ރާއްޖޭގެ މުސްތަގުބަލު ބިނާވެފައި ވަނީ މޫސުމީ ބަދަލުތަކަށް މިއަދު ދޭ ސަމާލުކަމާއީ އެ ބަދަލުތައް ކުޑަކޮށް ހައްލުކުރަން ކުރާ މަސައްކަތަކަށް ކަމަށް މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާ ވިދާޅުވެއްޖެއެވެ.

ސީއެންބީސީ އަށް ދެއްވި ހާއްސަ އިންޓަވިއެއްގައި އެކަމަނާ ވިދާޅުވީ މޫސުމީ ބަދަލުތަކުގެ އަސަރު އެންމެ ބޮޑަށް ކުރާ އެއް ގައުމަކީ ދިވެހި ރާއްޖެ ކަމަށެވެ. ރާއްޖެ އަކީ ވަށައިގެން ކަނޑުގެ ލޮނުގަނޑު އޮތް ގައުމަކަށް ވާއިރު، ރާއްޖޭގެ 80 ޕަސަންޓު ރަށްތަކަކީ ސީ ލެވެލް އަށް ވުރެ އެންމެ މީޓަރެއް އުހުގައި އޮތް ރަށްތަކެއް ކަމަށެވެ. އެހެންވީމާ މި ގައުމު ސަލާމަތްވާނެ އިތުރު ގޮތެއް ނެތް ކަމަށާއި، ވަކި ދާނެ އިތުރު އުސް ބިމެއް ވެސް ނެތް ކަމަށް ވިދާޅުވިއެވެ.

މިނިސްޓަރ ޝައުނާ ވިދާޅުވީ ރާއްޖެއިން މިހާރު ވެސް އަދި ކުރިއަށް އޮތް ތަނުގައި ވެސް މިކަމަށް ވީ އެންމެ ރަނގަޅަކަށް މަސައްކަތްކުރާނެ ކަމަށާއި، އެކަމަށް ބައިނަލްއަގުވާމީ އެހީތެރިކަން ވެސް ވަރަށް ބޭނުންވާ ކަމަށް ވިދާޅުވިއެވެ. މޫސުމީ ބަދަލުތަކަކީ ހަގީގަތެއް ކަމަށާއި ދުނިޔޭގައި އުޅޭ ކޮންމެ މީހަކު ވެސް ފަރުދީ ލެވެލްއެއްގައި މިކަމަށް ހައްލު ގެނައުމަށް މަސައްކަތްކޮށްގެން ނޫނީ މި ބަދަލުތަކުން ސަލާމަތްވެ އަރައިގަނެވޭނެ މަގެއް ނެތް ކަމަށް ވިދާޅުވިއެވެ.

މިނިސްޓަރ ޝައުނާ ވިދާޅުވީ މިހާރު ވެސް މޫސުމީ ބަދަލުތަކުގެ އަސަރު ރާއްޖެ އަށް ވަރަށް ބޮޑަށް ކޮށްފައިވާ ކަމަށެވެ. އެގޮތުން މިހާރު ވެސް ބައެއް ރަށްރަަށަށް ވެފައިވާ ގެއްލުންތައް މިނިސްޓަރ ތަފްސީލްކޮށްދެއްވިއެވެ. ޝައުނާ ވިދާޅުވީ 90 އިންސައްތަ ރަށްރަށަށް އުދަ އަރާ ކަމަށާއި، 97 އިންސައްތަ ރަށްރަށް ގިރާ ކަމަށެވެ. އަދި އޭގެ ތެރެއިން 64 އިންސައްތަ ރަށްރަށް ވަރަށް ބޮޑަށް ގިރާފައިވާ ކަމަށް ވިދާޅުވިއެވެ. މިނިސްޓަރ ވިދާޅުވީ 50 އިންސައްތަ ރަށްރަށުގައި ގެތަށް އަޅާފައި ހުންނާނީ މޫދާ 100 މީޓަރު ދުރުގައި ކަމަށެވެ. އެހެންވީމާ ރަށް ގިރުމާއި ރާޅު އެރުމަކީ ރަށްރަށުގައި ދިރިއުޅޭ މީހުންނަށް އޭގެ ސަބަބުން އެކިވަރުގެ ގެއްލުން ވާނެ ކަމެއް ކަމަށް ވިދާޅުވިއެވެ.

މިނިސްޓަރ ޝައުނާ ވިދާޅުވީ މިކަމަކީ މިހާރުން މިހާރަށް އަވަސް ފިޔަވަޅުތަކެއް އަޅަން ޖެހިފައިވާ ކަމެއް ކަމަށެވެ. އެކަކު ދެމީހަކު ކުރާ މަސައްކަތަކުން މިކަން ހައްލެއް ނުވާނެ ކަމަށާއި، ދުނިޔޭގެ އެންމެން ވެސް ފަރުދީ ލެވަލްއެއްގައި މިކަަމަށް ޒިންމާ ނަގައި އެބަޔަކަށް ކުރެވުނު ކޮންމެ ކަމެއް ކުރަން މަޖުބޫރުވާ ހިސާބަށް އައިސްފައިވާ ކަމަށެވެ. އަދި ހުރިހާ ގައުމެއްގެ ސަރުކާރަކުން ވެސް ގައުމީ ފެންވަރުގައި ކުރެވެން ހުރި ކަންކަން ކޮށްގެން ނޫނީ ރާއްޖެއާއި ރާއްޖެ ފަދަ އެހެން ކުދި ގައުމުތައް ސަލާމަތް ނުވާނެ ކަމަށް ވިދާޅުވިއެވެ.