ޕާކިސްތާންގެ ނުރައްކާ ލިސްޓަށް ރާއްޖެ

ޕާކިސްތާންގެ ނުރައްކާ ލިސްޓުގައި ރާއްޖެ ހިމެނި، ދަތުރުކުރުން މަނާކޮށްފިއެވެ.

ރާއްޖެއަށް ޒިޔާރަތްކޮށްފައިވާ މީހުން ޕާކިސްތާނަށް އެތެރެވުން މަނާކޮށްފައިވާކަން ރާއްޖޭގެ ޓުއަރިޒަމް މިނިސްޓްރީއިން ވަނީ ކަށަވަރުކޮށްދީފައެވެ. ޓޫރިޒަމް މިނިސްޓްރީން ނެރުނު ސަރކިއުލަރއެއްގައި ބުނެފައިވަނީ ޕާކިސްތާންގެ ކެޓަގަރީ 'ސީ'ގެ ލިސްޓުގައި ރާއްޖެ ހިމެނާފައިވާކަން ރާއްޖޭގައި ހުންނަ ޕާކިސްތާން ހައި ކޮމިޝަނުން އަންގާފައިވާކަމަށެވެ. އަދި ކެޓަގަރީ 'ސީ'ގައި ހިމެނޭ ޤައުމުތަކުން ޕާކިސްތާނަށް އެތެރެވުން މަނާވާނެ ކަމަށާއި، އެހެންކަމުން ރާއްޖޭގެ ޓޫރިޒަމް ފެސިލިޓީތަކުން މިކަމަށް ސަމާލުވުމަށް ޓޫރިޒަމް މިނިސްޓްރީން ވަނީ އެދިފައެވެ.

ކޮވިޑް-19އިން ރައްކާތެރިވުމަށް ޕާކިސްތާނުގައި ވަނީ ރައްކާތެރިކަމުގެ ފިޔަވަޅުތައް ވަރުގަދަކޮށްފައެވެ. އެގޮތުން މިފަހުން ވަނީ ކެޓަގަރީ 'ސީ'ގެ ލިސްޓަށް 15 ޤައުމެއް އިތުރުކޮށްފައެވެ. މިއާއެކު މިލިސްޓްގައި މިހާރު ރާއްޖެ ހިމެނޭހެން 38 ޤައުމެއް ހިމެނެއެވެ. މި ޤައުމުތަކުގެ ތެރޭގައި ރާއްޖޭގެ އިތުރުން އަވައްޓެރި އިންޑިއާ، ނޭޕާލް، ބޫޓާން، ބަންގްލަދޭޝް، ސްރިލަންކާފަދަ ކޮވިޑް ބަލި ހަލުވިމިނުގައި ފެތުރޭ ޤައުމުތައް ހިމެނޭއިރު، ބްރެޒިލްއާއި، ޗިލީ، އީރާން ފަދަ ބަލީގެ ޙާލަތައް ބަދަލެއް ނައިސް ދިގު މުއްދަތެއްވެފައިވާ ޤައުމުތައް ވެސް ހިމެނެއެވެ.

ޕާކިސްތާނުން ވަނީ ދުނިޔޭގެ އެކި ޤައުމުތަކުގައި ކޮވިޑްގެ ބަލިމަޑުކަން އޮތް ހާލަތަށް ބަލައި އެކި ކެޓަގަރީތަކަށް ޤައުމުތައް ބަހާލާފައެވެ. އެގޮތުން ކެޓަގަރީ 'އޭ' ގައި ހިމެނޭ ޤައުމުތަކުން ޕާކިސްތާނަށް އެތެރެވާ މީހުން ޕީސީއާރު ޓެސްޓު ހަދާކަށް ނުޖެހެއެވެ. އަދި ކެޓަގަރީ 'ބީ'ގައި ހިމެނޭ ޤައުމުތަކުން ޕާކިސްތާނަށް އެތެރެވުމަށް 72 ގަޑިއިރު ނުވާ ނެގެޓިވް ޕީސީއާރު ޓެސްޓުގެ ނަތީޖާއެއް ހުށަހަޅަން ޖެހެއެވެ. އަދި ކެޓަގަރީ 'ސީ' ގައި ހިމެނޭ ޤައުމުތަކުން ޕާކިސްތާނަށް މީހުން އެތެރެވުން މަނާވާނެކަމަށް ވަނީ ކަނޑައަޅާފައެވެ.

