ވޯލްޑް ހެލްތު އެސެމްބްލީގެ 74ވަނަ ބައްދަލުވުން ފަށައިފި
ބައްދަލުވުން ކުރިއަށް ގެންދަނީ އަށް ދުވަހުގެ މުއްދަތަށް
74ވަނަ ވޯލްޑް ހެލްތު އެސެމްބްލީ
ވޯލްޑް ހެލްތު އެސެމްބްލީގެ 74ވަނަ ބައްދަލުވުން ފަށައިފިއެވެ.
ވަރޗުއަލްކޮށް ކުރިއަށް ގެންދާ ވޯލްޑް ހެލްތު އެސެމްބްލީގެ 74ވަނަ ބައްދަލުވުން ފަށާފައިވާއިރު، މި ބައްދަލުވުމުގައި މިނިސްޓަރ އޮފް ހެލްތު އަޙުމަދު ނަސީމް ބައިވެރިވެވަޑައިގަންނަވައެވެ. ދުނިޔޭގެ 194 ޤައުމަކުން، ސިއްޙަތާ ބެހޭ ވަޒީރުންނާއި ސިއްޙީ ދާއިރާގެ ބޭފުޅުން ބައިވެރިވެ ވަޑައިގަންނަވާ ބައިނަލްއަޤްވާމީ މުހިންމު ނިންމުންތަކެއް ނިންމާ އެންމެ މަތީ ފަންތީގެ ބައްދަލުވުމުގައި މިނިސްޓަރ ނަސީމްގެ އިތުރުން ޖެނީވާގައި ހުންނަ ދިވެހިރާއްޖޭގެ މިޝަންގެ ޕާރމަނަންޓް ރެޕްރެޒެންޓެޓިވް ޑރ. އާސިމް އަޙުމަދާއި މިނިސްޓްރީ އޮފް ހެލްތްގެ އިސްބޭފުޅުނާއި ޖެނީވާގައި ހުންނަ ދިވެހިރާއްޖޭގެ މިޝަންގެ އިސްބޭފުޅުން ބައިވެރިވެ ވަޑައިގަންނަވައެވެ.
މިއަހަރުގެ ބައްދަލުވުމުގައި ޤަޢުމުތަކުގެ ވަޒީރުން ތަޤްރީރު ކުރެއްވުމަށް ޚާއްސަ ކުރައްވާފައިވާ މަޢުޟޫއަކީ "އެންޑިންގ ދިސް ޕެންޑަމިކް، ޕްރިވެންޓިންގ ދަ ނެކްސްޓް: ބިލްޑިންގ ޓުގެދަރ އަ ހެލްތިއަރ، ސޭފަރ އެންޑް ފެއަރަރ ވަރލްޑް" އެވެ. މިމަޢުޟޫގައި މިނިސްޓަރ އަޙުމަދު ނަސީމް އަންގާރަ ދުވަހުގެ ވަގުތެއްގައި ތަޤުރީރު ކުރެއްވުމަށްވަނީ ހަމަޖެހިފައެވެ.
މި ބައްދަލުވުމުގައި ޞިއްޙީ ދާއިރާއިން ޚާއްޞަކަމެއް ދޭންޖެހޭ ކަންކަން ފާހަގަކޮށް، ޞިއްޙީ ދާއިރާގެ މުހިންމު މައްސަލަތަކާއި ދުނިޔޭގެ ސިއްޙަތު ޖަމިއްޔާގެ އިދާރީ ހިންގުމާއި އަދި ޖަމިއްޔާގެ ބަޖެޓާއި ގުޅުންހުރި ކަންކަމާއި މެދު ޤައުމުތަކުގެ މެދުގައި މަޝްވަރާކުރެވޭނެއެވެ. ޚާއްސަކޮށް ކޮވިޑްގެ މި ޙާލަތާއި ގުޅުވައިގެން ދިމާވާ ނަފްސާނީ ބަލިމަޑުކަމާއި، ޕަބްލިކް ހެލްތު އެމަރޖެންސީ ޕްރިޕެއަރޑްނަސް އެންޑް ރެސްޕޯންސްއާއި ގުޅޭގޮތުން މަޝްވަރާ ކުރެވޭނެއެވެ.
އަށް ދުވަހުގެ މުއްދަތަށް، މިމަހުގެ 24 ން ޖޫން މަހުގެ އެއް ވަނަ ދުވަހަށް ކުރިއަށް ގެންދާ މި ބައްދަލުވުމަކީ މީގެކުރިން ސްވިޒަރލޭންޑްގެ ޖެނީވާގައި ކޮންމެ އަހަރަކުވެސް ކުރިއަށް ގެންދާ ބައްދަލުވުމެކެވެ. މިއަހަރުގެ ބައްދަލުވުމަކީ، ކޮވިޑްގެ ޙާލަތާއި ގުޅިގެން މި ބައްދަލުވުން ވަރޗުއަލްކޮށް ކުރިއަށް ގެންދާ ދެ ވަނަ ފަހަރެވެ.
