ރާއްޖޭގެ މުރަކަތަކާއި ގުޅޭގޮތުން ހޯދުނު ހޯދުންތަކުން ފަރުތައް ސަލާމަތްކުރުމަށް އަވަސް ފިޔަވަޅުތައް އަޅަންޖެހޭކަން ހާމަވެފައިވާކަމަށް މިނިސްޓަރ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވިދާޅުވެއްޖެއެވެ.

ރާއްޖޭގެ ފަރުތަކާއި ގުޅޭގޮތުން ކުރި ދިރާސާގެ ހޯދުންތައް ޢާއްމުކުރުމަށް ބޭއްވި "ޕަބްލިޝް ރެޑް ލިސްޓް ކޮރަލް އެސެސްމަންޓް" ރަސްމިއްޔާތުގައި ވާހަކަފުޅުދައްކަވަމުން ޝައުނާ ވިދާޅުވީ 39 ބާވަތެއްގެ ތެރެއިން ލިބިފައިވާ ނަތީޖާތަކަށް ބަލާއިރު މުރަކަތައް ސަލާމަތްކުރަން އަވަސް ފިޔަވަޅުތަކެއް އަޅަންޖެހޭ ކަމަށެވެ.

އެގޮތުން 23 ބާވަތަކީ ކްރިޓިކަލީ އެންޑޭންޖާޑް، 6 އެންޑޭންޖާޑް، 7 ވަލްނަރަބަލް އަދި 3 ބާވަތެއް ނުރައްކަލަށް ހުށަހެޅިފައިވާ ބާވަތްތައް ކަމަށް ބެލެވިފައިވާ ކަމަށާއި މީގެ ނަތީޖާއިން އެނގިފައިވަނީ 36 ބާވަތް ގެއްލުމުގެ ނުރައްކަލުގައިވާކަން ކަމަށް ވެސް ވިދާޅުވިއެވެ. މިއީ އުފާވެރި ޚަބަރެއް ނޫން ނަމަވެސް، އުއްމީދު ކަނޑައިނުލާ މުސްތަޤަބަލަށްޓަކައި، މި ބާވަތްތައް ހިމާޔަތްކުރުމުގެ މަސަކަތްތައް އަދި ކޮންޒަވޭޝަން ޕްލޭނިންގް ކުރިއަށް ގެންދިޔުމަކީ ވަރަށް މުހިއްމު ކަމެއް ކަމަށް ވިދާޅުވިއެވެ.

ރާއްޖޭގައި މުރަކަތައް ނެތިދިއުމުގެ ނުރައްކާ ދެނެގަތުމަކީ ވަރަށް މުހިންމު ކަމެކެވެ. މުރަކަތަކުގެ މުހިއްމުކަމާއި ރާއްޖެއަކީ ދުނިޔޭގެ ބަޔޯޑައިވަރސިޓީއަށް އެންމެ ބޮޑަށް ބަރޯސާވެފައިވާ އެއް ޤައުމަށްވެފައި އަދި މުރަކައަކީ އަޅުގަނޑުމެންގެ އިޤްތިޞާދަށް، ޚާއްޞަކޮށް ފަތުރުވެރިކަމާއި މަސްވެރިކަމުގެ ދާއިރާއަށް ވަރަށް މުހިންމު ވަސީލަތެއްކަން މިނިސްޓަރ ވަނީ ހާމަކުރައްވާފައެވެ.

ހަމައެއާއެކު، ކޮރަލް ރީފް އިކޯސިސްޓަމަކީ ދިވެހިންގެ ދުޅަހެޔޮކަމަށް ވަރަށް މުހިންމު ދައުރެއް އަދާކުރާ އެއްޗެއް ކަމަށާއި އެއީ ރާއްޖޭގެ ކްލައިމެޓް ރެގިއުލޭޝަން، ސްޓޯމް ބަފަރިންގ، ގޮނޑުދޮށް ޙިމާޔަތްކުރުމުގެ އިތުރުން، ތިމާވެށީގެ ނިޒާމުގެ އެހެނިހެން ގިނަ ޚިދުމަތްތަކުގައި އިންސާނުންނަށް ވަޒަންވެރިކުރުވުމުގައި މުހިންމު ދައުރެއް އަދާކުރާ އެއްޗެއް ކަމަށް ވެސް ވިދާޅުވިއެވެ. އަޅުގަނޑުމެންގެ ކުދި ޖަޒީރާ ރަށްވެހިންނަށް، މުރަކަ ފަރުތަކަކީ، ތޫފާން، ސުނާމީ، އަދި ގޮނޑުދޮށް ގިރުން ފަދަ ގުދުރަތީ ކާރިސާތަކުން ދިފާއުވުމުގެ ފުރަތަމަ ސަފު، އެއީ ރާއްޖޭގެ މޫސުމަށް އަންނަ ބަދަލުތަކުގެ ސަބަބުން ތިމާވެއްޓަށް ކުރާ ނޭދެވޭ އަސަރުތަކަށް އިކޯސިސްޓަމް ބޭސްޑް އެޑަޕްޓޭޝަންގެ މުހިންމު ބައެކެވެ.

މި ރަސްމިއްޔާތުގައި ވަނީ ނެތިދިއުމުގެ ބިރުހީވެފައިވާ ބާވަތްތައް ދެނެގަތުމަށް ބޭނުންވާ ތަމްރީން ދިނުމަށް ހިންގި ރެޑް ލިސްޓް ޓްރައިނިންގގައި ބައިވެރިވި ފަރާތްތަކުގެ ތެރެއިން 13 ފަރާތަކަށް ތަމްރީން ފުރިހަމަކުރި ކަމުގެ ސެޓްފިކެޓް ޙަވާލުކޮށްފައެވެ.

ތިމާވެށި ޙިމާޔަތްކުރުމުގެ ޤާނޫނުގެ ދަށުން ޙިމާޔަތްކޮށްފައިވާ 79 ސަރަޙައްދުގެ ތެރެއިން 13 ސަރަޙައްދަކީ ފަރުތަކުގެ ސަރަޙައްދުތައް ކަމަށާއި މުރަކަތައް ރައްކާކުރުމަށް ކުރަމުންދާ މަސައްކަތުގެ ދަށުން މުރަކަ ދިރުވާ އާލާކުރުމުގެ މަސައްކަތްވެސް ކުރަމުން އަންނަ ކަމަށް އެންވަޔަރަމަންޓް މިނިސްޓްރީން ބުންޏެވެ. ތިމާވެށި ޙިމާޔަތްކުރުމަށް ޤައުމީ ފެންވަރުގައި މަސައްކަތް ކުރަމުންދާއިރު، ރާއްޖެ އަކީ މޫސުމީ ބަދަލުތަކާއި ދެކޮޅަށް ބައިނަލްއަޤުވާމީ ޕްލެޓްފޯމްތަކުގައި އެންމެ ބޮޑަށް ވަކާލާތުކުރާ އެއް ޤައުމެވެ.

މިނިސްޓަރ ޝައުނާ ވަނީ ރާއްޖޭގައި މަސައްކަތްކުރާ ހުރިހާ ޖަމިއްޔާތަކަށް ރާއްޖޭގެ ހުރިހާ ރައްޔިތުންނަށްވެސް ފަރުތައް ރައްކާތެރިކުރުމަށް މަސައްކަތް ކޮށްދެއްވުމަށް ގޮވާލައްވާފައެވެ.