އިންކަމް ސަޕޯޓަށް އެދިފައިވާ މީހުންގެ ލިސްޓު އާންމުކުރުމާއެކު ތަފާތު ޚިޔާލުތަކެއް

އިންކަމް ސަޕޯޓަށް އެދިފައިވާ މީހުންގެ ލިސްޓް އާންމުކުރުމާއެކު އާއްމުންގެ ތެރޭގައި ޚިޔާލު ތަފާތުވުުމެއް އުފެދިއްޖެއެވެ.

ކޮވިޑް19ގެ ސަބަބުން ވަޒީފާއަށް އަސަރުކުރި މީހުންނަށާއި އާމްދަނީއަށް އަސަރު ކުރި މީހުންނަށް ދޭ އިންކަމް ސަޕޯޓު އެލަވެންސަށް ހުޅުވާލި މުއްދަތުގައި އެލަވެންސް ހޯދުމަށް އެދި ހުށަހެޅި މީހުންނަށް ދިނުމަށް 419.4 މިލިއަން ރުފިޔާ ހޭދަކޮށްފައިވާކަން ސަރުކާރުން ވަނީ ހާމަކޮށްފައެވެ.

މި ފައިސާ ބެހިފައިވާ ގޮތާއި މެދު އާންމުން އެކި ގޮތްގޮތަށް ޝުޢޫރު ފާޅުކުރަމުންގެންދާއިރު، ސޯޝަލް މީޑިއާގެ އެކި ޕްލެޓްފޯމްތަކުގައިވެސް މިކަމާއިގުޅޭގޮތުން އާންމުންދަނީ ޚިޔާލު ފާޅުކުރަމުނެނެވެ. އެގޮތުން އިންކަމް ސަޕޯޓް އެލަވެންސް ދެނީ އިކޮނޮމިކް މިިނިސްޓަރކަން ކުރައްވާ ފައްޔާޒް އިސްމާއީލްގެ އެކުވެރިންނަށްކަމަށް ބުނެ އާންމު މީހަކު ކުރި ޓުވީޓެއްގެ ޖަވާބުގައި މިނިސްޓަރ ފައްޔާޒް ވަނީ އިންކަމް ސަޕޯޓަށް އެދިފައިވާ މީހުންގެ ލިސްޓް އެމީހުންގެ ފުރިހަމަ މައުލޫމާތާއެކު ހާމަކުރައްވާފައެވެ. ޖޮބް ސެންޓަރުގެ މި ލިންގައި މިހާތަނަށް އައިރު އިންކަމް ސަޕޯޓް އެލަވެންސް ދިން އެންމެންގެ މައުލޫމާތު (ފުރިހަމަ ނަން، އައިޑީ ކާޑް ނަމްބަރ) ހިމެނޭހެން 1724 ސަފްހާގެ 93554 މީހުންގެ މައުލޫމާތު ވަނީ ހިމަނާފައެވެ.

މި މައުލޫމާތަކީ ޖުލައި 9 2020ން ފެށިގެން ލިބެން ހުރި މައުލޫމާތުކަން ފާހަގަކުރައްވައި މިނިސްޓަރ ފައްޔާޒް ވަނީ މި މަޢުލޫމާތު ހާމަކުރިޔަސް އައު މަޢުލޫމާތުތަކެއް އެނގިގެން ނުދާކަމަށް ވިދާޅުވެފައެވެ. އެހެންނަމަވެސް، ފުރިހަމަ ނަން، އައިޑީ ކާޑް ނަމްބަރ އަދި ދާއިމީ އެޑްރެސް ހުރުމުން މިކަމަށް އަވަސް ހައްލެއް ގެނައުމަށް މަސައްކަތް ކުރަމުންދާކަމަށެވެ.