އައު ފިޔަވަޅުތަކާއެކު ދަރިވަރުން އިމްތިހާނަށް ދިއުމާ ބެހޭގޮތުން އެޑިއުކޭޝަން މިނިސްޓްރީން ފުލުހުންނާ މަޝްވަރާކޮށްފި
25 މެއި 2021 | އަންގާރަ 13:53ކޮވިޑް ބަލިމަޑުކަން ފެތުރިފައިވާ ރަށްރަށުގެ ސްކޫލްތަކުގައި ގްރޭޑް 9ގެ ދަރިވަރުންގެ އިމްތިހާނާ މެދު ކަނޑައެޅޭގޮތެއް ބުދަދުވަހު އާންމު ކުރާނެ
ކޮވިޑް ކޮންޓްރޯލް ކުރުމަށް އެޅިފައިވާ ފިޔަވަޅުތަކާއެކު އިމްތިހާނަށް ސްކޫލަށް ދިއުމާ ބެހޭގޮތުން ފުލުހުންނާއެކު މަޝްވަރާކުރުން
މާލެ ސަރަޙައްދުގައި ކޮވިޑް-19 ފެތުރުން ކޮންޓްރޯލް ކުރުމަށް އެޅިފައިވާ ފިޔަވަޅުތަކާއެކު އޯ.ލެވެލް އިމްތިޙާނު ހަދާ ދަރިވަރުން ސްކޫލަށް ދިއުމަށް ހަމަޖެހިފައިވާ އިންތިޒާމުތަކާ ބެހޭގޮތުން, އެޑިއުކޭޝަން މިނިސްޓްރީން ފުލުހުންނާއެކު މަޝްވަރާކޮށްފިއެވެ.
އަންގާރަ ދުވަހު ބޭއްވި މި ބައްދަލުވުމަކީ ފުލުހުންނާއެކު ވާޗުއަލްކޮށް ބޭއްވުނު ބައްދަލުވުމެކެވެ. މި ބައްދަލުވުމުގައި އެޑިއުކޭޝަން މިނިސްޓަރު ޑރ.އައިޝަތު އަލީއާއި, މިނިސްޓްރީގެ ބައެއް ބޭފުޅުން ބައިވެރިވެ ވަޑައިގެންނެވިއެވެ.
މީގެ އިތުރުން, މާލެއާއި ކޮވިޑްގެ ކްލަސްޓާތައް ފެނުނު އަތޮޅުތެރޭގެ ރަށްރަށުގެ ސުކޫލްތަކުގެ ޕްރިންސިޕަލުންނާ ވެސް އެޑިއުކޭޝަން މިނިސްޓަރު ޑރ.އައިޝަތު އަލީ އަންގާރަ ދުވަހު ބައްދަލުކުރެއްވިއެވެ.
ޕްރިންސިޕަލުންނާއެކު ބޭއްވުނު ބައްދަލުވުން ތަކުގައި ކޮވިޑް ބަލިމަޑުކަމުގެ ސަބަބުން, ރާއްޖޭގެ ހާލަތު ބަދަލުވަމުންދާ މި ދަނޑިވަޅުގައި ދަރިވަރުންގެ ކިޔެވުން ކުރިއަށްދާ ގޮތް, މިނިސްޓަރު ބައްލަވާލައްވާފައިވެއެވެ. ހަމައެހެންމެ މިހާލަތުގައި ގްރޭޑް 9 ގެ ދަރިވަރުންގެ ފަހު އިމްތިޙާނު ކުރިއަށް ގެންދެވޭނެ ގޮތްތަކާމެދު މަޝްވާރާ ކުރައްވާފައިވެއެވެ.
ކޮވިޑް ބަލިމަޑުކަން ފެތުރިފައިވާ ރަށްރަށުގެ ސްކޫލްތަކުގައި ގްރޭޑް 9ގެ ދަރިވަރުންގެ އިމްތިޙާނާ މެދު ކަނޑައެޅޭގޮތެއް ބުދަދުވަހު އާންމު ކުރުމަށް އެޑިއުކޭޝަން މިނިސްޓްރީން ވަނީ ނިންމާފައެވެ.
ކޮވިޑް ބަލީގެ ނުރައްކާ އިންތިހާއަށް ބޮޑުވެފައި ވާއިރު, ފަހަކަށް އައިސް ކޮންމެ ދުވަހަކު ވެސް ރާއްޖެއިން ބައްޔަށް ޕޮޒިޓިވްވާ މީހުންގެ އަދަދު ހުންނަނީ 1000 މަތީގައެވެ. މިހާ ހަލުވި މިނެއްގައި ބަލި ފެތުރެން ފެށުމާއެކު މަރުވާ މީހުންގެ އަދަދުވެސް ވަނީ ވަރަށް ބޮޑުތަން އިތުރު ވެފައެވެ. އެއާއެކު މާލެއާއި އަތޮޅުތެރޭގެ ރަށްރަށުގެ ފިޔަވަޅުތައް ވަނީ ވަރުގަދަކޮށްފައެވެ.
