ގައްދޫ ޒާހިރު އަވަހާރަވުމާ ގުޅިގެން ރައީސްގެ ތައުޒިޔާ

ރައްޔިތުންގެ މަޖިލީހުގެ ގައްދޫ ދާއިރާގެ ކުރީގެ މެންބަރު ޒާހިރު އާދަމް (ގައްދޫ ޒާހިރު) އަވަހާރަ ވުމާއި ގުޅިގެން ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު ތައުޒިޔާ ދަންނަވައިފިއެވެ.

ތައުޒިޔާ ދަންނަވައި އެމަނިކުފާނު ކުރެއްވި ޓްވީޓެއްގައި ވިދާޅުވީ، ޒާހިރަކީ ރައްޔިތުންގެ ޚާއްޞަ މަޖިލީހާއި ރައްޔިތުންގެ މަޖިލީހުގައި އެކުގައި ވަރަށް ގިނަ ދުވަހު މަސައްކަތް ކުރެއްވި ގާތް ރަޙުމަތްތެރިއެއް ކަމަށެވެ. އަދި ޒާހިރު އަވަހާރަވި ޚަބަރު އެއްސެވީ ފުން ހިތާމަޔާއެކުކަން ފާހަގަ ކުރައްވައި ރައީސް ވަނީ އޭނާގެ ފުރާނަފުޅަށް ހެޔޮ ރަޙުމަތް ލެއްވުން އެދި ދުއާ ކުރައްވާފައެވެ.

ޒާހިރުގެ އާއިލާގެ ފަރާތުން ރާއްޖެ އެމްވީއާއި ވާހަކަ ދައްކަވަމުން ވިދާޅުވީ ހޯމަ ދުވަހުގެ ރޭގެ ވަގުތެއްގައި ޒާހިރުގެ ހާލުކޮޅު ގޯސްވެގެން އެމަރޖެންސީގައި އައިޖީއެމްއެޗަށް ގެންދެވި ފަރުވާ ދެވިފައިވާ ކަމަށެވެ. އާއިލާއިން ވިދާޅުވެފައިވަނީ ޒާހިރުގެ ހާލުކޮޅު ގޯސްވެފައިވަނީ ކޮވިޑުގެ ސަބަބުން ކަމަށެވެ. ޒާހިރު އަވަހާރަވި އިރު އުމުރުފުޅުން 80 އަހަރެވެ.

ޒާހިރު އާދަމް (ގައްދޫ ޒާހިރު) އަކީ ގައްދޫ ދާއިރާގެ މިހާރުގެ މެންބަރު އަހުމަދު ޒާހިރުގެ ބައްޕާފުޅެވެ. ޒާހިރު ވަނީ 17 ވަނަ ރައްޔިތުންގެ މަޖިލީހުގެ ގަައްދޫ ދާއިރާގެ މެންބަރުކަން ވެސް ކުރައްވާފައެވެ. މީގެ އިތުރުން ހުވަދުއަތޮޅު ދެކުނުބުރީ މެންބަރުކަމާއި ޚާއްސަ މަޖިލީހުގެ މެންބަރުކަން ވެސް ޒާހިރު ވަނީ ކުރައްވާފައެވެ.