ލ ގަމު އިންޖީނު ގޭގައި އަލިފާނުގެ ހާދިސާއެއް ހިނގައިފި

ލ އަތޮޅު ގަމުގައި ހުންނަ އިންޖީނު ގޭގައި އަލިފާނުގެ ހާދިސާއެއް ހިނގައިގެން އެމްޑީއެފް އިން ހަރަކާތްތެރިވާން ފަށައިފި އެވެ.

މައުލޫމާތު ލިބޭ ގޮތުގައި ގަމުގައި ހުންނަ އިންޖީނު ގޭގައި އަލިފާނު ގެ ހާދިސާ ހިނގާފައިވަނީ ދާދި ދެންމެ ކަމަށް މައުލޫމާތު ލިބިފައިވެ އެވެ. މި ހާދިސާ ހިނގަން މެދުވެރިވި ސަބަބެއް އަދި ސާފެއް ނުވެ އެވެ. ނަމަވެސް އިންޖީނު ގޭގައި އަލިފާން ރޯވެފައިވަނީ ވަރަށް ބޮޑަށް ކަމަށް މައުލޫމާތުލިބެ އެވެ.

މުޅި ރަށުން ވަނީ ކަރަންޓް ގެ ޚިދުމަތް މެދުކެނޑިފަ އެވެ.

ރާއްޖެޓީވީ އަށް މައުލޫމާތު ދެމުން ގަމު ކައުންސިލްގެ ރައީސް އަޙްމަދު ޒަކީ ވިދާޅުވީ މިހާދިސާ ހިނގަން މެދުވެރި ސަބަބެއް ސާފެއް ނުވާ ކަމަށާއި މިހާދިސާ ހިނގާފައިވަނީ ބުދަ ދުވަހުގެ 2:45 އެހާކަންހާއިރު ކަމަށެވެ.

މިވަގުތު މުޅި ރަށުން ކަރަންޓްގެ ޙިދުމަތް މެދުކެނޑިފައިވާއިރު ކަރަންޓްގެ ޚިދުމަތް ދެވޭނެ ވަކި އިރެއް ދަންނަވަން ދަތި ކަމަށް ޒަކީ ވިދާޅުވި އެވެ.

މިއީ ލިބުނު ވަރަށް ބޮޑު ގެއްލުމެއް ކަން ފާހަގަކުރަމުން ޒަކީ ވިދާޅުވީ މަސައްކަތް ކުރަމުންދަނީ ވީހާވެސް އަވަހަކަށް ކަރަންޓްގެ ޙިދުމަތް ދެވޭތޯ ކަމަށެވެ.

ލ.ގަމު ފެނަކަ އިންޖީނު ގޭގައި ރޯވި އަލިފާން 15:50 އެހާކަންހާއިރު ވަނީ ނިއްވާލެވިފައި ކަމަށް ފުލުހުން މައުލޫމާތުދެ އެވެ.

މި ހާދިސާގައި އިންޖީނު ގޭގައި ބޭނުންކުރަމުންދިޔަ 1 ޖަނަރޭޓަރ ބޭނުން ނުކުރެވޭ ވަރަށް ގެއްލުންވެފަ އެވެ. މިހާދިސާގައި އެއްވެސް މީހަކަށް އަނިޔާވެފައި ނުވެ އެވެ.

މިހާދިސާ ފުލުހުން ދަނީ ތަހުގީގު ކުރަމުންނެ އެވެ.