ކޮވިޑް-19 ޖެހިގެން ބުދަ ދުވަހު ތިން ވަނަ މީހާ ނިޔާވެ ޖުމްލަ އަދަދު 147ށް އަރައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ ނިޔާވެފައިވަނީ އުމުރުން 77 އަހަރުގެ ދިވެހި ފިރިހެނެއްކަމަށެވެ. މިމީހާ ނިޔާވެފައިވަނީ ހުޅުމާލެ މެޑިކަލް ފެސިިިލިޓީގައި ފަރުވާދެމުން އަންނަނިކޮށް މިރޭ 7:21ގަ އެވެ.

މިއާއެކު ރާއްޖޭގައި ކޮވިޑް ޖެހިގެން ނިޔާވި މީހުންގެ އަދަދު ވަނީ 147ށް އަރާފައެވެ.

ބުދަ ދުވަހު އެންމެ ފުރަތަމަ ނިޔާވެފައިވަނީ އުމުރުން 91 އަހަރުގެ ދިވެހި ފިރިހެނެކެވެ. އެއީ ބުދަ ދުވަހުގެ ހެނދުނު 10:20ގައެވެ. އެމީހާ ނިޔާވެފައިވަނީ އައްޑޫ ކޮވިޑް ފެސިލިޓީގައެވެ.

ދެން ނިޔާވީ އުމުރުން 61 އަހަރުގެ ދިވެހި ފިރިހެނެކެވެ. އެމީހާ ނިޔާވީ ބުދަ ދުވަހުގެ މެންދުރު 02:35 ގައި ހުޅުމާލެ މެޑިކަލް ފެސިލިޓީގައެވެ.

ރާއްޖޭގައި ފެންނަ ކޮވިޑުގެ ކޭސްތަކުގެ އަދަދު އިތުރުވެފައިވާއިރު ވައިރަސް ޖެހިގެން ނިޔާވާ މީހުންގެ އަދަދު ވެސް އަންނަނީ އިތުރުވަމުންނެވެ. އެގޮތުން ހޯމަ ދުވަހު ޖުމްލަ 13 މީހަކު ވަނީ ނިޔާވެފައެވެ. މިއީ ވައިރަސް ޖެހިގެން އެއްދުވަހާ އެހާ ގިނަ އަދަދެއްގެ މީހުން ނިޔާވި ފުރަތަމަ ދުވަހެވެ.