ބ. ދަރަވަންދޫ އިން ފުލުހުން ބުދަ ދުވަހުގެ ރޭ ހައްޔަރުކޮށްފައިވަނީ ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ސައިކަލެއް ގޮއްވާލި މައްސަލައާ ގުޅިގެން ހައްޔަރުކުރި މީހެއް ކަމަށް ފުލުހުން ހާމަކޮށްފިއެވެ.
ބުދަ ދުވަހުގެރޭ ހައްޔަރު ކޮށްފައިފަނީ ލ.ގަން، ދުންފިނި އުފާ، އަހުމަދު ފާތިހު ނަމަކަށް ކިޔާ މީހެކެވެ.
މި މައްސަލައާ ގުޅިގެން ރާއްޖޭގެ އެކި ކަންކޮޅުތަކުގައި ވެސް އިތުރު އޮޕަރޭޝަންތަކެއް ކުރިއަށްދާ ކަމަށް ފުލުހުން ވިދާޅުވިއެވެ. އެގޮތުން އައްޑޫ ސިޓީގައި ހިންގާފައިވާ އޮޕަރޭޝަންގައި 9 މީހަކާއި ބައެއް ތަކެތި ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން މައުލޫމާތުދެއެވެ.
ފުލުހުން ބުނީ، މާލޭގައި ހިންގާ އޮޕަރޭޝަންތަކުގައި މިހާރުވެސް 5 ގެއެއް ބަލައި ފާސްކޮށް ބައެއް ތަކެތި ފުލުހުންގެ ބެލުމުގެ ދަށަށް ގެނެސްފައިވާ ކަމަށާއި، މާލޭގައި މިހާރުވެސް އިތުރު އޮޕަރޭޝަންތައް ކުރިއަށްދާކަމާށެވެ، މިފަދަ ތަންތަން ބަލައި ފާސްކުރުމުގެ މަޤްސަދަކީ ރާއްޖޭގައި ހަރުކަށި ފިކުރާއި ޓެރަރިޒަމްގެ އަމަލްތައް ހުއްޓުވުން ކަމަށް ފުލުހުން ބުންޏެވެ.
ފުލުހުންގެ ބެލުމުގެ ދަށަށް ގެނެސްފައިވާ ތަކެތީގެ ތެރޭގައި ހަތިޔާރު ނުހިމެނޭ ކަމަށާއި، ބައެއް ޑިޖިޓަލް ސާމާނު އަދި ހަރުކަށި ފިކުރު ފަތުރަން ބޭނުންކުރާ ބައެއް ސާމާނު ފެނިފައިވާ ކަމަށް ފުލުހުން ބުންޏެވެ.
މެއި މަހުގެ 6 ވަނަ ދުވަހު ރައީސް ނަޝީދަށް އަމާޒުކޮށް ބޮންގޮއްވާލި ހާދިސާއާ ގުޅިގެން މިހާތަނަށް ހައްޔަރުކޮށްފައިވަނީ، ބޮންގޮއްވުމުގައި އަމަލީގޮތުން ބައިވެރިވި ކަމަށް ތުހުމަތު ކުރެވޭ އަދުހަމް އަހުމަދުގެ އިތުރުން، މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އެވެ.
