ހަމަލާ ބަދަލުކުރުން ހުއްޓާލުމުގެ އެއްބަސްވުމުގައި ދެމިތިބުމަށް އދ އިން ގޮވާލައިފި

ހަމަލާ ބަދަލުކުރުން ހުއްޓާލުމުގެ އެއްބަސްވުމުގައި ދެމިތިބުމަށް އދ އިން ގޮވާލައިފިއެވެ.

އދގެ ސެކެރެޓަރީ ޖެނެރަލް އެންޓޯނިއޯ ގުޓަރޭސް ވަނީ އެއްބަސްވުމަށް މަރުހަބާ ވިދާޅުވެ، ދެފަރާތުންވެސް އެއްބަސްވުމާ އެއްގޮތަށް އަމަލުކުރުމަށް ގޮވާލައްވާފައެވެ.

އޭނާ ވިދާޅުވީ ހަމަލާ ބަދަލުކުރުން ހުއްޓައިލުމުގެ އިތުރުން މައްސަލަތަކަށް ދާއިމީ ހައްލެއް ހޯދުމުގެ ޒިންމާ ދެ ގައުމަށްވެސް އޮތްކަމަށެވެ. ގުޓަރޭސް ވިދާޅުވީ އދ އޮތީ އިސްރާއީލާއި ފަލަސްތީނާއި އެކުވެރި ދައުލަތްތަކާއެކު މަސައްކަތްކުރުމަށް ތައްޔާރަށްކަމަށެވެ. ގާޒާގައި ވެރިކަންކުރާ ހަމާސް ޖަމާއަތާއި، ފަލަސްތީނުގެ ސަރުކާރުން އެއްގަލަކަށް އަރަންޖެހޭކަމަށްވެސް އޭނާ ވިދާޅުވިއެވެ. އަދި ފަލަސްޠީނުގެ ރައްޔިތުންނަށް ބޭނުންވާ އެހީތެރިކަން ފޯރުކޮށްދިނުމަށާއި އިދާރާތައް ވަރުގަދަކުރުމަށް ބައިނަލްއަގުވާމީ އެހީތެރިކަން ފޯރުކޮށްދޭންޖެހޭކަމަށްވެސް ވިދާޅުވިއެވެ.

ހަމަލާ ބަދަލުކުރުން ހުއްޓާލުމަށް އެއްބަސްވުމުން ގާޒާގެ އެކި ސަރަޙައްދުތަކުގައި އާންމުން ދަނީ އުފާ ފާޅުކުރަމުންނެވެ.

11 ދުވަސްވަންދެން ކުރިޔަށްދިޔަ ހަމަލާ ބަދަލުކުރުން ހުއްޓާލުމަށް ދެފަރާތުން އެއްބަސްވެފައިވަނީ އެއްވެސް ޝަރުތަކާ ނުލައެވެ. އެހެންނަމަވެސް އިސްރާއީލުން ބުނެފައިވަނީ ހަމާލާތައް އިތުރަށް ކުރިޔަށް ގެންދިއުން ބިނާވެގެން ދާނީ، މައިދާނުގެ ހާލަތު އޮންނަ ގޮތެއްގެ މައްޗަށް ކަމަށެވެ.

އިސްރާއީލުގެ ބޮޑުވަޒީރުގެ އޮފީހުން ނެރުނު ބަޔާނެއްގައި ބުނެފައިވަނީ ހަމަލާ ބަދަލުކުރުން ހުއްޓާލުމަށް މިސްރުން ހުށަހަޅާފައިވާ ހުށަހެޅުން އެއްވެސް ޝަރުތަކާ ނުލާ ގަބޫލުކުރުމަށް އިސްރާއީލުގެ ސެކިއުރިޓީ ކެބިނެޓުން ނިންމާފައިވާ ކަމުގައެވެ.

އިސްރާއީލުގެ ބޮޑުވަޒީރުގެ އޮފީހުގެ ބަޔާން ނެރުނުތާ ކުޑައިރުކޮޅެއްގެ ތެރޭގައި، ހަމަލާ ބަދަލުކުރުމަށް އެއްބަސްވާކަން އިއުލާންކޮށް ފަލަސްތީނުގެ ހަމާސް ޖަމާއަތުންނާއި އަދި އިސްލާމިކް ޖިހާދުންވެސް ވަނީ ބަޔާނެއް ނެރެފައެވެ. އެއާއެކު ބުރާސްފަތި ދުވަހުގެރޭ ގާޒާ ގަޑިން 2:00 ޖެހުމާއެކު ހަމަލާ ބަދަލުކުރުން ހުއްޓާލާނެކަމަށް ވަނީ އެއްބަސްވެފައެވެ.