ހޯމަދުވަހުގެ 10ވަނަ މަރު، މިފަހަރު ހުޅުމާލޭގައި ފަރުވާދެމުންދިޔަ ޖަޕާނު ފިރިހެނެއް
24 މެއި 2021 | ހޯމަ 17:40މި ބަލި ޖެހިގެން އެންމެ ގިނަ ބަޔަކު ނިޔާވި ދުވަހަކީ ހޯމަދުވަސް
ގއ. ވިލިނގިލީ ކޮވިޑް ފެސިލިޓީއަށް ބަލި މީހަކު ގެންދަނީ
ހުޅުމާލެ މެޑިކަލް ފެސިލިޓީގައި ފަރުވާދެމުންދިޔަ ޖަޕާން ފިރިހެނަކު ކޮވިޑްޖެހިގެން ނިޔާވެއްޖެއެވެ.
މިއީ ހޯމަދުވަހު މިބަލީގައި ނިޔާވި 10ވަނަ މީހާއެވެ. އަދި ހޯމަ ދުވަސްވެފައި ވަނީ މިހާތަނަށް އައިރު މި ބަލީގައި އެއް ދުވަހެއްގައި އެންމެ ގިނައިން މީހުން ނިޔާވި ދުވަހެވެ. އޭގެ ކުރިން މިދިޔަ އަންގާރަ ދުވަހު 7 މީހަކު މި ބަލީގައި ނިޔާވެފައިވެއެވެ.
އެޗްޕީއޭއިން ބުނީ އެންމެ ފަހުން ނިޔާވެފައިވަނީ ހުޅުމާލެ މެޑިކަލް ފެސިލިޓީގައި ފަރުވާދެމުންދިޔަ 86 އަހަރުގެ ޖަޕާން ފިރިހެނެއްކަމަށާއި، އޭނާ ނިޔާވީ ހޯމަ ދުވަހުގެރޭ 07:53 ހާއިރު ކަމަށެވެ. އަދި މިއީ މި ބަލީގައި ނިޔާވި 139 ވަނަ މީހާ ކަމަށް އެޗްޕީއޭއިން ބުނެއެވެ.
ރާއްޖޭގައި މި ބަލީގައި ނިޔާވާ މީހުންގެ އަދަދު އިންތިހާއަށް އިތުރުވެފައިވާއިރު ކޮންމެ ދުވަހަކު ވެސް މަދުވެގެން ތިން މީހަކު ނިޔާވެގެން ރިޕޯޓު ނުކުރާ ދުވަހެއް މިހާރު ނުދެއެވެ. ކޮންމެ ދުވަހެއްގެ މަރުތައް ވެސް ރިޕޯޓުކުރަނީ ވަރަށް ކައިރިކައިރީގައެވެ. އެގޮތުން ގިނަ ފަހަރު ދެމީހެއްގެ މަރުގެ ވަގުތުގެ ދެމެދުގައި ގަޑި އިރެއް ވެސް ހަމަނުވެއެވެ. ގިނަ މީހުން މަރުވަނީ ހުޅުމާލެ މެޑިކަލް ފެސިލިޓީންނެވެ. އެ ފެސިލިޓީ ވެސް ފުރިފައިވާއިރު އެތަނުގައި އެކަށީގެންވާ ޚިދުމަތްދެވޭ ވަރަށް ސިއްހީ ޚިދުމަތްތެރިން ނެތް ކަމަށް އެޗްޕީއޭއިން ބުނެފައިވެއެވެ.
މިދިޔަ އަހަރުގެ ތެރޭގައި ކޮވިޑްގެ 52 މަރު ރިޕޯޓް ކުރި އިރު، މި މަހުގެ ތެރޭގައި އެކަނި ވެސް 60ށް ވުރެ ގިނަ މީހުން ވަނީ ނިޔާވެފައެވެ.
