މި މަޝްރޫއުގެ ދަށުން އަޅާ ހައުސިން ޔުނިޓްތަކުގެ މަސައްކަތް 3 އަހަރު ދުވަހުގެ ތެރޭ ނިންމާލެވޭނެ
ހުޅުމާލެ ދެވަނަ ފިޔަވަހި
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން 2000 ސޯޝަލް ހައުސިން ޔުނިޓް އެޅުމުގެ އެއްބަސްވުމުގައި ފަހި ދިރިއުޅުން ކޯޕަރޭޝަން ލިމިޓެޑް (އެފްޑީސީ) އާއި އިންޑިއާގެ އަޝޯކާ ބިލްޑްކޮން ލިމިޓެޑާ ދެމެދު ސޮއިކޮށްފިއެވެ.
މި އެއްބަސްވުމުގައި ސޮއިކުރުމަށް ބުރާސްފަތި ދުވަހު ވާޗުއަލްކޮށް ބޭއްވި ރަސްމިއްޔާތުގައި އެފްޑީސީގެ ފަރާތުން ސޮއިކުރައްވާފައި ވަނީ އެކުންފުނީގެ މެނޭޖިންގ ޑައިރެކްޓަރ ސަލްފިއްޔާ އަންވަރު އެވެ. އަދި އަޝޯކާ ބިލްޑްކޮން ލިމިޓެޑްގެ ފަރާތުން ސޮއިކުރައްވާފައި ވަނީ ކުންފުނީގެ ޑެޕިއުޓީ ޖެނެރަލް މެނެޖަރ އަޖޭ ކަންކަރިޔާ އެވެ.
މިކޮންޓްރެކްޓުގެ ދަށުން 2000 ސޯޝަލް ހައުސިންގ ޔުނިޓް ހުޅުމާލެ ދެވަނަ ފިޔަވަހީގައި އިމާރާތްކުރުމަށް ހަމަޖެހިފައިވެއެވެ. މި މަސައްކަތް ކުރުމަށް އަޝޯކާ ބިލްޑްކޮން ލިމިޓެޑާ ހަވާލުކޮށްފައިވަނީ އިންޖިނިއަރިންގ، ޕްރޮކިއޯމަންޓް އެންޑް ކޮންސްޓްރަކްޝަން (އީޕީސީ) އުސޫލުންނެވެ.
މި މަޝްރޫއުގެދަށުން 650 އަކަފޫޓުގެ 2 ކޮޓަރީ ގެ 500 ޔުނިޓް އަދި 900 އަކަފޫޓުގެ 3 ކޮޓަރީ ގެ 1500 ޔުނިޓް އިމާރާތްކުރުމަށް ހަމަޖެހިފައިވެއެވެ. މިއީ އެކްސްޕޯރޓް އިމްޕޯރޓް ބޭންކް އޮފް އިންޑިއާ (އެގްޒިމް ބޭންކް) ގެ ލޯން އެހީގެ ދަށުން ކުރިއަށް ގެންދެވޭ 140 މިލިއަން އެމެރިކާ ޑޮލަރުގެ މަޝްރޫއެކެވެ.
ހުޅުމާލެ ދެވަނަ ފިޔަވަހީގައި ގައި މި މަޝްރޫއުގެ ދަށުން އަޅާ ހައުސިން ޔުނިޓްތަކުގެ މަސައްކަތް 3 އަހަރު ދުވަހުގެ ތެރޭ ނިންމާލެވޭނެ ކަމަށް އެފްޑީސީން މައުލޫމާތުދެއެވެ.
އަޝޯކާ ބިލްޑްކޮން ލިމިޓެޑް އަކީ އިންޑިއާގެ އިތުރުން އެކި ގައުމުތަކުގައި ކާމިޔާބުކަމާއެކު ބޮޑެތި ޕްރޮޖެކްޓްތައް ފުރިހަމަކޮށްފައިވާ ކުންފުންޏެކެވެ.
ބޯހިޔާވަހިކަމުގެ ސިޔާސަތުގެދަށުން ހުޅުމާލޭ 2 ވަނަ ފިޔަވަހީގައި 2000 ހައުސިންގ ޔުނިޓް އެޅުމުގެ އެއްބަސްވުމެއްގައި އިންޑިޔާގެ ކުންފުޏެއް ކަމަށް ވާ ޖޭއެމްސީ ޕްރޮޖެކްޓްސް (އިންޑިއާ) ލިމިޓެޑާއެކު މިދިޔަ މާޗު ވެސް އެފްޑީސީން އެއްބަސްވުމެއްގައި ސޮއިކޮށްފައިވެއެވެ. އެ މަޝްރޫއުގެދަށުން 650 އަކަފޫޓުގެ 2 ކޮޓަރީ ގެ 600 ޔުނިޓް އަދި 900 އަކަފޫޓުގެ 3 ކޮޓަރީ ގެ 1400 ޔުނިޓް އިމާރާތްކުރުމަށް ހަމަޖެހިފައިވެއެވެ. އެއީ 137 މިލިއަން އެމެރިކާ ޑޮލަރުގެ މަޝްރޫއުއެކެވެ.
