ރައީސް ނަޝީދު އޭޑީކޭގައި ފަރުވާ ހޯއްދަވަން އޮންނަވަނިކޮށް، އެ ހޮސްޕިޓަލުގެ ފާޚާނާއަކުން ފިސްތޯލައެއް ފެނުުނު މައްސަލައެއް ފުލުހުން ބަލަން ފަށައިފިއެވެ.
މީގެކުރިން ބޭއްވި އެއްވެސް ޕްރެސްއެއްގައި ފުލުހުން މި މައުލޫމާތު ހިއްސާކޮށްފައިނުވާއިރު، ބުދަ ދުވަހު ބޭއްވި ޕްރެސްގައި ނޫސްވެރިއެއްގެ ސުވާލުގައި އޭޑީކޭއިން ފިސްތޯލެއް ފެނުނު މައްސަލަ މިހާރު ތަހުގީގު ގޮސްފައިވާ ހިސާބާ ބެހޭ ގޮތުން ސުވާލުކުރުމުން ފުލުހުން މިކަމާ އިންކާރެއް ނުކުރައްވައެވެ. ޗީފް ސުޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވީ، އެ މައްސަލައިގެ މައުލޫމާތު ފުލުހުންގެ މީޑިއާ މެދުވެރިކޮށް ހިއްސާ ކުރައްވާނެ ކަމަށެވެ.
މިކާމާ ގުޅިގެން އެމްއެންޑީއެފާ ސުވާލުކުރުމުން މިހާތަނަށް އެއްވެސް ޖަވާބެއް ދެއްވާފައެއް ނުވެއެވެ.
ރައީސް ނަޝީދަށް އަމާޒުކޮށް އެމަނިކުފާނުގެ ދިރިއުޅުއްވާ ގެކޮޅު ހިމެނޭ ސަރަހައްދުން އައިއީޑީއެއް ގޮއްވާލައިގެން ދީފައިވާ ހަމަލާއަށް މިއަދަަށް 14 ދުވަސް މިވަނީ ވެފައެވެ. މައްސަލައާ ސީދާ ގުޅުން ހުރެގެން 4 މީހަކު މިހާތަނަށް ހައްޔަރުކޮށްފައިވެއެވެ. 4 ވަނަ މީހާ ހައްޔަރުކޮށްފައިވަނީ ބުދަ ދުވަހުގެރޭ ބ. ދަރަވަންދޫއިންނެވެ. އޭނާ މިހާރުވަނީ މާލެ ގެނެސްފައެވެ. މި މައްސަލައިގައި ކުރިން ހައްޔަރުކޮށްފައިވާ 3 މީހުންގެ ބަންދަށް 15 ދުވަސް ވަނީ ޖަހާފައެވެ.
ރައީސް ނަޝީދަށް އަމާޒުކޮށްދިން ހަމަލާގެ ތަހުގީގު ނިމި ކޯޓު މަރުހަލާތައް ނިމެންދެން އެ މަރުހަލާތައް ގާތުން ބެލުމަށް ރައީސް ވަނީ ޚާއްސަ މަންދޫބެއް ވެސްް އައްޔަން ކުރައްވާފައެވެ.
