އެއްބަސްވުން ދެމެހެއްޓޭނެ ގޮތްތައް ދެނެގަތުމުގެ މަޝްވަރާ މިސްރުން ފަށައިފި

ގާޒާގައި ވެރިކަންކުރާ ހަމާސް ޖަމާއަތާ ދެކޮޅަށް އިސްރާއިލުން ދިން ހަމަލާތަކަށް ކުރި ނުލިބުމުން ބަލި ގަބޫލުކުރި އިސްރާއީލުގެ ޔަހޫދީ ދައުލަތުން ވެފައިވާ އެއްބަސްވުން ދިގު މުއްދަތަކަށް ދެމެހެއްޓޭނެ ގޮތްތައް ދެނެގަތުމުގެ މަޝްވަރާތައް މިސްރުން ފަށައިފިއެވެ.

އިސްރާއީލާއި ފަލަސްތީނުގެ ހަމާސް ޖަމާއަތާއި ދެމެދު ހަމަލާ ބަދަލުކުރުންތައް ހުއްޓާލުމުގައި މެދުވެރިއެއްގެ ދައުރު އަދާކޮށްފައިވަނީ މިސްރުންނެވެ. މިސްރުން ވަނީ އެއްބަސްވުން ދިގު މުއްދަތަކަށް ދެމެހެއްޓޭނެ ގޮތްތައް ދެނެގަތުމުގެ ގޮތުން ޚާއްސަ ވަފުދެއް ކަނޑައަޅާ ގާޒާއަށާއި އިސްރާއީލަށް ފޮނުވައިފައެވެ. އެގޮތުން ގާޒާއަށް އިންސާނީ އެހީ ފޯރުކޮށްދިނުމާއި އެއްބަސްވުން އިތުރަށް ވަރުގަދަކުރެވޭނެ ގޮތްތަކާއި ގުޅޭ ގޮތުން މި ވަފުދުން މަޝްވަރާ ކުރާނެ ކަމަށް މިސްރުގެ ސަރުކާރުން ބުނެއެވެ.

މިސްރުގެ އިތުރުން ހަމަލާ ބަދަލުކުރުން ހުއްޓައިލުމުގެ އެއްބަސްވުމާ ގުޅޭ ގޮތުން އިތުރު މަޝްވަރާތަކެއް ކުރުމަށް އެމެރިކާގެ ޚާރިޖީ ވަޒީރު އެންތަނީ ބުލިންކެން ވެސް އިސްރާއީލާއި ފަލަސްތީނުގެ ހުޅަނގު އައްސޭރިއަށް ދަތުރުކުރުމަށް ވަނީ ހަމަޖެހިފައެވެ. އަދި ބުލިންކެންގެ މިދަތުރުގައި އިސްރާއީލުގެ ހަމަލާތަކުގައި ސުންނާފަތިވެފައިވާ ގާޒާ އަލުން އާރާސްތު ކުރުމާއި ބެހޭގޮތުން މަޝްވަރާ ކުރައްވާނެ ކަމަށް އެމެރިކާގެ ޚާރިޖީ ވުޒާރާއިން ބުނެއެވެ. އެކަމަކު ބުލިންކެން ހަމާސް ޖަމާއަތާއި މަޝްވަރާ ކުރުމަށް ނިންމާފައި ނުވާ ކަމަށް އެމެރިކާ އިން ބުނެއެވެ.

ގާޒާއަށް ހަމަލާ ދިނުން ހުއްޓާލާނެކަން އިސްރާއީލުން އިއުލާން ކުރުމާއެކު ގާޒާގެ ބިމާ ހަމަކޮށްފައިވާ އިމާރާތްތައް ސާފުކުރުމަށް ކުއްލި ހާލަތުގައި މަސައްކަތްކުރާ ފަރާތްތަކާ ވޮލަންޓިއަރުން ވަނީ މަސައްކަތް ފަށާފައެވެ. ސްކޫލްތަކުގައި ދިރިއުޅެމުންދިޔަ އާއިލާތައް އަނބުރާ ގެއަށް ބަދަލުވުމަށްވަނީ ފަށާފައެވެ.

11 ދުވަހު މެދުކެނޑުމެއްނެތި ދެމުން ގެންދިޔަ ހަމަލާތަކުގައި 255 މީހުން ގާޒާއިން ޝަހީދުވެފައިވެއެވެ. އޭގެ ތެރޭގައި 66 ކުޑަކުދިންނާއި 39 އަންހެނުންވެސް ހިމެނެއެވެ. އިސްރާއީލުން ހަމަލާތައް ހުއްޓާލާފައިވަނީ ހުކުރު ދުވަހުގެރޭ މެންދަމު ގާޒާ ގަޑިން 2:00ޖެހުމާއެކުގައެވެ.