އިންޑިއާ ނޫން އެހެން ޤައުމުތަކަށް ލަންކާއިން ލުއިދެނީ

ކޮވިޑް 19ން ރައްކާތެރިވުމުގެ ގޮތުން ލަންކާއިން އަޅާފައިވާ ފިޔަވަޅުތަކަށް އިންޑިއާ ފިޔަވައި އެހެން ގައުމުތަކަށް ލުއި ދޭނެކަން ލަންކާއިން އިއުލާންކޮށްފިއެވެ.

ލަންކާއިން މި ލުއި ދޭނީ، 21 މެއި ވީ ހުކުރު ދުވަހުގެ ރޭ 11:59ން ފެށިގެން 31 މެއި ވާ ހޯމަ ދުވަހުގެ ރޭ 11:59ގެ ނިޔަލަށް އަޅައިފައިވާ ފިޔަވަޅުތަކުގެ މުއްދަތު ހަމަވުމުން ޖޫން 1ން ފަށައިގެންނެވެ. ބަލި ފެތުރުމުގެ ފުރުސަތު ކުޑަކުރުމަށް އެ ގައުމުން އަޅާފައިވާ އެންމެ މުހިންމު ފިޔަވަޅަކީ ކަރަންޓީންވާ އުސޫލަށް ގެނައި ބަދަލުތަކެވެ. މިހާރު ނިންމާފައިވާ ނިންމުމުގެ ދަށުން މި މަހުގެ 31 ވަނަ ދުވަހުގެ ނިޔަލަށް އެ ގައުމަށް ދަތުރުކުރާ ހުރިހާ އެންމެން 14 ދުވަހުގެ ކަރަންޓީން މުއްދަތެއް ފުރިހަމަކުރަން ޖެހޭނެއެވެ. ކަރަންޓީންވާން ޖެހޭނީ ލަންކާ ސަރުކާރުން ކަނޑައަޅާ ކަރަންޓީން ހޮޓަލެއް ނުވަތަ ސެންޓަރެއް ނުވަތަ ރައްކާތެރިކަމަށް ކަނޑައަޅާފައިވާ ލެވެލް 1ގެ ހޮޓަލެއްގައެވެ. އެ ގައުމަށް ދަތުރުކުރާ 12 އަހަރުން މަތީގެ ހުރިހާ ކުދިންނާއި މީހުން 14 ދުވަހުގެ ކަރަންޓީނު ފުރިހަމަކުރުމަށްފަހު ދޫކުރެވޭނީ، އެ ގައުމަށް ދަތުރުކުރާ ފުރަތަމަ ދުވަހު ހަދާ "އޮން އެރައިވަލް ޕީސީއާރް" ޓެސްޓާއި، ކަރަންޓީނުގެ 11 ވަނަ ދުވަހާއި 14 ނަ ދުވަހާ ދެމެދު ހަދާ "އެގްޒިޓް ޕީސީއާރް" ޓެސްޓުގެ ނަތީޖާ ނެގެޓިވް ވުމުން ކަމަށް ވަނީ އަންގާފައެވެ.

އެރައިވަލް އަދި އެގްޒިޓް ޕީސީއާރް ހަދަން ނުޖެހޭނީ ދެ އަހަރުން ދަށުގެ ކުދިންނަށް އެކަންޏެވެ. ކަރަންޓީން ކުރުމުގެ އުސޫލަށް މިގޮތަށް ބަދަލު ގެނެސްފައިވީނަމަވެސް، ކްރިޓިކަލް ފަރުވާއަށް ގޮސް ހޮސްޕިޓަލުގައި ކަރަންޓީންވާން އެދޭ މީހުން، ހޮސްޕިޓަލާއި ސްރީލަންކާގެ ހެލްތް މިނިސްޓްރީގެ ޚާއްސަ ހުއްދައިގެ ދަށުން، ބޭސްފަރުވާއަށް ދަތުރުކުރުމުގެ ފުރުސަތު ކުރިއެކޭ އެއްގޮތަށް މި މުއްދަތުގައި ވެސް ފަހިވެފައި އޮންނާނެ ކަމަށް ފޮރިން މިނިސްޓްރީން ބުނެއެވެ. އެހެންކަމުން ސްރީލަންކާއަށް ދަތުރުކުރާ ދިވެހިން މިކަމަށް ސަމާލުކަން ދިނުމަށް މިނިސްޓްރިންވަނީ އެދިފައެވެ. މި ފިޔަވަޅުތަކަށް ބަދަލު އައުން އެކަށީގެންވުމާއެކު، ދަތުރުކުރުމުގެ ކުރިން މައުލޫމާތު ސާފުކުރުމަށް ވެސް އިލްތިމާސްކޮށްފައިވެއެވެ.

ލަންކާއަކީ ތައުލީމު ހާސިލުކުރުމަށާއި އެކި ބޭނުންތަކުގައި ގިނަ އަދަދަކަށް ދިވެހިން ދިރިއުޅެމުން އަންނަ ގައުމެކެވެ. ލަންކާގައި ކޮވިޑް ކޭސްތައް 13،0000ށް އަރާފައިވާއިރު، މަރުވި މީހުންގެ އަދަދު 800ން މައްޗަށް ވަނީ އަރާފައެވެ. ލަންކާގެ ހާލަތު ގޯސްވާން ފަށާފައިވަނީ އިންޑިއާގައި މިހާރު ފެތުރެމުންދާ ކޮވިޑުގެ ވޭރިއެންޓް ލަންކާގައި ވެސް ފެތުރެން ފެށުމާއެކުއެވެ. ލަންކާގެ އިތުރުން ވެސް 17 ގައުމެއްގައި މި ވޭރިއެންޓް އުޅޭކަމަށް ދުނިޔޭގެ ސިއްޙަތު ޖަމުޢިއްޔާއިން ހާމަކޮށްފައިވާއިރު، އިންޑިއާގައި މިހާރު ފެތުރެމުންދާ ވޭރިއެންޓަކީ "ވޭރިއެންޓް އޮފް ކޮންސަރން" އެއް ކަމަށް އެ ޖަމުޢިއްޔާއިން ވަނީ ކަނޑައަޅާފައެވެ.