ސެކިއުރިޓީ ކައުންސިލުން ފަލަސްތީނުގެ ދިފާޢުގައި ބަޔާން ނެރުން ތިންވަނަ ފަހަރަށް އެމެރިކާއިން ވީޓޯކޮށްފި

ސެކިއުރިޓީ ކައުންސިލުން ފަލަސްތީނުގެ ދިފާޢުގައި ގަރާރު ނެރުން ތިންވަނަ ފަހަރަށް އެމެރިކާއިން ވީޓޯކޮށްފިއެވެ.

އދ ގެ ސެކިއުރިޓީ ކައުންސިލްގައި ޖުމްލަ 15 މެމްބަރު ގައުމު ހިމެނޭއިރު، މީގެ ތެރެއިން ޗައިނާ، ފްރާންސް، ރަޝިޔާ، އިނގިރޭސިވިލާތް އަދި އެމެރިކާއަކީ އެ ކައުންސިލްގެ ދާއިމީ މެމްބަރު ގައުމުތަކެވެ. އދއަށް އެންމެ ގިނައިން ފަންޑްކުރާ މި ޤައުމުތަކަކީ އަދި ސެކިއުރިޓީ ކައުންސިލް ވީޓޯ ކުރުމުގެ ބާރު އެ ފަސްގައުމުގެ ތެރެއިން ކޮންމެ ގައުމަކަށްވެސް ލިބިގެން ވެއެވެ. މެދުއިރުމަތީގައި ހިނގަމުންދާ ހަމަނުޖެހުން ހުއްޓުވާ ފަލަސްތީން ރައްޔިތުންނަށް އަމާޒުކޮށްދޭ ހަމަލާ ހުއްޓުވުމަށް ޤަރާރެއް ފާސްކުރަން މެއި 17 ވަނަ ދުވަހު ޗައިނާ، ޓިއުނީޝިއާ އަދި ނޯވޭ ގުޅިގެންވަނީ ޤަރާރުގެ ޑްރާފްޓް ވަނީ ސެކިއުރިޓީ ކައުންސިލަށް ހުށަހަޅާފައެވެ.

ސެކިއުރިޓީ ކައުންސިލުން ގަރާރެއް ފާސްވުމަށް 9 ގައުމެއްގެ ވޯޓު ބޭނުންވާއިރު، ސެކިއުރިޓީ ކައުންސިލް ވީޓޯ ކުރުމުގެ ބާރު ލިބިފައިވާ އެމެރިކާއަކީ މެދުއިރުމަތީގައި ލާއިންސާނީ އަމަލުތައް ހިންގާ އިސްރާއީލާ އަބަދުވެސް ގާތް ގުޅުމެއް ބާއްވާ ޤައުމެކެވެ. މި ސަބަބައްޓަކައި އދ ގެ ސެކިއުރިޓީ ކައުންސިލްގައި އެކި ފަހަރުމަތިން ފަލަސްތީނުގެ ހައްޤަށްޓަކައި ވަކާލާތުކުރިޔަސް ނަތީޖާއެއް ނިކުންނަގޮތް ވަނީ ނުވެފައެވެ.

މިހާރު އިސްރާއިލުން ހިންގަމުންދާ ލާއިންސާނީ އަމަލުތައް ހުއްޓުވުމަށް ސެކިއުރިޓީ ކައުންސިލްއަށް ލިބިފައިވާ ބާރު ބޭނުންކުރުން ހުއްޓުވި މިއީ ތިންވަނަ ފަހަރެވެ. އޭއެފްޕީ ނިއުސްއަށް ދިން އިންޓަވިއުއެއްގައި އދގައި ހުންނަ އެމެރިކާގެ މަސްއޫލުވެރިއަކު ވަނީ ޤަރާރަށް ދެކޮޅުހެދީ ޤަރާރުގައި އެމެރިކާގެ ޤަބޫލުކުރުންތަކާއި ޚާރިޖީ ސިޔާސަތާއި ޚިލާފު ކަންތައްތައް ހުރުމުންކަމަށް ވަނީ ބުނެފައެވެ. މިކަމުގެ އިތުރު ތަފްސީލްދެވެން ނެތްކަމަށް އޭނާ ވަނީ ބުނެފައެވެ.

ފަލަސްތީނުގެ ގާޒާއަށް އިސްރާއީލުން ދެމުން ގެންދާ ހަމަލާތައް ކުށްވެރި ކުރުމުގެ ބަދަލުގައި އެމެރިކާއިން ވަނީ އަމިއްލަ ނަފްސުގެ ދިފާއުގައި މަސައްކަތް ކުރާ ފަލަސްތީނުގެ ހަމާސް ޖަމާއަތް ކުށްވެރި ކޮށްފައެވެ. ފަލަސްތީނުގެ ގާޒާއަށް އިސްރާއީލުގެ ޔަހޫދީ ސިފައިން ދެމުން ގެންދާ ހަމަލާތަކުގައި މިހާތަނަށް 400ށް ވުރެ ގިނަ މީހުން ޝަހީދުވެފައިވާއިރު، މި ހަމަލާތަކާއި ގުޅިގެން 10،000ށް ވުރެ ގިނަ މީހުން ހާލުގައި ޖެހިފައިވެއެވެ.

އިސްރާއީލުން ދެމުން ގެންދާ ހަމަލާތަކުގެ ބަދަލުގައި ފަލަސްތީނުގެ ހަމާސް ޖަމާއަތުން ވަނީ އިސްރާއީލަށް ރޮކެޓް ހަމަލާތަކެއް ވެސް ފޮނުވާލައިފައެވެ. އެމެރިކާގެ ވައިޓް ހައުސްގެ ސްޕޯކްޕާސަން ޖޭން ސާކީ ވިދާޅުވީ އިސްރާއީލަށް އަމާޒުކޮށް ފަލަސްތީނުގެ ހަމާސް ޖަމާއަތުން ދެމުން ގެންދާ ހަމަލާތަކުގައި އިސްރާއީލުގެ ރައްޔިތުން މަރުވެފައިވާ ކަމަށާއި އަދި މިހަމަލާތަކުގައި އެތައް ސަތޭކަ ބަޔަކަށް އަނިޔާވެފައިވާ ކަމަށެވެ. އިސްރާއީލަށް އަމާޒުކޮށް ހަމާސްއިން ދެމުން ގެންދާ ހަމަލާތައް ބަލައި ނުގަނެވޭނެ ކަމަށާއި، މިއީ އަމިއްލަ އެދުމެއް އޮވެގެން ހަމާސްއިން ދެމުން ގެންދާ ޓެރަރިޒަމްގެ އަމަލެއް ކަމަށް ވެސް ސާކީ ވިދާޅުވިއެވެ. ސާކީ ވިދާޅުވީ އިސްރާއީލަށް ބޭނުންވާ އެހީ އެމެރިކާއިން އަބަދުވެސް ދެމުން ގެންދާނެ ކަމަށެވެ. ނަމަވެސް ސާކީގެ ވާހަކައިގައި އިސްރާއީލުން ފަލަސްތީނަށް ދެމުން ގެންދާ ހަމަލާތަކުގެ ވާހަކަ ދައްކަވައިފައެއް ނުވެއެވެ.