ގާޒާ އާރާސްތުކުރުމަށް ލިބޭ އެހީ ހަމާސްއިން ބޭނުމެއް ނުކުރާނެ

އިސްރާއީލް ސިފައިންނާއި ފަލަސްތީނުގެ ހަނގުރާމަވެރި ޖަމާއަތްތަކާ ދެމެދު 11 ދުވަސްވަންދެން ކުރިޔަށް ދިޔަ ހަނގުރާމައިގައި ގާޒާއަށް ލިބިފައިވާ ގެއްލުންތައް އާރާސްތުކުރުމަށް ބައިނަލްއަގްވާމީ ގޮތުން ލިބެމުންދާ އެހީތެރިކަމުގެ އެންމެ ސެންޓެއްގެ މިންވަރުވެސް ގާޒާގައި ވެރިކަން ކުރަމުން އަންނަ ހަމާސްއިން ބޭނުން ނުކުރާނެ ކަމަށް އެޖަމާއަތުން ބުނެފިއެވެ.

ހަމާސް ޖަމާއަތުގެ ސިޔާސީ ގޮފިން ގާޒާއަށް ކަނޑައަޅުއްވާފައި ހުންނަ ވެރިޔާ ޔަހްޔާ ސިންވަރު ވަނީ ގާޒާ އާރާސްތުކުރުމަށް ލިބެމުންދާ އެހީތެރިކަން ބޭނުންކުރަމުންދާނީ ދެފުށް ފެންނަގޮތަށް އެއްވެސް ފަރާތެއް އިސްތިސްނާ ކުރުމެއްނެތި ހަމަހަމަކަމާއެކު ކަމަށް ވައުދުވެ ވަަޑައިގެންފައެވެ. ފަލަސްތީނުގެ ހަނގުރާމަވެރި ޖަމާއަތްތަކާއި އިސްރާއީލާއި ދެމެދު ކުރިޔަށްދިޔަ ހަނގުރާމަ ހުއްޓާލާ ހަމަލާ ބަދަލުކުރަން ހުއްޓާލަން ދެ ފަރާތުން އެއްބަސްވިފަހުން ހަ ދުވަސް މިހާރު ވަނީ ވެފައެވެ. މިހަނގުރާމައިގައި އިސްރާއީލުން ވަނީ ގާޒާގެ ބޮޑު ސަރަހައްދަކަށް ބޮން އަޅާ އިމާރާތްތައް ބިމާ ހަމަކޮށްލާފައެވެ.

ސިންވަރު ވިދާޅުވީ ބައިނަލްއަގްވާމީ ގޮތުންނާއި އަރަބި ދުނިޔެއިން ގާޒާ އާރާސްތުކުރުމަށް ލިބޭ ކޮންމެ އެހީއަކަށް އެޖަމާއަތުން މަރުހަބާ ކިޔާކަމަށެވެ.

ސިންވަރު މިމޭރުމުން ވާހަކަދައްކަވާފައި ވަނީ ގާޒާ އާރާސްތުކުރުމަށް އެމެރިކާއިން އެހީތެރިކަން ދޭނެކަމަށް އެމެރިކާގެ ސެކެޓްރީ އޮފް ސްޓޭޓް އެންތަނީ ބްލިންކެން ވިދާޅުވެފައިވަނިކޮށެވެ. ބްލިންކެން ވިދާޅުވެފައިވަނީ އެމެރިކާއިން ދޭ އެހީތެރިކަން ހަމާސްގެ ބޭނުންތަކަށް ބޭނުންކޮށްގެން ނުވާނެކަމަށެވެ.

އެހެންކަމުން އެމެރިކާއިން މަސައްކަތްކުރަމުން އަންނަނީ ރާމަﷲ ގައި ވެރިކަން ކުރަމުން އަންނަ ފަލަސްތީން އޮތޯރިޓީ (ޕީއޭ) އާ ގުޅިގެން ގާޒާ އާރާސްތުކުރުމުގެ މަސައްކަތް ކުރަމުން ދިޔުމަށެވެ. އެމެރިކާ އާއި ޔޫރަޕިއަން ޔޫނިއަންގެ ގައުމުތަކުން ގަބޫލުކުރާ ގޮތުގައި ހަމާސް އަކީ ޓެރަރިސްޓް ޖަމާއަތެކެވެ. އެހެންކަމުން ހަމާސް ޖަމާއަތް ބާރުގަދަވެގެންދާނެ އެއްވެސް ކަމެއް ކުރާކަށް އެމެރިކާއިން ބޭނުމެއްނުވެއެވެ. އަދި ގާޒާ އާރާސްތުކުރުމަށް ދޭ އެހީތެރިކަން ހަމާސް ޖަމާއަތަށް ލިބި އެޖަމާއަތް ބާރުގަދަ ކުރުމުގެ ވަސީލަތަކަށް އެކަން ވާކަށް އެމެރިކާ ބޭނުމެއްނުވެއެވެ.

ސިންވަރު ވިދާޅުވީ ބްލިންކެން އެމޭރުމުން ވާހަކަދެއްކެވީ ފަލަސްތީނުގައި އުފެދިފައިވާ އެކި ޖަމާއަތްތަކުގެ މެދުގައި އުފެދިފައިވާ ވާދަވެރިކަން ބޮޑުކޮށް އެފަރާތްތަކުގެ މެދުގައި ހަމަނުޖެހުން އުފެއްދުމަށެވެ. ނަމަވެސް އެފަދަ ކަމެއްގެ ތެރެއަށް ހަމާސް އިން ނުވަންނާނެކަމަށާއި ގުޅިގެން މަސައްކަތްކުރާނެ ކަމަށް ސިންވަރު ވިދާޅުވިއެވެ.

އަނެއްކޮޅުން އިނގިރޭސިވިލާތުގެ ފޮރިން ސެކެޓްރީ ޑޮމިނިކް ރާބް ވެސް ވަނީ ފަލަސްތީނަށް އެހީތެރިވުމުގެ ގޮތުން 4.5 މިލިއަން ޑޮލަރު އދގެ ރިލީފް މަސައްކަތްކުރާ އެޖެންސީތަކަށް ދޭނެ ކަމަށް ވައުދުވެ ވަޑައިގެންފައެވެ. ޔޫރަޕިއަން ކޮމިޝަނުންވެސް ވަނީ 9.8 މިލިއަން ޑޮލަރު ފަލަސްތީނު އާރާސްތުކުރުމަށް ދޭނެކަމަށް ބުނެފައެވެ.

11 ދުވަސްވަންދެން އެއްގަމާއި ކަނޑާއި ވައިގެ މަގުން އިސްރާއީލްގެ ސިފައިން ގާޒާއަށް ބޮން އެޅުމުގެ ސަބަބުން 254 މީހަކު ވަނީ ޝަހީދުވެފައެވެ. އޭގެތެރޭގައި 66 ކުޑަކުދިން ހިމެނެއެވެ.