އިންޑިއާއިން އައްޑޫ ސިޓީގައި ކޮންސިއުލޭޓެއް ގާއިމުކުރުމަށް އެގައުމުގެ ކެބިނެޓުން ފާސްކުރުމާ ގުޅިގެން އެކަމާ ނުރުހުން ފާޅުކުރި ބައެއް މީހުން ފޮރިން މިނިސްޓަރު އަބްދުﷲ ޝާހިދަށް ސޯޝަލް މީޑިއާގައި އިންޒާރު ދީފިއެވެ.
ފޮރިން މިނިސްޓްރީން ބުނީ ކޮންސިއުލަރ ޚިދުމަތްތައް ފޯރުކޮށްދިނުމަށް އިންޑިއާގެ ކޮންސިއުލޭޓެއް އައްޑޫގައި ގާއިމުކުރުމަށް އިންޑިއާގެ ކެބިނެޓުން ފާސްކުރުމަކީ ކޮންސިއުލޭޓެއް ގާއިމުކުރުމުގެ ފުރަތަމަ މަރުހަލާ ކަމަށެވެ. އަދި ކޮންސިއުލޭޓް ގާއިމުކުރާ ހޮސްޓް ގައުމުގެ ހުއްދައަށް އެދެނީ ފުރަތަމަ ހުޅުވާ ގައުމުގެ ސަރުކާރުން އެކަމެއް ނިންމުމަށްފަހުއެވެ.
ނަމަވެސް މިކަމުގެ މައުލޫމާތު އޮޅުވާލައި، ބައެއް މީހުން ދަނީ ފޮރިން މިނިސްޓަރު ޝާހިދާއި ސަރުކާރުގެ އިސްވެރިންނަށް ސޯޝަލް މީޑިއާގައި އިންޒާރު ދެމުންނެވެ. އަދި މިފަދަ އިންޒާރުތައް ދެމުންދާ މީހުން އެމީހުންގެ މައުލޫމާތު ސޯސްތަކުގެ ގޮތުގައި ބޭނުންކުރަމުންދަނީ ކާކުކަން ނޭނގޭގޮތަށް ހަދާފައިވާ ސޯޝަލް މީޑީއާ އެކައުންޓްތަކުން ފަތުރާ ހަގީގަތެއް ނެތް ވާހަކަތަކާއި، ހަގީގަތެއް ނެތް ވާހަކަތައް ފަތުރާކަމަށް މަޝްހޫރުވެފައިވާ ބައެއް މީޑިއާތަކުގެ ޚަބަރުތަކެވެ. އެގޮތުން މަގުމަތިން ދިމާކުރާނެކަމުގެ އިންޒާރު ވެސް މިނިސްޓަރު ޝާހިދަށް ދީފައިވެއެވެ.
މީގެ ކުރިންވެސް އިދިކޮޅު މީހުން ފަތުރާ ހަގީގަތެއް ނެތް ޚަބަރުތަކާ ގުޅިގެން ސަރުކާރުގެ އެކި ބޭފުޅުންނަށް އިންޒާރު ދީފައިވެއެވެ.
