ލީގު ހޯދައިދިނުމަށް ފަހު ކޮންޓޭ އިންޓަ ދޫކޮށްލައިފި

އިޓާލިއަން ލީގުގެ ޗެމްޕިއަންކަން އިންޓަ މިލާނަށް ހޯދައިދިނުމަށް ފަހު އެ ޓީމުގެ ކޯޗުކަން ދޫކޮށްލަން އެންޓޯނިއޯ ކޮންޓޭ ނިންމައިފިއެވެ.

މި ސީޒަނުގެ ލީގު ޗެމްޕިއަންކަން އިންޓައިން ހޯދިއިރު، މިއީ މިދިޔަ 11 އަހަރު ތެރޭ އެ ޓީމުން ލީގު ހޯދި ފުރަތަމަ ފަހަރެވެ. އަދި މިއީ އިންޓައިން އެ ކުލަބުގެ ތާރީޚުގައި ލީގު ކާމިޔާބުކުރި 19 ވަނަ ފަހަރެވެ. މި ސީޒަނުގެ ކުރިން އިންޓައިން އެންމެ ފަހުން ލީގު ކާމިޔާބުކޮށްފައިވަނީ 2009-2010 ވަނަ އަހަރުގެ ސީޒަނުގައި، ޖޯސޭ މޮރީނިއޯގެ އިރުޝާދުގެ ދަށުންނެވެ.

އަދި މި ފަހަރުގެ ލީގުގެ ޗެމްޕިއަންކަން އިންޓައިން ހޯދިއިރު، މިއީ ފާއިތުވި 10 އަހަރު ތެރޭ ޔުވެންޓަސް އަތުން ލީގު ގެއްލުނު ފުރަތަމަ ފަހަރެވެ. އެގޮތުން ޔުވެންޓަސް ނޫން ޓީމަކުން އެންމެ ފަހުން އިޓާލިއަން ލީގުގެ ތަށި އުފުލާލީ 2010-2011 ވަނަ އަހަރުގެ ސީޒަނުގައި އޭސީ މިލާނުންނެވެ.

އެކަމަކު ލީގު ހޯދުމަށްފަހު ކުއްލި ގޮތަކަށް ކޮންޓޭ ވަނީ އެ ޓީމުގެ އެއްބަސްވުން އުވާލަން އެދިފައެވެ. އެއާއެކު ބުދަ ދުވަހުގެރޭ އިންޓައިން ވަނީ ދެ ފަރާތް އެއްބަސްވެގެން ކޮންޓޭގެ އެއްބަސްވުން އުވާލަން ނިންމާފައިވާކަން އިއުލާން ކޮށްފައެވެ. ރިޕޯޓުތައް ބުނާ ގޮތުން އެއްބަސްވުން އުވާލުމާއެކު އިންޓައިން ކޮންޓޭއަށް ހަތް މިލިޔަން ޔޫރޯ ދައްކަން ޖެހޭނެއެވެ.

ކުއްލި ގޮތަކަށް އިންޓަ ދޫކޮށްލަން ކޮންޓޭ ނިންމީ އެ ޓީމުގެ ދަރަނިތައް ކުޑަކުރުމުގެ ގޮތުން 80 މިލިޔަން ޔޫރޯއަށް ވާ ވަރަށް ކުޅުންތެރިން ވިއްކާލަން އެ ޓީމުގެ ވެރިން ނިންމުމާ ގުޅިގެން ކަމަށް ރިޕޯޓުތައް ބުނެއެވެ. އޭގެ ތެރޭގައި ރޮމެލޫ ލުކާކޫ، އަޝްރަފް ހަކީމީ، ނިކޯލޯ ބަރެއްލާ، ލަޓާރޯ މާޓިނޭޒް އަދި މިލާން ސްކްރިނިއޭ ހިމެނޭ ކަމަށްވެސް ރިޕޯޓުތައް ބުނެއެވެ.

މި ސީޒަނަށްފަހު ކޮންޓޭ އިންޓަ ދޫކޮށްލިއިރު، އޭނާ އެ ޓީމުގެ ކޯޗުކަމާ ހަވާލުވީ 2019 ވަނަ އަހަރުއެވެ. ރިޕޯޓުތައް ބުނާގޮތުން ކޮންޓޭގެ ބަދަލުގައި އިންޓައިން ގެންނަން މަސައްކަތްކުރަނީ ލާޒިއޯގެ ކޯޗު ސިމޯން އިންޒާގީ ނުވަތަ ކުރިން ޔުވެންޓަސް އާއި އޭސީ މިލާނަށް ކޯޗުކޮށްދިން މެސިމިލިއާނޯ އަލެގްރީއެވެ.