ޔޫއޭއީ އިން ރާއްޖޭގެ ތަރައްޤީގައި އަދާކުރާ ރޯލަކީ އަގު ނުކުރެވޭފަދަ މުހިންމު ރޯލެއް: ޝައުނާ
ޔޫއޭއީ އާއި މެދު ރާއްޖެ އިން އަބަދުވެސް ގެންގުޅުނީ ޚާއްސަ އުސޫލުތަކެއް ކަމަށާއި ރާއްޖޭގެ ހިތުގައި އެ ގައުމާއި މެދު ޚާއްސަ ލޮތްބެއް އޮތް ކަމަށް ޝައުނާ ވިދާޅުވި
މިނިސްޓަރ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ
ޔުނައިޓެޑް އަރަބް އެމިރޭޓްސް (ޔޫއޭއީ) އިން ރާއްޖޭގެ ތަރައްޤީގައި އަދާކުރާ ރޯލަކީ އަގުނުކުރެވޭނެ ފަދަ މުހިންމު ދައުރެއް ކަމަށް މިނިސްޓަރ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވިދާޅުވެއްޖެއެވެ.
ޔޫއޭއީގެ 51 ވަނަ އަހަރީ ދުވަސް ފާހަގަ ކުރުމަށް ރާއްޖޭގައި ހުންނަ ޔޫއޭއީ އެމްބަސީ އިން ބޭއްވި ބައްދަލުވުމެއްގައި ވާހަކަދައްކަވަމުންނެވެ. ޔޫއޭއީއާ މެދު ރާއްޖެ އިން އަބަދުވެސް ގެންގުޅުނީ ޚާއްސަ އުސޫލުތަކެއް ކަމަށާއި ރާއްޖޭގެ ހިތުގައި އެ ގައުމާމެދު ޚާއްސަ ލޮތްބެއް އޮތް ކަމަށް ޝައުނާ ވިދާޅުވިއެވެ. ދެ ގައުމުގެ ވެރިންނާއި އިސް އެހެން ފަރާތްތަކުން ދެ ގައުމަށް ކުރާ ދަތުރުތަކުން އެކަން ފާހަގަވާނެ ކަމަށް ވެސް ޝައުނާ ވިދާޅުވިއެވެ. ޝައުނާ ވިދާޅުވީ ދެ ގައުމުގެ ގުޅުން އިތުރަށް ބަދަހިކުރުމަށް މަސައްކަތްކުރުމުގެ އުންމީދުގައި ދެ ގައުމުގެ ލީޑަރުން ތިބީ އެކުގައި މަސައްކަތްކުރަން ތައްުޔާރަށް ކަމަށެވެ.
މީގެ އިތުރުން، މިދިޔަ ގަރުނެއްހާ ދުވަސް ތެރޭގައި ޔޫއެއީ އިން ހޯދާފައިވާ ކުރިއެރުންތަކަކީ ނަމޫނާ އެއް ކަަމަށް ފާހަގަކުރައްވާ ޝައުނާ ވަނީ އެ ގައުމުގެ ލީޑަރޝިޕަށް ތައުރީފްކުރައްވާފައެވެ. ޔޫއޭއީ އަކީ ކުރިއެރުމާއި އިގްތިސާދީ ގޮތުން އަދި އިއާދަކުރުވަނިވި ހަކަތަ ކުރިއެރުވުމުގައި ވެސް ނަމޫނާ ޤައުމެއް ކަމަށް އޭނާ ވަނީ ފާހަގަކުރައްވާފައެވެ. އަދި ކުރު މުއްދަތެއްގެ ތެރޭގައި އެ ގައުމު ހޯދި ކާމިޔާބީތަކަކީ ފާހަގަކުރެވޭ ފަދަ މަސައްކަތްތަކެއް ކަމަށް ޝައުނާ ވަނީ ވިދާޅުވެފައެވެ.
އިތުރަށް ވާހަކަދައްކަވަމުން، މި އަހަރަކީ ޔޫއޭއީ އަށް ހިތާމަވެރި އަހަރެއް ކަމަށާއި އެ ގައުމުގެ ކުރީގެ ރައީސް ޝެއިޚް ޚަލީފާ ބިން ޒައިދު އަލް ނަހްޔާން އަވަހާރަވުމަކީ އެ ގައުމަށް ފުން ހިތާމައެއް ލިބުނު ކަމެއް ކަމަށް ޝައުނާ ފާހަގަކުރެއްވިއެވެ. އެހެންނަމަވެސް ޔުނައިޓެޑް އަރަބް އެމިރޭޓްސްގެ އައު ރައީސް، އަބޫދާބީގެ ވެރިޔާ އަދި ޔޫއޭއީގެ އާމްޑް ފޯސަސްގެ ސްޕްރީމް ކޮމާންޑަރު ޝެއިޚް މުހައްމަދު ބިން ޒާއިދު އާލް ނަހްޔާންގެ ލީޑަރޝިޕްގައި އެ ގައުމަށް ކުރިއެރުން ލިބިދާނެ ކަމާއި މެދު ޝައްކު ނުކުރައްވާ ކަމަށް ޝައުނާ ވަނީ ވިދާޅުވެފައެވެ.
