އަމާޒަކީ ޓެކްނޮލޮޖީއާ އަރާ ހަމަކުރުން - ޝައުނާ
މަސައްކަތް ސަރުކާރުން ރެގިއުލޭޓް ކުރާނެ
އައިމިނަތު ޝައުނާ، އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީ މިނިސްޓަރ
އަމާޒަކީ ޓެކްނޮލިޖީއާ އަރާ ހަމަކުރުން ކަމަށް ޓެކްނޮލިޖީ މިނިސްޓަރ ވިދާޅުވެއްޖެއެވެ.
އިންޓަރނެޓްގެ އަގަށް ގެނެވުނު ބަދަލުތައް އިއުލާން ކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން އެންވަޔަރަންމެންޓް، ކްލައިމެޓް ޗޭންޖް އެންޑް ޓެކްނޮލޮޖީ މިނިސްޓަރ އާމިނަތު ޝައުނާ ވިދާޅުވީ، ސަރުކާރުގެ އަމާޒަކީ ޓެކްނޮލޮޖީއާ އަރާ ހަމަކޮށް، ސަރުކާރުގެ މަސައްކަތްތައް ވެސް އެެއްވިއުގައަކުން ގުޅާލުން ކަމަށެވެ. އަދި ސިއްޙީ ޚިދުމަތްތައް ވެސް އެއް ވިއުގައަކުން ގުޅާލެވިގެންދާނެ ކަމަށެވެ. ކޮވިޑްގެ މިހާލަަތުގައި ދަސްވި ކަމަކީ، ގޭގައި ތިބެގެން ވެސް އިންޓަރނެޓްގެ ޒަރިއްޔާއިން މަސައްކަތް ކުރެވިދާނެކަން ކަމުގައި ވިދާޅުވިއެވެ.
އިންޓަރނެޓް އަގުހެޔޮ ކުރުމުގެ ސިޔާސަތު ތަންފީޒު ކުރެވެން ފެށުމުން، ރާއްޖޭގައި ދޭ އިންޓަރނެޓް ޚިދުމަތުގެ ފެންވަރާއި އަގުތައް ސަރުކާރުގެ ކަމާބެހޭ އިދާރާއިން ގަވައިދުން ރެގިއުލޭޓް ކުރަމުންދާނެއެވެ. މިގޮތުން ރެގިއުލޭޓަރީ ފްރޭމްވަރކް ހަރުދަނާކުރެވި، ކޮމިއުނިކޭޝަން އޮތޯރިޓީ މެދުވެރިކޮށް އިންޓަރނެޓް ސްޕީޑް އަދި ކޮލިޓީ މޮނިޓަރިންގ ގެ މަސައްކަތްތަކެއް ފެށުމަށް ވެސް ވަނީ ހަމަޖެހިފައެވެ.
މިހާރު މި ގެނެވުނު ބަދަލުތަކުގެ އިތުރަށް ވެސް ޚިދުމަތް ހޯދާ ފަރާތްތަކަށް މިއަށްވުރެ އެކަށޭނަ އަގުތަކެއްގައި ޚިދުމަތް ފޯރުކޮށްދިނުމަށްޓަކައި ކުރިއަށް އޮތް 3 އަހަރުގެ ތެރޭގައި ކުރެވިދާނެ ކަންކަން ހޯދުމަށް ސަރވިސް ޕްރޮވައިޑަރުންނާއެކު ވަނީ އެއްބަސްވެފައެވެ.
އިންޓަރނެޓް މިވަނީ އާންމު ދިރިއުޅުމުގެ އެއްބަޔަށް ވެފައިވާއިރު އޮފީސް މަސައްކަތް، އޮންލައިން ކްލާސްތައް، ޑޮކްޓަރަށް ދެއްކުން ވެސް މިއަދު ކުރަނީ އިންޓަރނެޓް މެދުވެރިކޮށް ކަމަށް މިނިސްޓަރ ޝައުނާ ވިދާޅުވިއެވެ. ޚާއްޞަކޮށް ކޮވިޑް-19 ގެ ޕެންޑަމިކް ގެ ސަބަބުން އިންޓަރނެޓުގެ ޚިދުމަތަށް ބަރޯސާވާންޖެހޭ މިންވަރު ނިސްބަތުން އިތުރުވެފައިވާ ކަމަށާއި، އިންޓަރނެޓަކީ އަސާސީ ޚިދުމަތެއް ކަމަށް ބަލައި، ކޮންމެ ރައްޔިތަކަށް ވެސް ފަސޭހައިން، އެކަށީގެންވާ ފެންވަރެއްގައި އަދި ހެޔޮ އަގެއްގައި އިންޓަރނެޓް ލިބޭނެ ޕެކޭޖް ތައާރަފުކުރުމަށް ސަރުކާރުން އިސްކަންދެއްވާނެ ކަމަށް ވިދާޅުވިއެވެ.
މިނިސްޓަރ ވިދާޅުވީ، މިގެނެވުނު ބަދަލުތަކާއެކު އާދައިގެ މިންވަރަކަށް އިންޓަރނެޓް ބޭނުންކުރާ ފަރާތްތަކަށާއި، ސްކޫލް ކުދިންގެ ވީޑިއޯ ކޮންފަރެންސިންގ ފަދަ ބޭނުންތަކަށާއި، އައި. ސީ. ޓީ. ދާއިރާގައި މަސައްކަތްކުރާ ފަރާތްތަކަށް ވެސް، މިގެނެވޭ ބަދަލުތަކުގެ މަންފާލިބިގެންދާނެ ކަމަށެވެ. އަދި ޕެކޭޖްގެ ތްރޮޓްލް ސްޕީޑުގައި ވެސް ޢާއްމު ބޭނުންތަކަށް އެކަށޭނަ ސްޕީޑެއްގައި ކަމަށެވެ.
މިގެނެވުނު ހެޔޮ ބަދަލުތަކާއެކު ރައްޔިތުން އިންޓަރނެޓްގެ ބޭނުން ހެޔޮ ގޮތުގައި ބޭނުން ކުރާނެ ކަމަށް އުންމީދު ކުރައްވާ ކަމުގައި ވިދާޅުވިއެވެ. ޝައުނާ ވިދާޅުވީ، ރައްޔިތުން އެދޭ ބަދަލު ގެނެސްދެވޭނެ ކަމަށެވެ.
