އާސަންދަ ހިދުމަތް ދިން ކަން އިއުލާނު ކުރި ނަމަވެސް އަދިވެސް އެ ހިދުމަތް، އެންމެ ބޮޑު ޕްރައިވެޓް ހޮސްޕިޓަލް، އޭޑީކޭ އިން ނުލިބޭނެ ކަމަށް އެ ހޮސްޕިޓަލުން ބުނެފި އެވެ.
އާސަންދަ ހިދުމަތް ދިނުމަށް ކުރިން ދިން ގޮތަށް ސިއްހީ ހިދުމަތް ދޭ އަމިއްލަ ތަންތަނުން ދިނުމަށް މިދިޔަ ހޯމަ ދުވަހު ސަރުކާރުން ކަނޑައެޅުމާއި ގުޅޭ ގޮތުން އޭޑީކޭ އިން ވަނީ ބަޔާނެއް ވެސް ނެރެފަ އެވެ. އެ ބަޔާނުގައި ބުނެފައިވަނީ، މިދިޔަ ހޮނިހިރު ދުވަހުގެ ރޭގެ ވަގުތެއްގައި އާސަންދަ ހިދުމަތް މެދުކަނޑާލުމަށް ސަރުކާރުން ނިންމުމަށް ފަހު އަނެއްކާ ހޯމަ ދުވަހު އެ ހިދުމަތް ދިނުމަށް ކުރިންވެސް ދެމުންއާއި އުސޫލާއި އެއްގޮތަށް ދޭނެކަން އިއުލާނު ކުރި ނަމަވެސް އެފަދަ އެއްވެސް އެންގުމެއް އަންގާފައިނުވާ ކަމަށް އޭޑީކޭ އިން ބުނެ އެވެ. އޭޑީކޭ އިން ބުނީ، އެ ހޮސްޕިޓަލުން އާސަންދަ ހިދުމަތް ދޭނީ އާސަންދަ އާއި އެކު އަލުން އެގްރީމެންޓެއް ހެދުމަށްފަހުގައި ކަމަށާއި އަވަސް މުއްދަތެއްގެ ތެރޭގައި އާސަންދަ ހިދުމަތް ދެވޭނެ ކަމަށް އުންމީދު ކުރާ ކަމަށެވެ.
އާސަންދަ ހިދުމަތް ދިނުމާއި ގުޅޭގޮތުން ހޯމަ ދުވަހު ހެނދުނު ނެރުނު ބަޔާނުގައި ބުނެފައި ވަނީ އާސަންދައަކީ، ދިވެހިރާއްޖޭގެ ހުރިހައި ރައްޔިތުންނަށް އެކަށީގެންވާ ރަނގަޅު ފެންވަރުގެ އަސާސީ ޞިއްޙީ ޚިދްމަތް ލުއި ފަސޭހަ ގޮތެއްގައި ލިއްބައިދިނުމުގެ ގޮތުން ޤައުމީ ފެންވަރުގައި ހިންގަމުންގެންދާ އިޖްތިމާޢީ ޞިއްޙީ އިންޝުއަރަންސްގެ ނިޒާމެއް ކަމަށެވެ. އަދި ނިޒާމު މިހާރު ބައްޓަންކުރެވި ހިނގަމުންދާ ގޮތަކީ، މިފަދަ ނިޒާމެއް ހިންގުމަށް އެންމެ ދެމެހެއްޓެނިވި ގޮތް ކަމަށް ނުވާ ކަމަށް ރައީސް އޮފީހުގެ ބަޔާނުގައި ބުނެފައިވެއެވެ.
ރައީސް އޮފީހުން ބުނީ، އާސަންދަ ކުންފުނިން ސިއްހީ ހިދުމަތްދޭ އަމިއްލަ ތަންތަނުން ނިންމި ނިންމުމަކީ އެއްގޮތަކަށް ވެސް ސަރުކާރުގެ ހުށަހެޅުމެއްނޫން ކަމަށެވެ. އަދި އާސަންދައިގެ ޚިދުމަތް ފޯރުކޮށްދިނުމަށް މެދުވެރިވާ އަމިއްލަ ފަރާތްތައް އެކަހެރި ކުރުމަށް ސަރުކާރުން އެއްވެސް ލަފައެއް ދީފައެއްނުވާނެކަމަށް ރައީސް އޮފީހުން ބުނެފައިވެއެވެ.
