މާލެ ސިޓީގެ މަގުތައް ދޮވެ ޑިސްއިންފެކްޓް ކުރުމުގެ މަސައްކަތް މާލެ ސިޓީ ކައުންސިލުން ފަށައިފިއެވެ.
މާލެ ސިޓީ ކައުންސިލުން ބުނީ، މާލޭގެ މަގުތައް ދޮވެ ޑިސްއިންފެކްޓް ކުރުމުގެ މަސައްކަތް މާލެ ސިޓީގެ މޭޔަރ ޑރ މުހައްމަދު މުއިއްޒު ފައްޓަވައި ދެއްވާފައިވާ ކަމަށެވެ. މިއީ ޑރ މުއިއްޒުގެ ސްޓްރެޓެޖިކް އެކްޝަން ޕްލޭންގައި "ހިތްފަސޭހަ މާލެ" އެއް ޤާއިމު ކުރުމުގެ ދަށުން ހިމެނޭ ކަމެކެވެ. އެގޮތުން ޑރ މުއިއްޒު ވަނީ މަސް މާރުކޭޓު ސަރަޙައްދުގައި މި މަސައްކަތް ފައްޓަވައިދެއްވާފައެވެ.
ޑރ މުއިއްޒު ވަނީ މާލޭގައި ހުންނަ ލޯކަލް މާރުކޭޓާއި މަސް މާރުކޭޓު އަދި ދަތުރުވެރިންގެ މާރުކޭޓުގެ ހާލަތު ބައްލަވަން އެތަންތަނަށް ޒިޔާރަތް ކުރައްވާފައެވެ. މުއިއްޒު ވަނީ އެތަންތަނުން ބައްދަލުވި ފަރާތްތަކުގެ ކަންބޮޑުވުންތަކަށް ޙައްލު ގެންނަވާނެ ކަމުގެ ޔަޤީންކަން ދެއްވާފައެވެ.
މާލޭ މަސްވެރިންގެ މާރުކޭޓާއި ދަތުރުވެރިންގެ މާރުކޭޓު އަދި ލޯކަލް މާރކޭޓް ޒަމާނީކުރުމާއި، “ސާފުމަގު” މަޝްރޫޢު ތައާރަފުކޮށް ރަށްވެހިންގެ އެއްބާރުލުމާއި އެކު ހިންގާ ދެމެހެއްޓުމަކީ މުއިއްޒުގެ ސްޓްރެޓެޖިކް އެކްޝަން ޕްލޭންގައި ހިމެނިފައިވާ ކަންކަމެވެ.
