އިޒްރޭލުން ގާޒާއަށް ދިން ހަމަލާތަކުގެ ބައިނަލްއަޤުވާމީ ތަހުގީގެއް ހިންގުމަށް އދ ގެ ހިއުމަންރައިޓްސް ކައުންސިލުން ނިންމައިފިއެވެ.
އަލްޖަޒީރާގައި ރިޕޯޓު ކޮށްފައިވާ ގޮތުން އދ އިން އެގޮތަށް ފާސްކޮށްފައިވަނީ ސްޓޭޓުތަކުގެ މެދުގައި ނެގުނު ވޯޓުގެ ތެރެއިން 24 ވޯޓުގެ އަޢުލަބިއްޔަތުންނެވެ. މި ޤަރާރާ ދެކޮޅަށް 14 ސްޓޭޓަކުން ވޯޓު ދީފައިވެއެވެ. މި ގަރާރުގައި ވަނީ އެކަންކަން ތަހުގީގު ކުރުމަށް ޚާއްސަ އިންކުއަރީ ކޮމިޓީއެއް އެކުލަވާލުމާއި، އިޒްރޭލުން ފަލަސްތީނާމެދު އަމަލުކޮށްފައިވާ ގޮތް ސާފުކޮށް ބަލައި ތަހުގީގު ކުރުމަށް ގޮވާލާފައެވެ. ނަމަވެސް އިޒްރޭލުން ވަނީ އެކަމަށް އެއްބާރުލުން ނުދޭނެކަން ފާޅުގައި އިއުލާނުކޮށްފައެވެ.
އދ ގެ އިންސާނީ ހައްގުތަކާ ބެހޭ ކޯޑިނޭޓަރެއް ކަމަށްވާ ލީން ހެސްޓިންގސް ވަނީ އިޒްރޭލުން ހިންގި އުދުވާނުތަކުގެ ސަބަބުން ސުންނާފަތިވެފައިވާ ސިޓީތައް އަލުން އާރާސްތު ކުރުމަށް ބައިނަލްއަޤުވާމީ އެހީއަށްވެސް އެދިފައެވެ. އެގޮތުން އެންމެ އަސާސީ ބޭނުންތައް ފުއްދޭނެ ގޮތް އެ ގައުމުގެ ރައްޔިތުންނަށް ފަހިކޮށްދިނުމަށް މުހިންމު ފިޔަވަޅުތަކެއް އަޅަންޖެހިފައިވާކަން ލީން ފާހަގަ ކުރެއްވިއެވެ. އދ އިން މިހާރުވެސް ވަނީ އެހެނިހެން ފަންޑުތައް މެދުވެރިކޮށް 22 މިލިއަން އެމެރިކާ ޑޮލަރަށްވުރެ ގިނަ ފައިސާގެ އެހީ ހޯދުމުގެ އިންތިޒާމުތައް ހަމަޖައްސައިދީފައެވެ.
11 ދުވަސްވަންދެން އިޒްރޭލުން ހިންގި މި އުދުވާނު މި ވަގުތަށް ހުއްޓާލާފައިވާއިރު، މި ޙަމަލާތަކުގެ ސަބަބުން 254 މީހަކު ޝަހީދުވެފައިވާ ކަމަށް ޕާކިސްތާނުގެ ސިއްހީ އޮފިޝަލުން މައުލޫމާތު ދެއެވެ.
