އިޓާލިއަން ކަޕުގެ ޗެމްޕިއަންކަން ޔުވެންޓަސްއަށް

އެޓަލަންޓާ ބަލިކޮށް އިޓާލިއަން ކަޕުގެ ޗެމްޕިއަންކަން ޔުވެންޓަސްއިން ހޯދައިފިއެވެ.

ބުދަ ދުވަހުގެރޭ ކުޅުނު ފައިނަލް މެޗުން ޔުވެންޓަސް މޮޅުވީ 2-1 ގެ ނަތީޖާއަކުންނެވެ. މިއީ އިޓާލިއަން ކަޕުގެ އެންމެ ކާމިޔާބު ޓީމު ކަމަށްވާ ޔުވެންޓަސްއިން މި މުބާރާތް ކާމިޔާބުކުރި 14 ވަނަ ފަހަރެވެ.

ބުދަ ދުވަހުގެރޭ ކުޅުނު ފައިނަލް މެޗު ބެލުމަށް ވަކި އަދަދަކަށް ސަޕޯޓަރުން ދަނޑަށް ވެއްދިއިރު، ފޯރިގަދަ ކުޅުމެއް ފެނިގެންދިޔަ މި މެޗުގައި އެންމެ ފުރަތަމަ ލަނޑު ޖަހާ ލީޑު ނަގާފައިވަނީ ޔުވެންޓަސްއިންނެވެ. ވެސްޓަން މެކެނީގެ އެހީއާއެކު މެޗުގެ 31 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޑެޖާން ކުލުސެވްސްކީއެވެ. އެކަމަކު ފުރަތަމަ ހާފު ނިމެން ހަތަރު މިނެޓަށް ވެފައި ވަނިކޮށް ރުސްލާން މައިލްނޯވްސްކީ ވަނީ ލަނޑެއް ޖަހައި، އެޓަލާންޓާއަށް ނަތީޖާ އެއްވަރުކޮށްދީފައެވެ.

އޭގެ ފަހުން މި މެޗުގައި ދެ ޓީމަށްވެސް ރަނގަޅު ފުރުސަތުތަކެއް ލިބިގެންދިޔައިރު، މެޗުގެ 73 ވަނަ މިނެޓުގައި ޔުވެންޓަސްއިން ވަނީ އަލުން ލީޑު ނަގާފައެވެ. ކުލުސެވްސްކީ ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ފެޑެރިކޯ ކިއެސާއެވެ. އަދި މި މެޗު އެޓަލަންޓާއިން ނިންމާލަން ޖެހުނީ އެއް ކުޅުންތެރިއަކު މަދުކޮށެވެ. އެއީ މެޗު ނިމެން ދެ މިނެޓަށް ވެފައި ވަނިކޮށް އެ ޓީމުގެ ރަފައެލް ޓޮލޯއިއަށް ސީދާ ރަތް ކާޑެއް ދެއްކުމާ ގުޅިގެންނެވެ.

މި މޮޅާއެކު މި ސީޒަނުގެ އިޓާލިއަން ކަޕުގެ ޗެމްޕިއަންކަން ޔުވެންޓަސްއިން ހޯދިއިރު، މިއީ މި ސީޒަނަށް ޔުވެންޓަސްގެ ކޯޗުގެ މަގާމާ ހަވާލުވި އަންދްރެއާ ޕިރްލޯގެ ދެވަނަ ކާމިޔާބީއެވެ. މީގެ ކުރިން މިދިޔަ އަހަރު ޕިރްލޯގެ އިރުޝާދުގެ ދަށުން ޔުވެންޓަސްއިން ވަނީ އިޓާލިއަން ސުޕަ ކަޕުވެސް ކާމިޔާބުކޮށްފައެވެ.