އަގުހުރި އިނާމަކާއެކު ސެންޓްރަލް ޕާކުގެ އިސްލާމީ މަރުކަޒު ފަރުމާ ކުރުމުގެ މުބާރާތެއް
ފަރުމާ ކުރުންތަކުގައި ރާއްޖޭގެ ސަގާފީ ފަންނުވެރިކަން ފެންނަން ހުންނަން ވާނެ
ހުޅުމާލެ ސެންޓްރަލް ޕާކު
ހުޅުމާލެ ސެންޓްރަލް ޕާކުގައި ހަދާ އިސްލާމީ މަރުކަޒު ފަރުމާކުރުމުގެ މުބާރާތް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ހުޅުވާލައިފިއެވެ.
މި މުބާރާތަކީ އެޗްޑީސީއާއި އިކޮނޮމިކް މިނިސްޓްރީ ގުޅިގެން ކުރިއަށް ގެންދާ މުބާރާތެކެވެ.
އެޗްޑީސީން މައުލޫމާތު ދޭ ގޮތުގައި, ސެންޓްރަލް ޕާކުގައި އިސްލާމީ މަރުކަޒެއް ބިނާ ކުރުމުގެ ބޭނުމަކީ, އެ ޕާކުގައި ސަގާފީ ކުލަ ޖެއްސުމެވެ. އެހެން ކަމުން މި މުބާރާތުގެ ދަށުން ފަރުމާ ކުރެވޭ ފަރުމާ ކުރުންތަކުގައި ރާއްޖޭގެ ސަގާފީ ފަންނުވެރިކަން ފެންނަން ހުންނަން ވާނެ ކަމަށް އެޗްޑީސީން ބުނެއެވެ.
ސެންޓްރަލް ޕާކުގެ އިސްލާމީ މަރުކަޒު އެކުލެވެނީ މައިގަނޑު ދެ އިމާރާތެއްގެ މައްޗަށެވެ. އެއީ 2500 މީހުންގެ ޖާގައިގެ މިސްކިތަކާއި ދީނީ ކުތުބުޚާނާއެކެވެ.
އިސްލާމީ ކުތުބުޚާނާއަކީ, ދީނީ ތައުލީމާއި ދިރާސާތައް ކުރެވޭނެހެން ފަރުމާކުރާ ކުތުބުޚާނާއެކެވެ. އެތަނުގައި ފޮތްކިޔުމަށް ޚާއްސަ ކޮޓަރިތަކުގެ އިތުރުން, އިލްމީ މަޝްވަރާތައް ކުރެވޭނެ ޖާގަތައް ހެދުމަށް ނިންމާފައިވާކަމަށް އެޗްޑީސީން ބުނެއެވެ.
ހުޅުމާލޭ އިސްލާމީ މަރުކަޒު ފަރުމާ ކުރުމުގެ މުބާރާތުގައި ބައިވެރިވާ ކޮންމެ ޓީމެއްގައި ވެސް ރެޖިސްޓާޑް އާކިޓެކްޓެއް ހުންނަން ޖެހެއެވެ. މި މުބާރާތުން އެއްވަނައަށް ހޮވޭ ޓީމަކަށް 300,000 ރުފިޔާގެ ފައިސާގެ އިނާމެއް ދިނުމަށް ނިންމާފައި ވާކަމަށް އެޗްޑީސީން މައުލޫމާތު ދެއެވެ.
ހުޅުމާލެ ސެންޓްރަލް ޕާކަކީ ދިވެހި ރާއްޖޭގެ އެންމެ ބޮޑު ޕާކެވެ. މި ޕާކު ތަރައްގީ ކުރަނީ ޖުމްލަ ހަތަރު ފިޔަވައްސަކަށް ބަހާލައިގެންނެވެ. އޭގެ ތެރޭގައި ހިމެނެނީ އިށީނދެލައިގެން ތިބެވޭ ގޮތަށް ތައްޔާރުކޮށްފައިވާ ޕާކަކާއި, އައުޓްޑޯ ސްޓޭޖް އަދި ސްޓޯން ގާޑެންފަދަ ތަންތަން ހުންނަ އިންޓަރެކްޓިވް ޕާކަކާއި, ކަސްރަތުކުރުން ފަދަ ހަރަކާތްތައް ކުރިއަށް ގެންދެވޭ ރެކްރިއޭޝަނަލް ޕާކެއްގެ އިތުރުން ފެންއަރުވާ ވަޑާމަކާއި މިސްކިތް ހުންނަ ބައެވެ.
ސެންޓްރަލް ޕާކުގައި އިސްލާމީ މާރުކަޒެއް ގާއިމް ކުރުމުގެ މަގުސަދަކީ, ހުޅުމާލެ ފުރަތަމަ ފިޔަވަހީގައި ދީނީ ގޮތުން ފާހަގަކުރެވޭ އިމާރާތެއް ނުވަތަ ލޭންޑް މާކެއް ހެދުން ކަމަށް އެޗްޑީސީން ބުނެއެވެ.
