މއ. މޯނިންގ ވިއުގައި ހިނގައި ދިޔަ އަލިފާނުގެ ހާދިސާއާ ގުޅިގެން 5 އާއިލާއެއް ވަގުތީ ހިޔާތަކަށް ބަދަލުކުރެވިފައިވާ ކަމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީން ބުނެފިއެވެ.

އެންޑީއެމްއޭގެ ޑެޕިއުޓީ ސީއީއޯ އުމަރު ފިކުރީ ވިދާޅުވި، ވަގުތީ ހިޔާއަށް ގެންދެވުނީ މއ. މޯނިންގ ވިއުގެ ހުޅަނގު ފަރާތުގެ އިމާރާތުގައި ދިރިއުޅޭ 5 އާއިލާއެއްގެ 32 މީހުން ކަމަަށެވެ. އޭގެ ތެރެއިން 3 މީހަކީ ކޮވިޑަށް ޕްޒިޓިވްވެފައިވާ މީހުން ކަމުން އެ 3 މީހުން މިހާރު ފެސިލިޓީއަށް ބަދަލު ކުރެވިފައިވާ ކަމަށް އުމަރު ވިދާޅުވިއެވެ. މި 5 އާއިލާ ގެ 32 މީހުންނަށް ވަގުތީ ހިޔާގެ ގޮތުގައި މާލޭގެ 7 ގެސްޓް ހައުސްއަކުން ކޮޓަރި ހަމަޖައްސައި، ހައިޖިން ޕެކްތައް ފޯރުކޮށްދީފައިވާ ކަމަށް ވިދާޅުވިއެވެ.

މިވަގުތަށް ބޭނުންވާ ޒަރޫރީ ސާމާނާއި ފައިސާގެ އެހީތެރިކަން ވެސް ފޯރުކޮށްދީފައިވާ ކަމަށް ވިދާޅުވިއެވެ. އެގޮތުން ކެއުމަށް ބޮލަކަށް 200 ރުފިޔާ އަދި ޒަރޫރީ ސާމާނާއި އަންނައުނު ހޯދުމަށް ބޮލަކަށް 1000 ރުފިޔާގެ މަގުން ފައިސާގެ އެހީތެރިކަން ފޯރުކޮށްދެވިފައިވާނެ ކަމަށް އުމަރު ވިދާޅުވިއެވެ.

އެއް ގޯއްޗެއްގައި ދެ އިމާރާތް ހުރި މިގޭގެ ހުޅަނގު ފަރާތުގެ އިމާރާތް ބޭނުން ނުކުރެވޭ ވަރަށް އަނދާފައިވާ ކަމަށާއި، އިރުމަތީ އިމާރާތުގައި ދިރިއުޅޭ މީހުން މިހާރު އެތަނަށް ބަދަލުވެފައިވާ ކަމަށެވެ. މި އިމާރާތައް ވެސް ލިބިފައި ހުރި ގެއްލުން ދެނެގަތުމަށް މަސައްކަތް ކުރައްވާނެ ކަމަށް ވިދާޅުވިއެވެ.

އުމަރު ވިދާޅުވީ، އަލިފާނުގެ ހާދިސާ ހިނގުމާއެކު އެ ގޭގައި އުޅޭ 56 މީހަކު ޣިޔާސުއްދީނަށް ވަގުތީ ގޮތުން ގެންދެވުނު ކަމަށާއި، އޭގެ ތެރޭގައި 17 ކުޑަކުދިން ވެސް ހިމެނޭ ކަމަށެވެ. 3 މީހަކަށް ފިހިގެން ހޮސްޕިޓަލުގައި ފަރުވާ ދެވުނު ނަމަވެސް ބޮޑު އަނިޔާއެއް ލިބިފައި ނުވާ ކަމަށް އުމަރު ވިދާޅުވިއެވެ.

އުމަރު ވިދާޅުވި އާދީއްތަ ދުވަހު ކަމާ ގުޅުންހުރި ފަރާތްތަކާއެކު އެ ގޭގެ އެސެސްމެންޓް ހަދަން ފަށާނެ ކަމަށެވެ. މައިގަނޑު ގޮތެއްގައި ދެ އެސެސްމެންޓެއް ހަދާނެ ކަމަށާއި، އެއީ، ހިފައި ގެންގުޅޭ ތަކެއްޗަށް ލިބުނު ގެއްލުމާއި، އިމާރާތަށް ލިބިފައިވާ ގެއްލުން ދެނެގަތުމަށް ހަދާ އެސެސްމެންޓް ކަމަށެވެ.