ރާއްޖެއަށް ޒިޔާރަތްކޮށްފައިވާ މީހުން ޕާކިސްތާނަށް އެތެރެވުން މަނާކޮށްފައިވާއިރު، މިމަހުގެ 13 ވަނަ ދުވަހުން ފެށިގެން ދެކުނު އޭޝިޔާގެ ޤައުމުތަކުން ރާއްޖެ އަންނަ ފަތުރުވެރިންނަށް ޓުއަރިސްޓް ވިސާ ދިނުން ރާއްޖެއިން ވަނީ ވަގުތީ ގޮތުން މެދުކަނޑާލާފައެވެ.

ކޮވިޑްގެ 4 ވަނަ ރާޅާއެކު މިބަލީގެ ނުރައްކާ ރާއްޖޭގައި ދުވަހަކުވެސް އިތުރު ނުވާ މިންވަރަށް މިވަނީ އިތުރުވެފައެވެ. އެގޮތުން ޕޮޒިޓިވްވާ ކޭސްތައް 1000ން މަތިން ރިކޯޑްކުރާ އިރު މި ބަލީގައި ނިޔާވާ މީހުންގެ އަދަދުވެސް ދަނީ ރިކޯޑް މިންވަރަކަށް އިތުރުވަމުންނެވެ. ރާއްޖޭގައި ކޮންމެ ދުވަހަކު ވެސް މަދުވެގެން ތިން މީހަކު ނިޔާވެގެން ރިޕޯޓު ނުކުރާ ދުވަހެއް މިހާރު ނުދެއެވެ. ކޮންމެ ދުވަހެއްގެ މަރުތައް ވެސް ރިޕޯޓުކުރަނީ ވަރަށް ކައިރިކައިރީގައެވެ. އެގޮތުން ގިނަ ފަހަރު ދެމީހެއްގެ މަރުގެ ވަގުތުގެ ދެމެދުގައި ގަޑި އިރެއް ވެސް ހަމަނުވެއެވެ. ގިނަ މީހުން މަރުވަނީ ހުޅުމާލެ މެޑިކަލް ފެސިލިޓީންނެވެ. އެ ފެސިލިޓީ ވެސް ފުރިފައިވާއިރު އެތަނުގައި އެކަށީގެންވާ ޚިދުމަތްދެވޭ ވަރަށް ސިއްހީ ޚިދުމަތްތެރިން ނެތް ކަމަށް އެޗްޕީއޭއިން ބުނެފައިވެއެވެ.

މިދިޔަ އަހަރުގެ ތެރޭގައި ކޮވިޑްގެ 52 މަރު ރިޕޯޓް ކުރި އިރު، މި މަހުގެ ތެރޭގައި އެކަނި ވެސް 70ށް ވުރެ ގިނަ މީހުން ވަނީ ނިޔާވެފައެވެ. އެހެންނަމަވެސް،، ކޮވިޑް-19ގައި ރާއްޖެ މިހާރު ކުރިމަތިލާފައިވާ އެންމެ ބިރުވެރި ޙާލަތުން އަރައިގަތުމުގައި މިހާރު އަޅާފައިވާ ފިޔަވަޅުތައް ތަންފީޒުކޮށް ޖުލައި މަހު މިކަމުން އަރައިގަނެވޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވަނީ އަންދާޒާކުރައްވާފައެވެ. މެއި މަހު ފެށުނުއިރު މާލެ ސަރަހައްދުގައި ޕޮޒިޓިވިޓީ ރޭޓް 50 އިންސައްތައިގައި ހުރިއިރު، އޭރު އެޅި ހަރުކަށި ފިޔަވަޅުތަކުގެ ސަބަބުން ޕޮޒިޓިވްވާ ރޭޓް 45 އިންސައްތައަށް ވަނީ ދަށްކޮށްފައެވެ. އަދި މިހާރު އިތުރަށް ހަރުހަށިކޮށްފައިވާ ފިޔަވަޅުތަކުން މިކަމުގެ ނަތީޖާ އިތުރަށް ފެނިގެންދާނެކަމަށް އުންމީދުކުރައްވާ ރައީސް ޞާލިޙް ވަނީ ވިދާޅުވެފައެވެ.