އެންވައިރުމަންޓް މިނިސްޓްރީގެ ސްޓޭޓް މިނިސްޓަރުކަމަށް މުހައްމަދު ޝަރީފް އައްޔަން ކުރައްވައިފި
23 މެއި 2021 | އާދީއްތަ 12:30ޝަރީފް ކުރިން ހުންނެވީ މިނިސްޓްރީ އޮފް ކޮމިއުނިކޭޝަންގެ ޕާމަނަންޓް ސެކްރެޓަރީގެ މަގާމުގައި
އެންވައިރުމަންޓް މިނިސްޓްރީގެ ސްޓޭޓް މިނިސްޓަރަކަށް މުހައްމަދު ޝަރީފް ވަނީ އައްޔަން ކުރައްވާފައި
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް، މިނިސްޓަރ އޮފް ސްޓޭޓް ފޮރ އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީގެ މަގާމަށް މުހައްމަދު ޝަރީފު އައްޔަން ކުރައްވައިފިއެވެ.
މުހައްމަދު ޝަރީފަކީ، އިނގިރޭސިވިލާތުގެ ޔުނިވަރސިޓީ އޮފް ބާމިންހަމް އިން މާސްޓަރސް އޮފް އިންޖިނިއަރިން ހާސިލު ކުރައްވައިގެން ހުންނެވި ބޭފުޅެކެވެ.
އެންވަޔަރްމަންޓް މިނިސްޓްރީގެ ސްޓޭޓް މިނިސްޓަރުގެ މަގާމަށް އައްޔަން ކުރެވުމާ ހަމައަށް މުހައްމަދު ޝަރީފު ހުންނެވީ މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީގެ ޕާމަނަންޓް ސެކްރެޓަރީގެ މަގާމުގައެވެ. ހަމައެހެންމެ މުހައްމަދު ޝަރީފު ގެންދަވަނީ 2020 ވަނަ އަހަރުން ފެށިގެން މޯލްޑިވްސް ކޮލިފިކޭޝަން އޮތޯރިޓީގެ ހިންގާ ބޯޑުގައި އިންފޮމޭޝަން ޓެކްނޮލޮޖީގެ ދާއިރާ ތަމްސީލުކުރައްވަމުންނެވެ.
މީގެ އިތުރުން މުހައްމަދު ޝަރީފަކީ ވަރަށް ގިނަ މަތީ މަގާމުތައް ފުރުއްވާފައިވާ ބޭފުޅެކެވެ. އެގޮތުން ނޭޝަނަލް ސެންޓަރ ފޮ އިންފޮމޭޝަން ޓެކްނޮލޮޖީ އެން.ސީ.އައި.ޓީގެ ޗީފް އިންފޮމޭޝަން އޮފިސަރުގެ މަގާމާއި ސައިރެކްސް ކޮލެޖުގެ ރެކްޓަރ ގެ މަގާމުފަދަ މަގާމުތައް ފުރުއްވާފައިވެއެވެ.
