ޑޮލަރުގެ އަގުބޮޑުވެ އިގްތިސާދީ އަނދަވަޅަކަށް ވެއްޓެމުންދާއިރު ގަވަރުނަރު ޒިންމާ އަދާކުރުމަށް ޝާހިދު ގޮވާލައްވައިފި
ޑޮލަރުގެ އަގު 20.10 އަށްވުރެ މައްޗަށް ގޮސްފައިވޭ
އެމްޑީޕީގެ ރައީސް އަބްދުﷲ ޝާހިދު
ޑޮލަރުގެ އަގުބޮޑުވެ އިގްތިސާދީ އަނދަވަޅަކަށް ވެއްޓެމުންދާއިރު ގަވަރުނަރު ޒިންމާ އަދާކުރުމަށް އެމްޑީޕީގެ ރައީސް އަބްދުﷲ ޝާހިދު ގޮވާލައްވައިފިއެވެ.
ޑޮލަރުގެ އަގު ބޮޑުނުވާނެކަމަށް ވައުދުވެގެން އައި ސަރުކާރުން ޑޮލަރުގެ އަގު ކޮންޓްރޯލް ނުވެ މިހާރު ޑޮލަރު ލިބެން ހުރީ 20.10 އަށް ވުރެ މަތިންނެވެ. ރާއްޖެ ބަންދުވެ އެންމެ ދަތި ދުވަސްވަރު ވެސް ޑޮލަރުގެ އަގު މިހާ މައްޗަށް އަރާފައި ނުވެއެވެ. މިކަމާއި ގުޅިގެން އެމްޑީޕީގެ ރައީސް އަބްދުﷲ ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ ޑޮލަރުގެ އަގު ދިވެހި ތާރީޚުގައިވެސް އުފުލިގެން ނުދާ މިންވަރަށް އުފުލި, ރައްޔިތުންގެ އަތްމަތި ދަތިވެ, ކުދި އަދި މެދުފަންތީގެ ވިޔަފާރިތައް އިނދަޖެހި, ޤައުމު މިދަނީ އިޤްތިޞާދީ އަނދަވަޅަކަށް ވެއްޓެމުން ކަމަށާއި، ގައުމު މިދަނީ ބަގުރޫޓު ވަމުންނެވެ.
ޝާހިދު ވިދާޅުވީ ރައްޔިތުން ހާލުގައި ޖެހި, އިޤްތިޞާދީ ބޮޑު ކާރިސާއެއް ބޯމަތިވަމުން ދާއިރުވެސް އެމްއެމްއޭގެ ގަވަރުނަރު ހަނު ހުންނެވެމަކީ ޣައިރު ޒިންމާދާރު ޢަމަލެއް ކަމަށާއި، އެއީ ވަރަށް ބޮޑު އިހުމާލެއް ކަމަށެވެ. އަދި މިޙާލަތުގައި, ސިޔާސީ ފަރާތްތަކުގެ މުށުތެރޭގައި ނުހުންނަވާ, ގަވަރުނަރު މަޤާމުގެ ޒިންމާ ފުރިހަމަޔަށް އަދާކުރެއްވުމަށް ޝާހިދު ވަނީ ގޮވާލައްވާފައެވެ. ޤައުމު ބަގުރޫޓުވެގެން ދިޔަ ނުދިނުމަށް އެމްއެމްއޭއިން އަޅުއްވާ ފިޔަވަޅުތައް ރައްޔިތުންނަށް ހާމަކޮށްދިނުމަށް ވެސް ޝާހިދު ވަނީ ގޮވާލައްވާފައެވެ.
ޑޮލަރުގެ އަގު ބޮޑުވެ ގަންނަން ލިބޭ އަގު ފާއިތުވި ދުވަސްތަކުގެ އުފުލިފައިވަނީ ސަރުކާރުން ތަންފީޒު ކުރަން ފަށާފައިވާ ސިޔާސަތުތަކާއި ގުޅިގެންނެވެ. އެގޮތުން އިގްތިސާދީ މާބޮޑު ލަފައެއް ނެތި ސަރުކާރުން ވަނީ ރިސޯޓްތަކުންނާއި ގެސްޓް ހައުސްތަކުން އެމްއެމްއޭއަށް ޑޮލަރު މާރުކުރަން މަޖުބޫރުކޮށްފައެވެ.
