ޣައްޒާ އާރާސްތުކުރުމަށް މިސްރާއެކު ގާތުން މަސައްކަތް ކުރާނަން -ބްލިންކެން-

ޣައްޒާ އާރާސްތުކުރުމަށް މިސްރާއެކު ގާތުން މަސައްކަތް ކުރައްވާނެ ކަމަށް އެމެރިކާގެ ސެކްރެޓަރީ އޮފް ސްޓޭޓް އެންޓޮނީ ބްލިންކެން ވިދާޅުވެއްޖެއެވެ.

މެދުއިރުމަައްޗަށް ކުރައްވަމުން ގެންދަވާ ދަތުރުފުޅުގައި މިސްރަށް ވަޑައިގެން މިސްރުގެ ރައީސް ޢަބްދުލް ފައްތާޙް އަލްސީސީ އާ ބައްދަލުކުރައްވައި ދެއްކެވި ވާހަކަފުޅުގައި ބްލިންކަން ވިދާޅުވީ، އިސްރާއީލާ ފަލަސްތީނުގެ ހަމަ ނުޖެހުން ހުއްޓުމަކަށް ގެނައުމަށް މިސްރަކީ އެމެރިކާގެ މުހިއްމު ބައިވެރިއެއްކަމަށާއި، ދެ ގައުމު ގުޅިގެން ފައިދާ ހުރި މުހިއްމު ކަންތައްތަކެއް ކުރެވިދާނެ ކަމަށެވެ. އަދި ފަލަސްތީނާ އިސްރާއީލްގެ ރައްޔިތުންނަށްވެސް ހަމަހަމަ ފުރުސަތު ފަހި ކޮށްދިނުމަށް ދެ ގައުމު ގުޅިގެން މަސައްކަތްތަކެއް ކުރެވިދާނެ ކަމަށެވެ.

ބްލިންކެން މެދުއިރުމައްޗަށް ކުރައްވާ ދެ ދުވަހުގެ މި ދަތުރުފުޅުގައި ފުރަތަމަ ވަޑައިގަތީ އިސްރާއީލަށެވެ. އެއަށްފަހު ރާމަﷲއަށް ވަޑައިގެން މަޙްމޫދު ޢައްބާސާ ބައްދަލު ކުރެއްވިއެވެ. މިސްރަށް ވަޑައިގަތުމަށްފަހު އޭނާ ދެން ވަޑައިގެންނެވީ އުރުދުނަށެވެ.

ޣައްޒާގެ އިގުތިސާދު ނަގާ ކޮޅަށް ޖެހުމަށް އެހީގެ ގޮތުގައި 75 މިލިއަން ޑޮލަރު ދިނުމަށްވަނީ ނިންމާފައެވެ. އަދި ކުއްލި އެހީގެ ގޮތުގައި 5.5 މިލިއަން ޑޮލަރާއި، ޔޫއެންއިން ފަލަސްތީނުގައި ހިންގަމުން އަންނަ ތަންތަނަށް 32 މިލިއަން ޑޮލަރުގެ އެހީއެއް ދިނުމަށްވަނީ ނިންމާފައެވެ.

ބްލިންކެން ވިދާޅުވީ ހަމަލާ ބަދަލު ކުރުން ހުއްޓާލުމަށް ތާއީދުކުރާ ކަމަށާއި، އެގޮތަށް އެކަން ދެމެހެއްޓުމަށް އެދޭ ކަމަށެވެ.

11 ދުވަހުގެ ހަމަލާ ބަދަލުކުރުމުގައި ޣައްޒާއިންް 254 މީހުން ޝަހީދުވިއެވެ. އޭގެ ތެރޭގައި 66 ކުޑަކުދިންވެސް ހިމެނެއެވެ.