ލޯނުގެ ގޮތުގައި 375 މިލިއަން ރުފިޔާ ދިނުމަށް ވަނީ ނިންމާފައި: ރައީސް
20 މިލިއަން ޔޫރޯ ނުވަތަ 375 މިލިއަން ރުފިޔާގެ ފެސިލިޓީއެއް ވަރަށް އަވަހަށް ހަމަޖެހިގެން ދާނެ
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޙް
ކޮވިޑް 19 ގެ ސަބަބުން ލިބެމުންދާ ގެއްލުންތަކަށް ލުޔެއް ހޯއްދަވައި ދެއްވުމުގެ ގޮތުން ވިޔަފާރިތަކަށް ލޯން ސްކީމެއް ތައާރަފުކުރުމަށް ނިންމާފައިވާކަމަށް ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ ކޮވިޑްގެ ރިލީފް ލޯނުގެ ގޮތުގައި ކުދި ވިޔަފާރިތަކަށް އަމާޒުކޮށްގެން ސޮފްޓް ލޯން ވަރަށް އަވަހަށް ދެވިގެން ދާނެ ކަމަށެވެ.
އެގޮތުން ބޭންކް އޮފް މޯލްޑިވްސް މެދުވެރިކޮށް ސްޓިމިއުލަސް ލޯން ޕެކޭޖެއް ދިނުމަށް ނިންމާފައި ވާކަމަށް ރައީސް ވިދާޅުވިއެވެ. ރައީސް ވިދާޅުވީ 20 މިލިއަން ޔޫރޯ ނުވަތަ 375 މިލިއަން ރުފިޔާގެ ފެސިލިޓީއެއް ވަރަށް އަވަހަށް ހަމަޖެހިގެން ދާނެ ކަމަށެވެ. އެހެންކަމުން ޖޫން މަހުގެ ތެރޭގައި ލޯނު ދޫކުރަން ފެށޭނެ ކަމަށް ރައީސް ވިދާޅުވިއެވެ.
މީގެ އިތުރުން ވެސް ސަރުކާރުގެ ކެރި ފޯރުން ތެރިކަން ހުރި މިންވަރަކުން ކޮވިޑުން ސަލާމަތް ވުމަށްޓަކައި ކުރިއަށް އޮތްތަނުގައި އިތުރު އެހީތައް ދެއްވަމުން ގެންދަވާނެ ކަމަށް ރައީސް ވިދާޅުވިއެވެ. އެކަމަކު އެންމެ އިސްކަމެއް ދެއްވާނީ ކޮވިޑުން ރައްކާތެރި ވުމަށް ކުރަންޖެހޭ ކަންތައްތައްތަކަށް ކަމަށް ރައީސް ވިދާޅުވިއެވެ.
ކޮވިޑްގެ ހާލަތު ނުރައްކާވެފައިވާ މި ދަނޑިވަޅުގައި ސަރުކާރުން ގެންދަނީ ގިނަ ފިޔަވަޅުތަކެއް އަޅަމުންނެވެ. އެއާއެކު ނަންބަރުތައް ދަށަށް ދާނެ ކަމަށް ބެލެވުނު ކަމުގައި ވިޔަސް, އެދެވޭ ގޮތެއްގައި ފިޔަވަޅު ތަކުގެ ހެޔޮ އަސަރު ފެންނާނީ އާންމުން ވެސް ފަރުދީ ޒިންމާ އަދާކޮށްގެން ކަމަށް ސިއްހީ މާހިރުން ބުނެއެވެ.
