ސިނޮވެކް އުފައްދަން ބޭނުންވާ ތަކެތި ލިބުމުގައި ދަތިވުމުން ބްރެޒިލުން ސިނޮވެކް އުފެއްދުން ހުއްޓާލައިފި
17 މެއި 2021 | ހޯމަ 17:55މީގެ ކުރިން ޗައިނާ ސަރުކާރުން ވެކްސިން ހެދުމަށް ބޭނުންވާ ތަކެތި ވަނީ ފޯރުކޮށްދީފައި
ބްރެޒިލްގެ ހޮސްޕިޓަލެއްގައި ކޮވިޑް ޖެހިފައިވާ މީހުނަށް ފަރުވާ ދެމުން ދަނިކޮށް
ޗައިނާގެ ސިނޮވެކް ވެކްސިން އުފައްދަން ބޭނުންކުރާ ތަކެތި ލިބުމުގައި ދަތިތަކެއް ހުރުމާއިއެކު ބްރެޒިލުން ސިނޮވެކް އުފެއްދުން ހުއްޓާލައިފިއެވެ.
ބްރެޒިލްގެ ސަރުކާރުން ބުނީ ޗައިނާއިން ކުރިން ސިނޮވެކް އުފައްދަން ބޭނުންވާ ތަކެތި ފޯރުކޮށްދިން ނަމަވެސް މިހާރު އެކަން އެގޮތަށް ނުކުރާ ކަމަށެވެ. އެހެންކަމުން ސިނޮވެކް ވެކްސިން އިތުރަށް ނުއުފައްދާން އެގައުމުން ނިންމާފައިވާ ކަމަށެވެ. ބްރެޒިލްގެ ބުޓަޓަން ބަޔޯމެޑިކަލް ސެންޓަރަށް މިހާރު އެ ވެކްސިން ނުހެދުމަށް އަންގާފައިވާ ކަމަށްވެސް ސަރުކާރުން ބުނެއެވެ.
ބްރެޒިލް ސަރުކާރުން ބުނީ ސިނޮފާމްގެ ބާކީ ހުރި އެއް މިލިއަން ޑޯޒުގެ ވެކްސިން ބޭނުން ކުރާނެ ކަމަށާއި، ސިނޮފާމް ވެކްސިން ހުސްވުމުގެ ކުރިން އެހެން ވެކްސިން ހޯދަން މަސައްކަތް ކުރާނެ ކަމަށެވެ. އެގޮތުން މިހާރު އެސްޓްރާޒެނެކާ ވެކްސިންގެ އިތުރުން ފައިޒާ ވެކްސިން ހޯދުމަށް މަސައްކަތް ކުރަމުން އަންނަ ކަމަށް ބްރެޒިލް ސަރުކާރުން ވަނީ ބުނެފައެވެ.
ބްރެޒިލަކީ ދުނިޔޭން ތިންވަނައަށް އެންމެ ގިނަ މީހުން ޕޮޒިޓިވްވެފައިވާ ގައުމެވެ. އެގޮތުން އެގައުމުން މިހާތަނަށް 15،627،475 މީހުން ވަނީ ބައްޔަށް ޕޮޒިޓިވްވެފައެވެ. އަދި މިބަލީގައި 435،823 މީހުން ވަނީ މަރުވެފައެވެ.
