ހަމަލާ ބަދަލުކުރުން ހުއްޓާލުމަށް އދގެ ސެކެޓްރީ ޖެނެރަލް ގޮވާލައްވައިފި

ދެފަރާތުން ބަދަލުކުރަމުންދާ ހަމަލާތައް ހުއްޓާލުމަށް އދގެ ސެކެޓްރީ ޖެނެރަލް ގޮވާލައްވައިފިއެވެ.

ގާޒާއާއި އިސްރާއީލްގެ މައްސަލަ އެޖެންޑާކޮށް ބޭއްވި ކުއްލި ބައްދަލުވުމުގައި ސެކެޓްރީ ޖެނެރަލް އެންޓޯނިއޯ ގުޓަރޭސް ވިދާޅުވީ، ހަމަލާ ބަދަލުކުރުން ވަގުތުން ހުއްޓާލަން ޖެހޭ ކަމަށެވެ. ހަމަލާތައް ދެފަރާތުންވެސް ހުއްޓާލާ ލިބިފައިވާ ގެއްލުމުން އަރައިގަތުމަށް އދ އެހީތެރިކަން އެހިތެރިވާނެ ކަމަށް ވައުދުވެވަޑައިގެންނެވިއެވެ.

"ފާއިތުވި 10 ދުވަހަކީ ބިރުވެރި ދުވަސްތަކެއް. ޚާއްސަކޮށް ގާޒާއަށް. އަހަރެން މިހިރީ ޝޮކްވެފައި އިސްރާއީލުން ވައިގެ މަގުން ގާޒާއަށް ދެމުންދާ ހަމަލާތައް ފެނިފައި" ގުޓަރޭސް ވިދާޅުވިއެވެ.

ސެކެޓްރީ ޖެނެރަލް ވިދާޅުވިހެން ގާޒާ އޮތީ ބިރުވެރި ކަމެއްގެ ތެރޭގައެވެ. ގުޓަރޭޝް ވިދާޅުވީ، ދުނިޔެ މަތީގައި ނަރަކަވާނަމަ ގާޒާގެ ކުދިން ވޭތުކުރަމުންދަނީ، އިހުސާސްކުރަމުން ދަނީ އެ އަނިޔާވެރިކަން ކަމުގައެވެ.

ގާޒާގައި ހުރި މީޑިއާ އޮފީސްތައް ހިންގަމުން އައި އިމާރާތް ބިމާ ހަމަކޮށްލުމަކީ ކަންބޮޑުވާ ކަމެއް ކަމަށާއި، ނޫސްވެރިންނަށް އަމާޒުކޮށް ދެމުން އަންނަ ހަމަލާތައް ބަލައި ނުގަނެވޭނެ ކަމަށް ވިދާޅުވިއެވެ. ނޫސްވެރިންނަށް އެމީހުންގެ މަސައްކަތް ކުރެވޭނެ މަގު ފަހިވެފައި އޮންނަން ޖެހޭނެ ކަމަށް ވިދާޅުވިއެވެ.

ގާޒާއަށް އަމާޒުކޮށް އިސްރާއީލުން ދެމުންގެންދާ އުދުވާނި ހަމަލާތަކުގައި ގާޒާގެ މަގުތަކާއި، ކަރަންޓް ކޭބަލްތަކަށް ގެއްލުންވެ ބައެއް ސަރަހައްދުތަކުން ކަރަންޓް ކެނޑިފައިވާކަން ފާހަގަކުރެއްވިއެވެ. 100އަށްވުރެ ގިނަ ގެ ބިމާހަމަވެފައިވާއިރު 50،000ށްވުރެ ގިނަ މީހުންވަނީ ގެދޮރު ގެއްލިފައެވެ. ބައެއް ސަރަހައްދުތަކުގެ ފެނާއި ކާބޯތަކެއްޗަށް ޖެހިފައިވާކަމަށް ވިދާޅުވިއެވެ.

އެހި ފޯރުކޮށްދޭ ޖަމާއަތްތަކުން ދޭ އެހި ގާޒާއަށް ލިބޭނެ މަގު ފަހިވާން ޖެހޭ ކަމަށާއި، ޔޫއެންގެ އިމަރޖެންސި ރެސްޕޮންޑް ފަންޑުން 14 މިލިއަން ޑޮލަރު ގާޒާގެ ކަންކަމަށް ޚަރަދު ކުރަން ނިންމާފައިވާ ކަމަށް ވިދާޅުވިއެވެ. އެހީ ހިފައިގެންދާ ފަރާތްތަކަށް އަމާޒުކޮށް ހަމަލާތައް ދީގެން ނުވާނެ ކަމަށާއި، އެމީހުންނަށް ގާޒާއަށް ވަނުމުގެ ހުއްދަ އިސްރާއީލުން ދިނުމަށް ގޮވާލެއްވިއެވެ.

ހަނގުރާމަތަކުގައިވެސް އުސޫލުތަކެއް އޮންނަ ކަމަށާއި، ހަނގުރާމައިގައިވެސް ކުށެއް ނެތް އާންމުންނާއި އެމީހުންގެ ގެދޮރު ރައްކާތެރި ކުރެވެން ޖެހޭނެ ކަމަށް ގުޓަރޭސް ވިދާޅުވިއެވެ. އަމިއްލަ ނަފްސުގެ ދިފާއުގައި ކަމަށްބުނެ ކުށެއްނެތް އާއްމު ރައްޔިތުންގެ ގެދޮރު ސުންނާފަތި ކޮށްލުމަކީ، ބައިންލއަގުވާމީ އިންސާނީ ހައްގުތަކާ ޚިލާފު ކަމެއް ކަމަށް ވިދާޅުވިއެވެ.

ހަމާސްއިންވެސް އިސްރާއީލްގެ އާންމުން ދިރިއުޅޭ ހިސާބުތަކަށް އަމާޒުކޮށް ހަމަލާތައް ނުދިނުމަށް ގޮވާލެއްވިއެވެ.

ގުޓަރޭސް ވިދާޅުވީ މިސްރާ، ޖޯރޑަން އަދި ގަތަރާއެކު މި މައްސަލައިގައި ހައްލު ހޯދޭނެ ގޮތްތަކާ ބެހޭ މަޝްވަރާތައް ކުރިއަށްދާ ކަމަށެވ