ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކުރައްވަންވީ ކަމަކީ ޚާރިޖީ ދާއިރާގައި ތިބި ސިޔާސީ މީހުން ވަކިކޮށްފަ ގެއަށް ފޮނުވާލެއްވުން ކަމަށް އެމްޑީޕީގެ ރައީސް އަދި ކުރީގެ ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
ރާއްޖެޓީވީގެ ފުދިއްޖެ ފުނޑިއްޖެ ކަވަރޭޖްގައި ވާހަކަދައްކަވަމުން ޝާހިދު ވަނީ ރާއްޖޭގެ ކޮންމެ ދިމާލަލަށް ބެލިޔަސް ފެންނަނީ ރާއްޖެ ފުނޑާލާފައިވާ މަންޒަރުކަމަށެވެ. ޚާރިޖީ ދާއިރާއިން ވެސް ފެންނަނީ އެ ދާއިރާ އެއްކޮށް ފުނޑާލާފައިވާ މަންޒަރުކަމަށް ފާހަގަކުރައްވާ ޝާހިދު ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ.
އެގޮތުން އެ ދާއިރާގެ ތަޖުރިބާއެއް ނެތް ސިޔާސީ މީހުން މަޤާމުތަކަށް ލާފައި ތިބުމުގެ ސަބަބުން އެ ދާއިރާގެ އިތުބާރު ގެއްލިފައިވާ ކަަމަށް ޝާހިދު ވިދާޅުވިއެވެ. އަދި ޚާރިޖީ މަސައްކަތްތަކުގެ ވައްޓަފާޅި ނޭނގޭ އެކަމަށް ބީރައްޓެހި ބަޔަކު ދާއިރާ އަށް އައްޔަންކުރުމުގެ ސަބަބުން ރާއްޖެ އާއި މެދު ބޭރުގެ ޤައުމުތަކުން ކުރަމުން އައި އިތުބާރުވެސް ގެއްލިފައިވާ ކަމަށް ޝާހިދު ވަނީ ވިދާޅުވެފައެވެ.
ކަންކަން އެނގިވަޑައި ނުގަންނަވަނީ. އިޚުލާސްތެރިކަމެއް ނެތޭ މި ދަންނަވަނީ ސިޔާސީ މަޤާމްތައް އިތުރުކޮށް ބައްސަވާތީ. ތޮށިމަތިން ވަޒީފާ ޗިޓުގައި ސޮއިކޮށް ބަހާލީ. މިއީ ހަގީގަތް. ދަތުރުތަކެއް ކުރެއްވިދާނެ. ވާ ފައިދާއެއް ނެތެއް ނޫންތޯ. ޤައުމުތަކުން ކުރާ އިތުބާރު ގެއްލިއްޖެ.އެމްޑީޕީގެ ރައީސް އަދި ކުރީގެ ފޮރިން މިނިސްޓަރ އަބްދުﷲ ޝާހިދު
ރާއްޖޭގެ ޚަރަދުތައް ކުރާ ގޮތާއި މެދު ވެސް ޝާހިދު ކަންބޮދުވުން ފާޅުކުރެއްވިއެވެ. އިޚުލާސްތެރިކަމުގެ ޒައްރެއްގެ މިންވަރު ވެސް ހުރި ނަމަ އާއްމުންނަށް ލިބެން އޮތް އެއްޗެއް ނުލިބޭ ގޮތަށް ކަންކަން ނުކުރައްވާނެ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ރައީސް ޑރ.މުހައްމަދު މުއިއްޒުގެ ކައިރީގައި ތިބި ސިޔާސީ މީހުން މަސައްކަތް ކުރައްވަނީ އެ މަނިކުފާނަށް ސަނާކިޔައިގެން ޤައުމުގެ ހާލަތު އެ މަނިކުފާނަށް އޮޅުވާލައްވަން ކަމަށެވެ. އެކަމުގެ ސަބަބުން އާއްމު މީހާގެ އިހުސާސް މިއަދު ރައީސް މުއިއްޒު އަށް އެނގިވަޑައިނުގަންނަވާ ކަމަށް ޝާހިދު ވިދާޅުވިއެވެ.
