މި ސީޒަނަށްފަހު ކޭން ޓޮޓެންހަމް ދޫކޮށްލަނީ

މި ސީޒަނަށްފަހު ޓޮޓެންހަމް ހޮޓްސްޕާ ދޫކޮށްލަން ބޭނުންވާކަން އިންގްލެންޑުގެ ކެޕްޓަން ހެރީ ކޭން އަންގާފައިވާ ކަމަށް ރިޕޯޓުތައް ބުނެފިއެވެ.

އުމުރުން 27 އަހަރުގެ ކޭން މި ވަގުތު ޓޮޓެންހަމުގެ އެއްބަސްވުމުގައި ހުރީ 2024 ވަނަ އަހަރުގެ ޖޫން މަހުގެ ނިޔަލަށެވެ. 2011 ވަނަ އަހަރު ޓޮޓެންހަމުގެ ސީނިއާ ޓީމުން ޖާގަ ހޯދި ކޭނަށް މިހާތަނަށް ޓޮޓެންހަމާއެކު ބޮޑު ކާމިޔާބީއެއް ހޯދިފައެއް ނުވެއެވެ. އެކަމަކު އޭނާ ވަނީ 2018-2019 ވަނަ ސީޒަނުގެ ޔުއެފާ ޗެމްޕިއަންސް ލީގުގެ ފައިނަލާއި، 2014-2015 އަދި މި ސީޒަނުގެ އިނގިރޭސި ލީގު ކަޕުގެ ފައިނަލުގައި ކުޅެފައެވެ.

ރިޕޯޓުތައް ބުނާ ގޮތުން ހޯމަ ދުވަހުގެ ވަގުތެއްގައި ކޭން ވަނީ ޓޮޓެންހަމް ދޫކޮށްލަން ނިންމާފައިވާކަން އެ ކުލަބުގެ ވެރިންގެ ސަމާލުކަމަށް ގެނެސްފައެވެ. އަދި ޓޮޓެންހަމް ދޫކޮށްލި ނަމަވެސް، ކޭން ބޭނުންވަނީ އިނގިރޭސި ޕްރިމިއާ ލީގުގައި ކުޅުމަށް ކަމަށާއި، އެގޮތުން ޓޮޓެންހަމް ދޫކޮށްލާނަމަ، ކޭން ބޭނުމީ މެންޗެސްޓާ ސިޓީ ނުވަތަ މެންޗެސްޓާ ޔުނައިޓެޑަށް ދާން ކަމަށްވެސް ރިޕޯޓުތައް ވަނީ ބުނެފައެވެ.

ޓޮޓެންހަމް ދޫކޮށްލަން ބޭނުންވާކަން ކޭން އެންގިއިރު، މީގެ ކުރިން ދިން އިންޓަވިއުއެއްގައި ކޭން ވަނީ ފުޓްބޯޅައިގެ އެންމެ ބޮޑު ޓްރޮފީތައް ހޯދަން އޭނާވެސް ބޭނުންވާ ކަމަށާއި، އެހެންކަމުން ފުޓްބޯޅަ ކެރިއަރު ނިންމާލުމުގެ ކުރިން ބޮޑު މުބާރާތެއް ކާމިޔާބުކުރުމަކީ އަމާޒެއް ކަމަށް ބުނެފައެވެ.

ޕްރިމިއާ ލީގުގައި މަޑުކުރަން ކޭން ބޭނުންވި ނަމަވެސް، ރިޕޯޓުތައް ބުނާ ގޮތުން އޭނާ ހޯދުމަށް ޕީއެސްޖީން އަންނަނީ މަސައްކަތްކުރަމުންނެވެ. އެގޮތުން ކޭން ހޯދުމުގެ މަސައްކަތް ޕީއެސްޖީން ފެށީ މީގެ ކުރިން ޓޮޓެންހަމުގައި ކޭންއަށް އިރުޝާދުދިން އަދި މިހާރު ޕީއެސްޖީއަށް އިރުޝާދުދެމުން އަންނަ މައުރީސިއޯ ޕޮޗެޓީނޯގެ އެދުމުގެ މަތިން ކަމަށް ރިޕޯޓުތައް ބުނެއެވެ. އަދި ޕީއެސްޖީގެ އެއްބަސްވުން ފްރާންސްގެ ތަރި ކީލިއަން އެމްބާޕޭ އާނުކޮށްފިނަމަ، ކޭން ގަތުމަށް ޕީއެސްޖީ އޮތީ ތައްޔާރަށް ކަމަށްވެސް ރިޕޯޓުތައް ބުނެއެވެ.

މި ސީޒަނަށްފަހު ކޭން ޓޮޓެންހަމް ދޫކޮށްލާނެ ކަމަށް ބެލެވޭއިރު، އޭނާ ވަނީ މިހާތަނަށް އެ ޓީމުގައި މޮޅު ކުޅުމެއް ދައްކާފައެވެ. އެގޮތުން މިހާތަނަށް ޓޮޓެންހަމަށް ކުޅެދިން 334 މެޗުގައި ކޭން ވަނީ 220 ލަނޑު ޖަހާފައެވެ.