ހަމަލާ ބަދަލުކުރުން ހުއްޓާލުމަށް ބައިޑެން ގޮވާލައްވައިފި

އިސްރާއީލާއި ފަލަސްތީނުގެ ހަމާސް ޖަމާއަތާ ދެމެދު ކުރިއަށް ދާ ހަމަލާ ބަދަލުކުރުންތައް ހުއްޓާލުމަށް އެމެރިކާގެ ރައީސް ޖޯ ބައިޑަން ގޮވާލައިފިއެވެ.

އެމެރިކާގެ ރައީސް މިހެން ވިދާޅުވެފައި ވަނީ، ހަމަލާ ބަދަލުުކުރުން ހުއްޓުމެއް ނެތި ކުރިއަށް ދާތާ 8 ދުވަސް ފަހުންނެވެ. މީގެ ކުރިން ބައިޑަން ވިދާޅުވެފައިވަނީ، އިޒްރޭލަށް އެމީހުންގެ ދިފާއުގައި މަސައްކަތް ކުރެވޭނެ ކަމަށެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާއި ފޯނުން ގުޅުއްވާ ވާހަކަ ދައްކަވަމުން ބައިޑެން ވިދާޅުވެފައިވަނީ، ހަމަލާ ބަދަލުކުރުން ހުއްޓުމަކަށް ގެނައުމަށް އެމެރިކާއިން ދަނީ މިސްރާއިއެކު މަސައްކަތް ކުރަމުން ކަަމަށެވެ. އެހެންނަމަވެސް، އެމެރިކާއިން ވަނީ އަންގާރަ ދުވަހުވެސް، ހަމަލާ ބަދަލުކުރުން ހުއްޓުމަކަށް ގެނެސް، ހަމަނުޖެހުންތައް ހުއްޓާލުމަށް ދެފަރާތަށް ގޮވާލުމަށް ޔޫއެންއިން ބަޔާނެއް ނެރުން ހުއްޓުމަކަށް ގެނެސްފައެވެ. އެމެރިކާއިން މިހާތަނަށް ބުނަމުން އައިސްފައިވަނީ، ދެފަރާތަށްވެސް އެންމެ މަސްލަހަތު ހުރި ގޮތަކީ، ޔޫއެން މެދުވެރި ނުކޮށް، ސީދާ ޑިޕްލޮމަސީއަށް ދިއުން ކަމުގައެވެ.

ފަލަސްތީނުގެ ހަމާސް ޖަމާއަތާއި އިސްރާއީލާއި ދެމެދު ހިގަމުންދާ ހަމަނުޖެހުންތައް ހުއްޓުމެއް ނެތި ކުރިޔަށްދާތާ މިހާރު 2 ހަފުތާ ފާއިތުވެގެން ގޮސްފައިވާއިރު، ދެފަރާތުންވެސް ހަމަލާ ބަދަލުކުރުން ހުއްޓާލުމުގެ އެއްވެސް އިޝާރާތެއް އަދި މިހާތަނަށް ލިބިފައެއް ނެތެވެ.

އިސްރާއީލް އަސްކަރިއްޔާއިން ބުނެފައިވަނީ، ހޯމަދުވަހުގެ ރޭގެ ވަގުތުތަކުގައިވެސް ގާޒާއިން ގިނަ އަދަދެއްގެ ރޮކެޓްތަކެއް އިސްރާއީލުގެ އަވަށްތަކާ ދިމާލަށް އުދުއްސާފައިވާ ކަމަށެވެ. އިސްރާއީލުން ވަނީ، އަންގާރަ ދުވަހު ހެދުނު އަނެއްކާވެސް ގާޒާއަށް އަމާޒުކޮށް ވަރަގަދަ އަސްކަރީ ހަމަލާތަކެއް ދީފައެވެ.

ގާޒާގެ ހަލްތު މިނިސްޓްރީން ހާމަ ކޮށްފައިވާ ގޮތުގައި މިހާތަނަށް ގާޒާއިން ފަލަސްތީނުގެ 212 މީހަކު އިސްރާއީލުގެ އުދުވާނީ ހަމަލާތަކުގައި ޝަހީދު ވެފައިވާ ކަމުގައެވެ. މީގެތެރޭގައި ޝަހީދުވެފައިވާ ކުޑަކުދިންނާއި އަންހެނުންގެ އަދަދު 100އަށް އަރައެވެ.

ޔޫއެންއިން ވަނީ، ފަލަސްތީނުގެ ހަމަނުޖެހުންތަކާ ގުޅިގެން ބާއްވާ ސެކިއުރިޓީ ކައުންސިލްގެ 4 ވަނަ އެމަރޖެންސީ ބައްދަލުވުން އަންގާރަ ދުވަހު ބޭއްވުމަށް ހަމަޖައްސާފައެވެ.