ކޮވިޑް-19 ފެތުރުން ކޮންޓްރޯލްކުރުމަށް މާލެ ސަރަހައްދުގައި އިއުލާނުކޮށްފައިވާ ކާފިއު ގަޑި އިތުރުކޮށް، އިތުރު ހަރުކަށި ފިޔަވަޅުތަކެއް އަޅައިފިއެވެ.

މާލެ ސަރަހައްދުގައި ކޮވިޑް ފެތުރުން ކޮންޓްރޯލް ކުރުމަށް މެއި 26 ވަނަ ދުވަހުން ފެށިގެން ދެ ހަފްތާގެ މުއްދަތަކަށް ފިޔަވަޅުތައް ވަރުގަދަ ކުރަން ނިންމައިފައިވާ ކަމަށް ހެލްތު އެމަޖެންސީ އޮޕަރޭޝަނުން ވަނީ ހާމަކޮށްފައެވެ. އެގޮތުން މާލެ ސަރަހައްދުގައި އިއުލާނުކޮށްފައިވާ ކާފިއު ގަޑި ހަވީރު 4:00ން ހެނދުނު 8:00ށް ވަނީ އިތުރުކޮށްފައެވެ. އަދި ކާފިއު ނޫން އެހެން ގަޑިތަކުގައި ބޭރަށް ނުކުމެ އުޅުމުގައި އިތުރު ހިފެހެއްޓުންތަކެއް އަޅަން ނިންމާފައިވާއިރު، ކާފިއު ނޫން ގަޑީގައި ކޮންމެ ގެއަކަށް ވެސް ރެސިޑެންޝަލް ޕާމިޓެއް ދޫކުރުމަށް ވަނީ ނިންމާފައެވެ.

ރެސިޑެންޝަލް ޕާމިޓް ދޫކުރާނީ ދެ ބަޔަކަށް ބަހާލައިގެންނެވެ. އެގޮތުން ހެނދުނު 8:00ން މެންދުރު 12:00ށް އަދި މެންދުރު 12:00ން ހަވީރު 4:00ށް ގެއަކަށް 2 ޕާމިޓް ދެ ގަޑިއެއްގައި ދޫކުރެވޭނެ ކަމަށް އެޗްއީއޯސީން ބުނެއެވެ. އެގޮތުން ހޯމަ ދުވަހުގެ ރޭ 8:00ން ފެށިގެން ރެސިޑެންޝަލް ޕާމިޓަށް ރިކުއެސްޓް ކުރެވޭނެ ކަމަށް އެޗްއީއޯސީން ބުނެއެވެ. ރެސިޑެންޝަލް ޕާމިޓަށް އެދޭއިރު ވެރިފިކޭޝަނެއްގެ ގޮތުގައި ގޭގެ ކަރަންޓް މީޓަރުގެ ނަންބަރު ހުށަހަޅަން ޖެހޭނެކަމަށާއި ކޮންމެ ގެއަކުން ވެސް 2 މީހަކަށް ފާސް ލިބޭނެ ކަމަށް އެޗްއީއޯސީން ބުނެއެވެ.

މީގެ އިތުރުން ގްރޭޓަރ މާލެ ސަރަހައްދު ބަހާލާފައިވާ ގޮތަށް ވެސް ވަނީ ބަދަލުތަކެއް ގެނެސްފައެވެ. އެގޮތުން މާލެ އަދި ވިލިމާލެ އަކީ ވަކި ޒޯނެއްގެ ގޮތަށް އަދި ހުޅުމާލެއަކީ ވަކިޒޯނެއްގެ ގޮތުގައި ބަލަން ނިންމާފައިވާއިރު، މާލެ އަދި ވިލިމާލެއަށް ދޫކުރާ ފާސްތައް ހުޅުމާލޭގައި ބޭނުން ނުކުރެވޭނެކަމަށާއި ހުޅުމާލެއަށް ދޫކުރާ ފާސްތައް މާލޭގައި ބޭނުން ނުކުރެވޭނެ ކަމަށް ވަނީ ބުނެފައެވެ. މިއާއެކު މާލެ އަދި ވިލިމާލޭގައި ދިރިއުޅޭ ފަރާތްތަކަށް ހުޅުމާލެ ނުދެވޭ އިރު ހުޅުމާލޭގައި ދިރިއުޅޭ ފަރާތްތަކަށް މާލެ ނާދެވޭނެއެވެ. ރެސިޑެންޝަލް ޕާމިޓް ކާފިއު ގަޑީގައި ބޭނުން ނުކުރެވޭ އިރު، ގެބިސީތަކުން ހުއްދަދޭ ފަރާތްތަކުގެ ނަން ބަދަލު ކުރާނަމަ ނަން ބަދަލު ކުރެވޭނީ ފުރަތަމަ ހުއްދަ ދޭތާ 72 ގަޑި އިރު ފަހުންނެވެ.

އޭގެ އިތުރުން ޑެލިވަރީގެ ހިދުމަތް ދެވޭނީ ހެނދުނު 6:00ން މެންދަމު 12:00ށް ކަމަށާއި ކުރިން ދޫކޮށްފައިވާ ޑެލިވަރީ ފާސް ބޭނުންކުރެވޭނެ ކަމަށް އެޗްއީއޯސީން ބުނެއެވެ. އަދި ކާފިއުގަޑީގައި ފިހާރަތެރެއަށް ވަދެ ވިޔަފާރި ކުރާނަމަ ފިޔަވަޅު އަޅާނެ ކަމަށް އެޗްއީއޯސީން ބުނެއެވެ.

މި މަހުގެ އަށް ވަނަ ދުވަހުން ފެށިގެން ދުވާލެއްގެ މައްޗަށް 1،000ށް ވުރެ ގިނަ ކޮވިޑް ކޭސްތައް ރިޕޯޓްކުރަމުން އަންނަ އިރު އެވްރެޖްކޮށް ފަސް މީހުން ދަނީީ ދުވާލެއްގެ މައްޗަށް ބަލީގައި ނިޔާވަމުންނެވެ. ބައްޔަށް ފަރުވާދޭ ފެސިލިޓީތަކުގެ ބެޑް ކެޕޭސިޓީ ފުރެން ކައިރިވެފައިވާ އިރު، ބަލިމީހުންނަށް އެކަށީގެންވާ ވަރަށް ފަރުވާދެވޭނެ މިންވަރަށް ސިއްހީ އެހީތެރިން ނެތްކަމަށް އަންނަނީ ބުނަމުންނެވެ.