އީސަ ހައްޔަރު ނުކުރުމުގެ ނިންމުން އިސްތިއުނާފު ނުކުރަން ނިންމައިފި

ގެވެށި އަނިޔާގެ ބޮޑެތި ތުހުމަތުތަކެއް ކުރެވޭ ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެމްބަރު އަހުމަދު އީސަ ހައްޔަރުކުރުމާ މެދު ކްރިމިނަލް ކޯޓުން ނިންމި ނިންމުން އިސްތިއުނާފު ނުކުރުމަށް ޕްރޮސެކިއުޓާ ޖެނެރަލްގެ އޮފީހުން ނިންމައިފިއެވެ.

މެމްބަރު އީސައަށް ތުހުމަތުކުރެވޭ މައްސަލައިގެ ތަހުގީގަށް އޭނާ ހައްޔަރު ކުރުމުގެ އަމުރަކަށް ޕީޖީ އޮފީހުން ކްރިމިނަލް ކޯޓުގައި އެދިފައިވަނީ މިދިޔަ ހަފްތާގެ ބުރާސްފަތި ދުވަހުގެ ހެނދުނުއެވެ. މި މައްސަލައިގައި ކްރިމިނަލް ކޯޓުން ނިންމާފައިވަނީ މެމްބަރު އީސަ ހެއްކަށް ނުފޫޒު ފޯރުވާނެކަމަށް ބެލެވޭނެ ޖާގައެއް ނެތް ކަމަށެވެ. އެހެންކަމުން އޭނާ ހައްޔަރު ކުރުމުގެ އަމުރެއް ނެރެދެވެން ނެތް ކަމަށް ކްރިމިނަލް ކޯޓުން ވަނީ ނިންމާފައެވެ.

ކްރިމިނަލް ކޯޓުގެ މި ނިންމުން އިސްތިއުނާފު ނުކުރުމަށް ޕީޖީ އޮފީހުން ނިންމާފައި ވަނީ, މި މައްސަލައިގެ ތަޙުޤީޤުގެ މައިގަނޑު މަސައްކަތްތައް ނިމި، ހުށަހެޅުމުގެ މަރުޙަލާގައި އޮތުމުން ކަމަށް އެއޮފީހުން ބުނެއެވެ. ޕީޖީ އޮފީހުން ބުނީ, މަސައްލައާއި ގުޅިގެން ތަޙުޤީޤަށް ހެކީގެ ގޮތުގައި ނަގަންޖެހޭ ބަޔާންތައް ނަގައި ނިމިފައިވާތީ، ހެއްކަށް ނުފޫޒު ފޯރުވުމަށް އޮތް ފުރުޞަތުކުޑަ ކަމަށެވެ.

މީގެ އިތުރުން މެންބަރު އީސަގެ އަނބިކަނބަލުންނަށް ލިބެންޖެހޭ ރައްކާތެރިކަން މިހާރު ކަށަވަރު ކުރެވިފައި ވާކަމަށް ޕީޖީ އޮފީހުން ބުނެއެވެ. ހަމައެއާއެކު ކުރިން ޕީޖީ އޮފީހުން އީސަ ހައްޔަރުކުރުމުގެ އަމުރަށް އެދި ހުށަހެޅި އިރު އޮތް ހާލަތު މިހާރު ބަދަލު ވެފައި ވާކަން އެ އޮފީހުން ފާހަގަކުރެއެވެ.

މެމްބަރު އީސަގެ މައްޗަށް ކޮށްފައިވާ ތުހުމަތުތަކުގެ ތެރޭގައި އޭނާގެ އަނބިކަނބަލުން އަސްރާ ނަސީމަށް ގެވެށި އަނިޔާ ކުރުމުގެ އިތުރުން، އެ ދެމީހުންގެ ދަރިފުޅު އަތުލައި، ބެލްކަނިން ވައްޓައި މަރާލާނެކަމަށް ބުނުން ހިމެނެއެވެ. މި މައްސަލައިގައި މެންބަރު އީސައަށް ދަޢުވާ ކުރުމާމެދު ވަރަށް އަވަހަށް ގޮތެއް ނިންމޭނެ ކަމަށް ޕީޖީ އޮފީހުން ބުނެއެވެ.