ސްޕަޓްނިކް ވީގެ 220 މިލިއަން ޑޯޒް ހޯދުމުގެ އެއްބަސްވުމެއްގައި ޔުނިސެފުން ސޮއިކޮށްފި
ސޮއިކޮށްފައިވަނީ ކޮންޑިޝަނަލް ސަޕްލައި އެގްރިމެންޓެއް ގައި
ސްޕަޓްނިކް ވި އަކީ ގަމަލެޔާ އިންސްޓިޓިއުޓުން އުފައްދާ ވެކްސިނެކެވެ
ކޮވިޑް-19ށް ރަޝިއާއިން އުފައްދާފައިވާ ސްޕަޓްނިކް ވީ ވެކްސިންގެ 220 މިލިއަން ޑޯޒް ހޯދުމުގެ އެއްބަސްވުމެއްގައި ޔުނިސެފުން ސޮއިކޮށްފިއެވެ.
ޔުނިސެފުން ސޮއިކޮށްފައިވާ ކޮންޑިޝަނަލް ސަޕްލައި އެގްރީމެންޓްގެ ދަށުން ދުނިޔޭގެ ސިއްހަތު ޖަމިއްޔާއިން ސްޕަޓްނިކް ވީ އަށް ހުއްދަދިނުމާއެކު އެޖަމިއްޔާއަށް ވެކްސިންގެ ޑޯޒްތައް ލިބިގެންދާނެއެވެ. އަދި ސިއްހަތު ޖަމިއްޔާގެ ހުއްދަ ލިބުމާއިއެކު ގައުމުތަކަށް ވެކްސިން ފޮނުވުމުގެ މަސައްކަތް ފެށިގެންދާނެ ކަމަށް ޔުނިސެފުން ބުނެއެވެ.
ދުނިޔޭގެ ސިއްހަތު ޖަމިއްޔާއިން ސްޕަޓްނިކް ވީގެ ރައްކާތެރިކަން ކަށަވަރުކުރުމުގެ މަސައްކަތްކުރަމުންދާ އިރު، އެ ވެކްސިންގެ އެންމެ ފަހުގެ ދިރާސާތައް ދައްކާގޮތުން ވެކްސިނަކީ 91 އިންސައްތަ ރައްކާތެރި ވެކްސިނެކެވެ. ސްޕަޓްނިކް ވީ މިހާރު ގިނަ ގައުމުތަކަކުން ބޭނުން ކުރަމުން އަންނަ އިރު، ވެކްސިންގެ ތިން ވަނަ ފިޔަވަހީގެ ޓެސްޓުތަކުގެ ނަތީޖާ ނުލިބެނީސް އެ ވެކްސިން މީހުންގެ ގަޔަށް ޖަހަން ފެށުމުން އެގައުމުތަކަށް ފާޑު ކިޔުންތައް އަމާޒުވިއެވެ.
މި ވެކްސިން ރަޖިސްޓަރީކޮށް ބޭނުން ކުރަން އޮގަސްޓު މަހު ފަށާފައިވާއިރު ވެކްސިންގެ ފަހު ޓްރައިލް ސެޕްޓެމްބަރު މަހުގެ ފަހުކޮޅު ވަނީ ފަށާފައެވެ. އަދި މި ވެކްސިންގެ ފަހު ޓްރައިލްގައި 40،000 އަށް ވުރެ ގިނަ މީހުން ބައިވެރިވެފައިވާ ކަމަށް ރަޝިޔާ ސަރުކާރުން ބުނެއެވެ.
